កាលពីថ្ងៃទី ៩ កញ្ញា ២០១៤ ក្រុមហ៊ុន Canon បានបញ្ចាញនូវប្រភេទកាម៉េរាហ្ស៊ូមបានឆ្ងាយចំនួនពីរថ្មីម៉ូឌែល PowerShot SX520 HS និង SX400 IS ដែលមានភាពងាយស្រួល អាចថតបានឆ្ងាយរក្សារូបភាពច្បាស់ល្អដោយគ្រាន់តែចុចប៊ូតុងថតតែប៉ុណ្ណោះ។ វាត្រូវបានបំពាក់ជាមួយបច្ចេក វិទ្យា ZoomPlus ដែលជួយបង្កើនសមត្ថភាពហ្ស៊ូមបានទ្វេដង។ ពិសេសមុខងារ Advanced Zoom Framing Assist នៅលើម៉ូឌែល PowerShot SX520 HS ជួយក្នុងការចាប់រូបភាពមានសកម្មភាពនៅពីចម្ងាយយ៉ាងល្អ។
លោក Hideaki Nishimura ដែលជានាយកគ្រប់គ្រងជាន់ខ្ពស់ផ្នែកលក់ និងទីផ្សារផលិតផលម៉ាស៊ីនថតក្នុងតំបន់ប្រចាំក្រុមហ៊ុន Canon សិង្ហបូរី មានចំនាប់អារម្មណ៍ថា៖ កាម៉េរា PowerShot SX520 HS និង SX400 IS ជាប្រភេទកាម៉េរាទើបចេញថ្មី រូបរាងតូចស្រស់ស្អាត សាកសមសំរាប់យុវវ័យចូលចិត្ត ការថតរូបក្នុងដំណើរកំសាន្ត និងសកម្មភាពកីឡាទូទៅ។ វាត្រូវបានភ្ជាប់នូវប្រព័ន្ធហ្ស៊ូមទំនើបហៅថា ZoomPlus ដែលផ្តល់នូវលទ្ធភាពចាប់យករូបភាពពីទីឆ្ងាយៗ និង ផ្តល់នូវគុណភាពរូបភាពច្បាស់បំផុត ពី Canon។
ដោយយកចិត្តទុកដាក់ទៅលើតំរូវការអ្នកចូលចិត្តថតរូបបែបកំសាន្តនិងកីឡា កាម៉េរាថ្មីនេះ ត្រូវបានរចនាជាពិសេសបំពាក់ដោយសមត្ថភាពហ្ស៊ូមបានឆ្ងាយ ប្រកបដោយតំលៃថោកមិនធ្លាប់មាន។ PowerShot SX520 HS មានកំរិតសិនសឺ 16.0 មេហ្គាភិចសែល និងប្រើកែវឡេន 24-1008mm (ស្មើ 35mm) អាចហ្ស៊ូមបាន 42x និងកើនទ្វេ 84x ជាមួយ ZoomPlus រីឯ PowerShot SX400 IS មានកំរិតសិនសឺ 16.0 មេហ្គាភិចសែល និងប្រើកែវឡេន 24-720mm (ស្មើ 35mm) អាចហ្ស៊ូមបាន 30x និងកើនទ្វេ 60x ជាមួយ ZoomPlus។ ពិសេស ម៉ូឌែល PowerShot SX520 HS ប្រើនូវបច្ចេកវិទ្យា Advanced Zoom Framing Assist ដែលជាជំនួយល្អបំផុត ក្នុងការតាមចាប់រូបភាព និង រក្សាគុណភាពច្បាស់ស្ថិតក្នុងការផ្តោតក្នុងកាម៉េរា ដោយដំណើរការពីរបែប គឺ Seek Assist (ជួយតាមចាប់រូបភាព) និង Auto Zoom (ហ្ស៊ូមដោយស្វ័យប្រវត្តិ)។
មុខងារ Seek Assist មានលើ PowerShot SX520 HS ជួយតាមដានចាប់រូបភាពនៅពេល រូបភាពនោះមិនស្ថិតក្នុងប្លង់ដោយ ការហ្ស៊ូមចេញឆ្ងាយ ហើយហ្ស៊ូមត្រលប់មកការហ្ស៊ូមកំរិត ដើមវិញ បន្ទាប់ពីចាប់បានរូបភាព ងាយស្រួលក្នុងការថតយក រូបភាពមានសកម្មភាពទៅមកញឹកញាប់។ ចំនែក មុខងារ Auto Zoom ជួយសំរួលកំរិតហ្ស៊ូម ដោយរក្សានូវទំហំ និងការ ផ្តោតយករូបភាព ដែលផ្លាស់ទីនៅពីមុខកាម៉េរា។ បន្ថែមពីលើនេះ លោកអ្នកអាចរីករាយជាមួយមុខងារថ្មីៗទៀតពី SX520 HS ដូចជា face (ការចាប់ផ្ទៃមុខ) Upper body (ការចាប់ពាក់កណ្តាលខ្លួន) និង Whole Body (ការថតទាំងមូល)។
ការរចនាសំរាប់ការប្រើប្រាស់ងាយស្រួល រក្សាលំនឹង
កាម៉េរាថ្មីទាំងពីរត្រូវបានរចនាយ៉ាងពិសេស ផ្តល់នូវភាពងាយស្រួលកាន់ថតក្នុងដៃ និងបញ្ជាថត ប្រកបដោយលំនឹងល្អ។ ពិសេស កាម៉រាទាំងពីរនេះ ប្រើនូវបច្ចេកវិទ្យា Intelligent IS ដែលអាច ចាប់យករូបភាពបានល្អ និង កាត់បន្ថយនូវសភាពព្រាលលើរូបភាពកើតចេញពីរំញ័រដៃលោកអ្នក។ ម្យ៉ាងទៀត ម៉ូឌែល PowerShot SX520 HS ត្រូវបានភ្ជាប់ជាមួយប៊ូតុង កំណត់ ក្បែរម្រាមដៃ ស្រដៀងទៅនឹងប្រភេទកាម៉េរាប្តូរកែវឡេន EOS DSLR ដែលជាចំនុចពិសេស ក្នុងការកំណត់មុខងារ ថតភ្លាមៗ និង រក្សាលំនឹងកាម៉េរា និងរូបភាពបបានល្អ។
គុណភាពរូបភាពល្អលើសពីការរំពឹង
កាម៉េរាទំនើបពីរនេះ ប្រើនូវឈិបគណនារូបភាព DIGIC 4+ និង សិនសឺកាម៉េរាកំរិត 16 មេហ្គាភិចសែល f1/2.3 ប្រភេទ CMOS (និង ប្រភេទ CCD សំរាប់ PowerShot SX400 IS) ដែលផ្តល់នូវការ ផ្តោតយករូបភាពបានលឿន ងាយស្រួលចុចថតគ្រប់សកម្មភាពពិសេសៗ ប្រកបដោយគុណភាព ពណ៌ល្អឥតខ្ចោះ។
មុខងារកំសាន្តលើរូបភាពបែបច្នៃប្រឌិត
PowerShot SX520 HS ផ្តល់នូវមុខងារថតបែបច្នៃប្រឌិត ជាមួយរបាំងកំនែពណ៌ជាច្រើនជំរើស រហូតដល់ 46 ប្រភេទខុសគ្នា លើសជិតពីរដងពីប្រភេទកាម៉េរាម៉ូឌែលមុនៗ។ នៅពេលលោកអ្នកជ្រើសមុខងារនេះ ដើម្បីថតរូប នោះ កាម៉េរានឹងធ្វើការជ្រើសរើស របាំងកំនែពណ៌ត្រឹមត្រូវ ដើម្បីបង្កើតជារូបភាពប្រាំប្រភេទ បន្ថែមលើរូបភាពដើម។ ហើយលោកអ្នកក៏អាចធ្វើការកំណត់យក ការថតពីប្រភេទពណ៌ Retro, Monochrome, Special, ឬ Natural ផងដែរ ហើយ PowerShot SX520 HS នឹងធ្វើការបំលែង ពណ៌ស្របតាមជំរើសទាំងនេះ។
ថតវីដេអូច្បាស់ឥតអាក់
លោកអ្នកនឹងអាចរីករាយថតលក្ខណៈវីដេអូបានច្បាស់ល្អជានិច្ច ដោយ Canon បានយល់ច្បាស់ពីតំរូវការ ទាំងនេះ និងបានបំពាក់សមត្ថភាពថតវីដេអូកំរិត FULL HD ទៅលើ PowerShot SX520 HS កំរិត 30p និង វីដេអូកំរិត HD ទៅលើ SX400 IS កំរិត 25p។
