កំពូលស្មាតហ្វូនក្រកូល G ជំនាន់ទីបួន LG G4 មិនទាន់កំនត់កាលបរិច្ឆេទច្បាស់លាស់ក្នុងការប្រកាសចេញនៅឡើយផង ស្រាប់តែពេលនេះក្រុមហ៊ុនបច្ចេកវិទ្យាដ៏ល្បីរបស់កូរ៉េខាងត្បូង LG Electronics Corp មួយនេះក៏បានប្រលែងចេញស្មាតហ្វូនប្រភេទហ្វាប់ប្លែតមួយម៉ូដែលស៊េរី LG G Stylo យ៉ាងប្រណីតមុនទៅវិញ។
G Stylo បានបង្ហាញខ្លួនបង្អួតរាងជាមួយនឹងអេក្រង់ធំទូលាយទំហំ 5.7 អ៊ីង ទ្រទ្រង់រីសូលូហ្ស៊ិនរូបភាពវីដេអូបានកម្រិត 1280x720p និងភ្ជាប់មកជាមួយនឹងប៊ិច Stylus ដែលកាន់តែផ្តល់ភាពងាយស្រួលក្នុងការចុចបញ្ជាមុខងារ និងកម្មវិធីបានកាន់តែលឿនរហ័សនៅលើកញ្ចក់អេក្រង់ដ៏ធំរបស់វា។ បន្ថែមពីនេះ LG G Stylo ត្រូវបាន LG ប្រើប្រាស់បន្ទះឈីប Qualcomm MSM8916 Snapdragon 410, អង្គគណនា Quad-Core ល្បឿនប្រតិបត្តិការ 1.2 GHz, RAM 1.5 GB, ទំហំផ្ទុកក្នុងម៉ាស៊ីន 8 GB និងមានរន្ធដោតម៉េមូរីកាតបន្ថែមបាន 128 GB, មានថ្មអាចដោះចេញបានទំហំ 3,000 mAh, កាមេរ៉ាក្រោយទំហំ 8MP, មុខ 5MP, ភ្ជាប់មកនៅសេវា 4G LTE និងដំណើរការជាមួយ Android ស៊េរីចុងក្រោយ v5.0 Lollipop។
បើតាមប្រភពពីក្រុមហ៊ុន LG បានឲ្យដឹងថា ខណះពេលឥលូវនេះ G Stylo គឺមានលក់តែនៅក្នុងទីផ្សារប្រទេសកូរ៉េខាងត្បូងតែប៉ុណ្ណោះ ប៉ុន្តែ នៅថ្ងៃខាងមុខក្រុមហ៊ុននឹងនាំហ្វាប់ប្លែតមួយនេះទៅចរាចរណ៍លក់ក្នុងទីផ្សារបណ្តាប្រទេសមួយចំនួនទៀតនៅជុំវិញពិភពលោកផងដែរ៕
ប្រភពព័ត៌មាន ៖ http://www.phonedog.com/2015/04/21/lg-g-stylo-new-stylus-toting-android-phablet