នៅពេលដែលក្រុមហ៊ុន HTC បានធ្វើការប្រកាសបង្ហាញនូវទូរស័ព្ទ One A9 ក្រុមហ៊ុនមួយនេះ បានធ្វើការសន្យាថា នឹងចេញកំណែទម្រង់ថ្មីរបស់ប្រព័ន្ធប្រតិបត្តិការ Android របស់ខ្លួននៅក្នុងរយៈពេល 15 ថ្ងៃបន្ទាប់ពីទូរស័ព្ទនេះបានបង្ហាញខ្លួន។ វាពិតជាអស្ចារ្យណាស់មែនទេ? ប៉ុន្តែវាមិនមែនជាប្រព័ន្ធប្រតិបត្តិការ Android 7.0 នោះទេ។ នៅក្នុងការប្រកាសមួយ ក្រុមហ៊ុន HTC បាននិយាយថា សម្រាប់ Software ថ្មីនេះ នឹងធ្វើការប្រើប្រាស់នៅលើទូរស័ព្ទ HTC 10 នៅក្នុងត្រីមាសទី 4 នៅក្នុងឆ្នាំ 2016 ក្រោយពេលដែលធ្វើកំណែទម្រង់ទៅលើទូរស័ព្ទ One M9 និង One A9 របស់ខ្លួន។
ការកំណត់ពេលវេលាតាមការសន្យារបស់ក្រុមហ៊ុនមួយនេះ ត្រូវបានគេចាត់ទុកថា ក្រុមហ៊ុន HTC កំពុងតែក្បត់នូវការសន្យារបស់ខ្លួនទៅលើទូរស័ព្ទ One A9 បន្ទាប់ពីក្រុមហ៊ុន Google បានធ្វើការប្រកាសនូវទូរស័ព្ទ Nougat នៅថ្ងៃទី 22 ខែសីហា ដែលមានន័យថាទូរស័ព្ទនេះ អាចធ្វើការអាប់ឌែតប្រើប្រាស់នូវប្រព័ន្ធប្រតិបត្តិការ Android ចុងក្រោយគេនេះនៅថ្ងៃទី 6 ខែកញ្ញាខាងមុខឆាប់ៗនេះ។ យើងបានធ្វើការទាក់ទងទៅកាន់ក្រុមហ៊ុន HTC ហើយអ្នកនាំពាក្យរបស់ក្រុមហ៊ុនមួយនេះ បានបញ្ជាក់ថា “ជាមួយនឹងការបញ្ចេញនូវប្រព័ន្ធប្រតិបត្តិការថ្មី Android Nougat យើងបានប្រាប់ទៅកាន់វិស្វកររបស់យើងក្នុងការផ្តល់នូវកំណែទម្រង់ថ្មីដើម្បីបំពេញចិត្តទៅកាន់អ្នកប្រើប្រាស់។
ប៉ុន្តែអ្វីដែលគួរឱ្យសោកស្តាយនោះគឺថា ទូរស័ព្ទ One A9 គឺនៅមានសមត្ថភាពតិចតួចនៅឡើយនៅចាញ់ HTC 10 ហេតុដូចនេះ យើងបានសម្រេចថានឹងដាក់ប្រព័ន្ធប្រតិបត្តិការថ្មីនេះនៅលើ HTC 10 វិញព្រោះ វាអាចដំណើរការបានយ៉ាងល្អ។”ការឆ្លើយតបបែបនេះ ប្រហែលជាមិនសូវផ្តល់នូវការពេញចិត្តសម្រាប់អ្នកប្រើប្រាស់នោះទេ ព្រោះវាអាចជាការបោកប្រាស់ ឬយុទ្ធសាស្ត្ររបស់ក្រុមហ៊ុន HTC ដើម្បីលក់ដាច់នូវទូរស័ព្ទស៊េរីថ្មីរបស់ខ្លួននោះ។ ប៉ុន្តែយ៉ាងហោចណាស់វាក៏អាចជាហេតុផលមួយសម្រាប់អ្នកដែលបានទិញទូរស័ព្ទនេះរួចហើយ៕