ក្រុមហ៊ុនSony បានប្រកាសផ្ដល់កាម៉េរាដល់ក្រុមហ៊ុនWestec Media ក្នុងគោលបំណងដើម្បីអោយក្រុមហ៊ុនWestec Media អនុញ្ញាតិសាធារណៈជនទូទៅ ដែលមានបំណងថតរូប ខ្ចីប្រើប្រាស់។ ការផ្ដល់កាម៉េរានេះ គឺជាការចូលរួមក្នុងសង្គមមួយរបស់ក្រុមហ៊ុនSony ព្រោះសាធារណៈជនដែលមិនមានកាម៉េរា អាចមកធ្វើការទំនាក់ទំនងខ្ចីកាម៉េរាឌីជីថលពីក្រុមហ៊ុនWestec Media ជាពិសេសសិស្សនិស្សិត ដែលកំពុងសិក្សាវិស័យថត រូប រឺវិស័យសាព័ត៌មានជាដើម នៅស្នាក់ការក្រុមហ៊ុនWestec Media នៅផ្សារទំនើបស៊ីធីម៉ល ។ ពិធីប្រកាសក៏ដូចជាការផ្ដល់កាម៉េរានេះ បានធ្វើឡើងនៅជម្ឈមណ្ឌលជួសជុល និងថែទាំក្រុមហ៊ុនSony នៅតាមបណ្ដោយមហាវិថី ព្រះមុន្នីវង្ស ខាងលិចផ្សារធំថ្មី កាលពីព្រឹកថ្ងៃទី១៤ កក្កដា ២០១៤ ។
លោក Alexyee នាយកប្រតិបត្តិក្រុមហ៊ុនSony ប្រចាំប្រទេសកម្ពុជា បានមានប្រសាសន៍ថាជារៀងរាល់ឆ្នាំ ក្រុមហ៊ុនSony តែងតែមានគម្រោងគាំទ្រដល់សកម្មភាពសង្គមផ្សេងៗ ហើយនៅពេលនេះយើងក៏បានផ្ដល់កាម៉េរាថតរូប ចំនួន៥០ គ្រឿង និងកាម៉េរាសម្រាប់ថតវីដេអូចំនួន ១៩គ្រឿងសម្រាប់អោយសាធារណៈជនទូទៅ ដែលស្រលាញ់ការថតរូប និងមានគំនិតច្នៃប្រឌិតក្នុងការថតរូប អាចមានឱកាសខ្ចីកាម៉េរា ពីក្រុមហ៊ុនWestec Media សម្រាប់ការប្រើប្រាស់ក្នុងរយៈពេលមួយខ្លី។ មិនតែប៉ុណ្ណោះសិស្សនិស្សិតដែលកំពុងសិក្សាវិស័យសារព័ត៌មានក៏អាចមានឱកាសខ្ចីកាម៉េរា Sony ប្រើប្រាស់ និងអនុវត្តន៍ក្នុងមុខជំនាញ របស់ពួកគេបានផងដែរ។
អ្នកស្រី ឡៅ ផាន្នី អ្នកគ្រប់គ្រងផ្នែកប្រតិបត្តិការនៃក្រុមហ៊ុន Westec Media Limited បានមានប្រសាសន៍ដែរថា ចំពោះកាម៉េរាដែលក្រុមហ៊ុនSony បានផ្ដល់អោយនាពេលនេះ គឺសម្រាប់អោយសាធារណៈជនទូទៅខ្ចីប្រើប្រាស់ក្នុងការថតរូបរបស់ពួកគេ តែមុននឹងអនុញ្ញាតិអោយពួកគេខ្ចីបាន ពួកគេត្រូវមកបំពេញទំរង់បែបបទជាមុនសិន ថាតើពួកគេខ្ចីដើម្បីធ្វើអ្វី ។ យើងបង្កើតគម្រោងអោយខ្ចីកាម៉េរានេះ ក្នុងគោលបំណងដើម្បីអោយអ្នកខ្ចីនេះ មានគំនិតច្នៃប្រឌិតក្នុងការថតរូបអោយបានស្អាតនិងប្រកបដោយអត្ថន័យខ្ពស់ ។ គម្រោងនេះនឹងធ្វើអោយសាធារណៈជន មានឱកាសកាន់តែច្រើន សម្រាប់សិក្សាពីវិស័យថតរូប ជាពិសេសសិស្សនិស្សិតដែលកំពុងសិក្សាលើវិស័យនេះ មានឱកាស និងមានឧបករណ៍គ្រប់គ្រាន់ សម្រាប់អនុវត្តន៍ជាក់ស្ដែង ៕
