កាលពីថ្ងៃទី ១៣ ខែតុលា ឆ្នាំ២០១៤ ក្រុមហ៊ុន Huawei ដែលជាក្រុមហ៊ុនផ្តល់ដំណោះស្រាយផ្នែកព័ត៌មានវិទ្យានិងបច្ចេកវិទ្យាទូរគមនាគមន៍ (ICT) ដ៏ឈានមុខគេ និងជាក្រុមហ៊ុនទូរស័ព្ទស្មាតហ្វូនដ៏ធំលំដាប់លេខ៣លើពិភពលោក បានប្រគល់ទូរស័ព្ទស្មាតហ្វូន Ascend Mate 7 ស៊េរីទំនើប និងមិនទាន់មានលក់នៅកម្ពុជានាពេលបច្ចុប្បន្ននៅឡើយ រួមជាមួយទូរស័ព្ទ Ascend P7 ដ៏ទំនើបដល់កីឡាការិនី ស៊ន សៀវម៉ី ដើម្បីជារង្វាន់លើកទឹកចិត្តដល់កីឡាការិនីរូបនេះ និងទូរស័ព្ទ Ascend P7 ដូចគ្នានេះដល់ គ្រូបង្វឹក ដែលបានសាងប្រវត្តិសាស្ត្រថ្មីសម្រាប់ក្រុមកីឡាកម្ពុជា នៅមហាព្រឹត្តិការណ៍កីឡាអាស៊ី Asian Games 2014។
លោក អែម យុទ្ធូ នាយកជាន់ខ្ពស់ផ្នែកទីផ្សារ និងផ្សព្វផ្សាយក្រុមហ៊ុន Huawei បានបញ្ជាក់ថា ក្នុងនាមថ្នាក់ដឹកនាំនិងបុគ្គលិក ក្រុមហ៊ុនទាំងអស់ យើងសូមចូលរួមអបអរសាទរដល់ខេមរសហព័ន្ធកីឡាតេក្វាន់ដូ ជាពិសេសកីឡាការិនី ស៊ន សៀវម៉ី ផ្ទាល់ ចំពោះជោគជ័យដ៏ត្រចះត្រចង់ ដែលបានទទួលនូវមេដាយមាសក្នុងការប្រកួតកីឡាអាស៊ី Asian Games លើកទី១៧នៅទីក្រុង Inchon ប្រទេសកូរ៉េខាងត្បូង ដែលទើបតែនឹងបញ្ចប់ទៅថ្មីៗនេះ។ ការជួយឧបត្ថម្ភនេះ នឹងចូលរួមចំណែកក្នុងការជំរុញទឹកចិត្តដល់កីឡាករកម្ពុជាដទៃទៀត ឱ្យខិតខំប្រឹងប្រែង តស៊ូដោយខ្លួនឯង ដើម្បីសម្រេចឱ្យបាននូវក្តីសុបិនរបស់ខ្លួន ក៏ដូចជាមោទកភាពរបស់ប្រទេសជាតិទាំងមូល»។ លោកបានបន្តទៀតថា៖ «បុគ្គលិកក្រុមហ៊ុន Huawei ទាំងអស់ និងប្រជាជនកម្ពុជាទូទាំងប្រទេស សុទ្ធតែបានចូលរួមអបអរសាទរនឹងជ័យជម្នះនេះ។ នេះជាលទ្ធផលដ៏អស្ចារ្យមួយ ប៉ុន្តែសៀវម៉ីត្រូវខំប្រឹងបន្ថែមទៀត ដើម្បីទទួលបានលទ្ធផលដ៏ត្រចះត្រចង់ថែមទៀត នៅក្នុងព្រឹត្តិការណ៍ប្រកួតកីឡាអូឡាំពិកឆ្នាំ ២០១៦ នាពេលខាងមុខ»។
ឆ្លើយតបទៅនឹងការលើកទឹកចិត្តនេះ វីរនារីកម្ពុជា ស៊ន សៀវម៉ី ម្ចាស់មេដាយមាសទ្វីបអាស៊ី Asian Games 2014 ផ្នែកកីឡាតេក្វាន់ដូ WTF ទម្ងន់ក្រោម ៧៣ គីឡូក្រាម បានសម្តែងទឹកមុខរំភើបរីករាយ និង និយាយថា៖ «នាងខ្ញុំ សូមថ្លែងអំណរគុណយ៉ាងជ្រាលជ្រៅ ចំពោះក្រុមហ៊ុន Huawei ដែលបាន ប្រគល់រង្វាន់ទូរស័ព្ទ Ascend Mate 7 និង Ascend P7 ដល់រូបនាងខ្ញុំ ក៏ដូចជាការចូលរួមលើកទឹកចិត្ត និងជួយគាំទ្រយ៉ាងខ្លាំងពីសំណាក់បុគ្គលិក និងក្រុមការងាររបស់ក្រុមហ៊ុន Huawei ទាំងអស់»។ បន្ថែមពីលើនេះ សាមីខ្លួនបានប្តេជ្ញាចិត្តថា៖ «នាងខ្ញុំ នឹងបន្តខិតខំបន្ថែមទៀត សម្រាប់កិត្តិយសប្រទេសជាតិទាំងមូល និងជាការតបស្នងចំពោះការជួយឧបត្ថម្ភគាំទ្រនានាទាំងផ្នែករដ្ឋ និងឯកជន» ។
គួររម្លឹកថា កញ្ញា ស៊ន សៀវម៉ី បានបំបែកកំណត់ត្រាមិនឈ្នះមេដាយសោះ របស់ក្រុមកីឡាកម្ពុជាសម្រាប់រយៈពេល៤៤ឆ្នាំចុងក្រោយនេះ។ ចាប់តាំងពីឆ្នាំ១៩៧០មក ក្រុមកីឡាជម្រើសជាតិកម្ពុជាបានចូលរួមប្រកួតក្នុងព្រឹត្តិការណ៍កីឡាអាស៊ី Asian Games រហូតដល់ឆ្នាំ២០១០ កម្ពុជាមិនធ្លាប់ស្គាល់មេដាយណាមួយឡើយ។ ទើបតែឆ្នាំ២០១៤នេះ កីឡាការិនី ស៊ន សៀវម៉ី បានឈ្នះមេដាយ ហើយឈានដល់មេដាយមាសថែមទៀត។ ម្យ៉ាងទៀត ស៊ន សៀវម៉ី បានបង្កើតប្រវត្តិសាស្ត្រលើកដំបូង សម្រាប់ប្រទេសកម្ពុជាក្នុងការឈ្នះបានមេដាយមាស ចាប់តាំងការចូលរួមប្រកួតក្នុងព្រឹត្តិការណ៍កីឡាទ្វីបអាស៊ីធំនេះ រហូតដល់ឆ្នាំ២០១៤នេះ។ នេះជាលើកទីមួយហើយ ដែលប្រទេសកម្ពុជាឈ្នះបានមេដាយមាសជាប្រវត្តិសាស្ត្រ បើគិតចាប់ពីការរួមក្នុងព្រឹត្តិការណ៍កីឡាទ្វីបតាំងពីឆ្នាំ១៩៥៤ ដល់ឆ្នាំ២០១៤នេះ៕