កាលពីថ្ងៃទី១៩ ខែវិចិ្ឆកា ឆ្នាំ២០១៤ ក្រុមហ៊ុន អអឹមអេ ខេមបូឌា (RMA Cambodia) បានរៀបចំឡើងនូវសន្និសីទសារព័តមានស្តីពីដំណើរកំសាន្តបោះជំរុំ និង Adventure របស់អតិថិជន FORD ប្រចាំឆ្នាំ២០១៤។ ម្ចាស់រថយន្ត FORD គ្រប់រូប ដែលជាអតិថិជនរបស់ក្រុមហ៊ុន អអឹមអេ ខេមបូឌា នឹងកាន់តែសប្បាយរីករាយ ជាមួយ ដំណើរកម្សាន្ត ADVENTURE ឆ្លងដែន ដ៏អស្ចារ្យឆ្ពោះ ទៅកាន់ ខេត្តកោះកុង ប្រទេសកម្ពុជា ខេត្តត្រាត និងខេត្តចន្ទបុរី ប្រទេសថៃ នៅដើមខែធ្នូ ខាងមុខនេះ ជាមួយនឹងក្បួនដង្ហែ រថយន្ត Ford ចំនួនជាង៦០គ្រឿង។
លោក រ៉ាមី សារ៉ាហ្វ អគ្គនាយក គ្រប់គ្រងប្រចាំប្រទេស នៃក្រុមហ៊ុន អ អិម អេ ខេមបូឌា បានថ្លែងអំណរគុណយ៉ាងជ្រាលជ្រៅ ចំពោះរាល់បណ្តាក្រុមហ៊ុន ឧបត្ថម្ភទាំងអស់ ដែលបានជួយគាំទ្រ ដល់ដំណើរការនៃកម្មវិធីដំណើរកំសាន្តFORD Adventure ឆ្នាំ២០១៤ នេះ ។ លោករំពឹងថា ដំណើរកម្សាន្តឆ្នាំនេះ នឹងកាន់តែធ្វើឱ្យ អ្នកចូលរួម រីករាយ កាន់តែខ្លាំង ជាងឆ្នាំមុនៗថែមទៀត។
ដំណើរកំសាន្ត FORD Adventure ឆ្នាំ២០១៤នេះ រៀបចំ ដោយក្រុមហ៊ុន អអឹមអេ ខេមបូឌា (RMA Cambodia) នៅក្នុង ប្រទេសកម្ពុជា និងឧបត្តម្ភកម្មវិធី ដោយក្រុមហ៊ុន តូតាល់ ខេមបូឌា (TOTAL CAMBODGE) ដែលជាប្រេងឥន្ធនៈឈានមុខគេនៅកម្ពុជា និងក្រុមហ៊ុន ស្រាបៀរ អង្គរ CAMBREW LTD ហើយមានការចូលរួមសហការជាមួយ ក្រុមហ៊ុន EFG (Express Food Group) ដែលរួមមាន Pizza Company, Swensen’s, Costa Coffee, BBQ Chicken & Dairy Queen។ ក្នុងដំណើរកំសាន្តដ៏អស្ចារ្យនេះ មានរយៈពេល ៤ថ្ងៃ ៣យប់ គឺចាប់ពីថ្ងៃទី ១៨ ដល់ថ្ងៃទី ២១ ខែធ្នូ ឆ្នាំ២០១៤ ដោយមានអ្នកដំណើរប្រមាណ ៣០០នាក់ ហើយពួកគេនឹង រីករាយ ជាមួយទេសភាព ព្រៃភ្នំនៅតាមដងផ្លូវ និង ទឹកធ្លាក់ដ៏ស្រស់ស្អាត ក្នុងទឹកដីខេត្តកោះកុង រួមជាមួយនឹងបទពិសោធន៍ បោះជំរំដ៏រ៉ូមែនទិច នៅលើឆ្នេរសមុទ្រ យ៉ាងស្រស់ត្រកាល និងការចូលទស្សនា ចំការអង្កាំ យ៉ាងធំល្វឹងល្វើយ នៃខេត្តត្រាត ប្រទេសថៃ។ លើសពីនេះទៅទៀត អ្នកចូលរួមទាំងអស់នឹងមាន ឱកាសដើរទិញទំនិញ ជាច្រើនសំបូរបែបក្នុងតម្លៃសមរម្យក្នុងផ្សារទំនើបនៃទឹកដីខេត្តចន្ទបុរី ប្រទេសថៃថែមទៀតផង។
ដំណើរកម្សាន្តនេះ បានធ្វើឡើងជារៀងរាល់ឆ្នាំ ក្នុងនោះកាលពីឆ្នាំ២០០៧ ទៅខេត្តមណ្ឌលគិរី , ឆ្នាំ២០០៨ ទៅកាន់ខេត្តរតនគិរី , ឆ្នាំ២០០៩ ទៅកាន់ខេត្តប៉ៃលិន, ឆ្នាំ២០១០ និងឆ្នាំ២០១១ ទៅកាន់ទឹកដីខេត្តចម្ប៉ាសាក់ ប្រទេសឡាវ, ឆ្នាំ២០១២ ទៅកាន់ខេត្តមណ្ឌលគិរី ហើយឆ្នាំ២០១៣ក៏បានទៅទឹកដីប្រទេសឡាវម្តងទៀត ដោយមានចំនួនអ្នកចូលរួម កើនឡើង ជាបន្តបន្ទាប់ ។
លោក សេង វឹង នាយកគ្រប់គ្រងផ្នែករថយន្ត បានមានប្រសាសន៍ថា “ដំណើរកំសាន្ត FORD Adventure ឆ្នាំ២០១៤នេះ មានភាពអស្ចារ្យជាងឆ្នាំមុនៗ ដោយសារក្បួនរថយន្ត FORD ជាង៦០គ្រឿងធ្វើដំណើរឆ្លងកាត់ទឹកដីខេត្តកោះកុង ហើយឆ្ពោះទៅទឹកដីខេត្តត្រាត និង ខេត្តចន្ទបុរីប្រទេសថៃ ដែលធ្វើអោយអតិថជនFORD ទទួលបានបទពិសោធន៍ក្នុងការបើកបរ និងទស្សនាតំបន់ទេសចរណ៍នៅទឹកដីប្រទេសថៃផងដែរ។”លើសពីនេះទៅទៀត លោកក៏បានបន្ថែមទៀតថា ដំណើរកំសាន្ត FORD Adventure មិនត្រឹមតែជាការកំសាន្តសប្បាយប៉ុណ្ណោះទេ អ្វីដែលសំខាន់ជាងនេះទៅទៀតនោះ គឺការទំនាក់ទំនងគ្នាល្អ ការជួយគ្នាទៅវិញទៅមករបស់អតិជន FORD និងបុគ្គលិករបស់់ក្រុមហ៊ុន អអិមអេ ខេមបូឌា។