កាលពីថ្ងៃទី ២០ ខែវិច្ឆិកា ឆ្នាំ ២០១៤ ក្រុមហ៊ុន RMA Cambodia ដែលជាបុត្រសម្ព័ន្ធនៃក្រុមហ៊ុន RMA Group គឺជាក្រុមហ៊ុនមួយដែលជាដៃគូអភិវឌ្ឍន៍លើវិស័យនានាក្នុងប្រទេសកម្ពុជា ដែលផ្តល់នូវដំណោះស្រាយផ្នែកសេវាកម្មផ្សេងៗ ដូចជាវិស័យយានយន្ត វិស័យថាមពលអគ្គីសនី និងប្រព័ន្ធផ្គត់ផ្គង់ទឹកស្អាត វិស័យសំណង់ កសិកម្ម ចំណីអាហារ និង វិស័យហិរញ្ញវត្ថុជាដើម។
លោក ខេវីន វីតក្រាស (Kevin Whitcraft) អគ្គនាយកនៃក្រុមហ៊ុន RMA Group បានធ្វើការប្រកាសតែងតាំងលោក ងន សាំង ជាអគ្គនាយកប្រចាំប្រទេសកម្ពុជា ជំនួសលោក រ៉ាមីសារ៉ាហ្វ ដែលនឹងមានសុពលភាពចាប់ពីថ្ងៃទី១ ខែធ្នូនេះតទៅ។
លោក ងន សាំង បានចូលបំរើការងារនៅក្រុមហ៊ុន RMA ក្នុងឆ្នាំ ១៩៩៦ ក្នុងនាមជាបុគ្គលិកហាត់ការ ហើយរយៈកាលបន្តបន្ទាប់មកទៀត លោកបានវិឌ្ឍន៍ខ្លួនមកកាន់នូវតួនាទីសំខាន់ៗជាច្រើន នៅក្នុងក្រុមហ៊ុនក្នុងផ្នែក គណនេយ្យ និងហរិញ្ញវត្ថុ។ លោក ងន សាំង ត្រូវបានតែងតាំងជា អគ្គនាយករង និង នាយកផ្នែកហរិញ្ញវត្ថុក្នុងឆ្នាំ ២០០៧។ ក្នុងមុខតំណែងនេះ លោកបានដឹកនាំក្រុមហ៊ុនឲ្យមានកំនើនប្រាក់ចំណួលគួរឲ្យកត់សំគាល់ ព្រមទាំងដើរតួនាទីយ៉ាងសំខាន់ក្នុងការពង្រីកអាជីវកម្មក្នុងវស័យយានយន្ត និងថាមពលអគ្គីសនី ដើម្បីបំពេញនូវសេចក្តីត្រូវការរបស់អតិថិជនក្នុងប្រទេសកម្ពុជា។
លោក ងន សាំងបានបញ្ចប់ការសិក្សាថ្នាក់បរិញ្ញាប័ត្រ ផ្នែកវិទ្យាសាស្ត្រសេដ្ឋកិច្ច នៅសាកលវិទ្យាល័យ ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងសញ្ញាប័ត្រអនុបណ្ឌិតផ្នែកគ្រប់គ្រង អាជីវកម្ម ពីវិទ្យាស្ថានបច្ចេកវិទ្យាអាស៊ី (Asian Institute of Technology) ពីប្រទេសថៃ។ លើសពីនេះទៅទៀត លោកគឺជាជនជាតិខែ្មរទីមួយ ដែលបានទទួលការសិក្សាជំនាញ គ្រប់គ្រង អាជីវកម្ម ពីសាកលវិទ្យាល័យ ហាវើត ដ៏ល្បីល្បាញនៅសហរដ្ឋអាមេរិច (Harvard Business School General Management Program).
លោក ខេវីន វីតក្រាស (Kevin Whitcraft) អគ្គនាយកនៃក្រុមហ៊ុន RMA Group បានមានប្រសាសន៍ថា “ខ្ញុំមានសេចក្តីរីករាយខ្លាំង ណាស់ក្នុងការជ្រើសរើសជនជាតិខ្មែរ ក្នុងការដឹកនាំ អាជីវកម្មដ៏ធំរបស់យើងប្រចាំកម្ពុជា។ លោក ងន សាំង នឹងត្រូវទទួលខុសត្រូវក្នុងការគ្រប់គ្រង និងដឹកនាំក្រុមហ៊ុនរបស់យើងប្រចាំកម្ពុជា ដោយផ្តោតទៅលើវស័យយានយន្ត ហេដ្ឋារចនាសម្ព័ន្ធ សំណង់ កសិកម្ម ផលិតផលចំរុះ ផ្នែកសេវាកម្មហិរញ្ញវត្ថុ និងចំណីអាហារ។ ហើយយើងបានត្រៀមខ្លួនរួចជាស្រេចក្នុងការគាំទ្រលោក ដើម្បីបំពេញមុខនាទីនេះឲ្យបានល្អ ទៅកាន់អតិថិជន ដៃគូផ្គត់ផ្គង់ ក៏ដូចជាដៃគូអាជីវកម្មនានានៅប្រទេសកម្ពុជា។ សូមបញ្ជាក់ផងដែរថា លោក រ៉ាមី សារ៉ាហ្វ នឹងត្រូវបញ្ចប់តួនាទីរបស់ខ្លួនក្នុងអំឡុងពេលដ៏ខ្លីខាងមុខនេះ ដើម្បីបំពេញការងារថ្មីរបស់លោក។
ក្រុមហ៊ុន RMA Group មានទីស្នាក់ការកណ្តាលនៅទីក្រុងបាងកក ប្រទេសថៃ។ ក្រុមហ៊ុន RMA Group គឺជាក្រុមហ៊ុនអន្តរជាតិដែលមានបុគ្គលិកបំរើការជាង ៨០០០នាក់ ហើយមានការិយាល័យប្រត្តិការអាជីវកម្មរបស់ខ្លួនជាង២០ ប្រទេសនៅលើពិភពលោក។ ក្រុមហ៊ុន RMA ជាក្រុមហ៊ុនមួយដែលជាដៃគូអភិវឌ្ឍន៍លើវិស័យនានាក្នុងប្រទេសកម្ពុជា ដែលផ្តល់នូវដំណោះស្រាយផ្នែកសេវាកម្មផ្សេងៗ ដូចជាវិស័យយានយន្ត វិស័យថាមពលអគ្គីសនី និងប្រព័ន្ធផ្គត់ផ្គង់ទឹកស្អាត វិស័យសំណង់ កសិកម្ម វិស័យចំណីអាហារ វិស័យហិរញ្ញវត្ថុ និងបដិសណ្ឋារកិច្ច សំរាប់អតិថិជននៅក្នុងទីផ្សារនៃបណ្តាប្រទេសកំពុងអភិវឌ្ឍន៍ តាមរយៈការអភិវឌ្ឍន៍ និងបង្កើតចំនែកទីផ្សារ។
អស់រយកាលជាង៣០ឆ្នាំមកហើយ ដែលក្រុមហ៊ុន RMA បានផ្តល់នូវសេវាកម្មជាច្រើន សំរាប់បណ្តាលប្រទេសកំពុងអភិវឌ្ឍន៍នានាទាំងនេះ តាមរយៈការរក្សាខ្ជាប់នូវ គំនិតច្នៃប្រឌិត សុចរិតភាព និងឆន្ទៈដៃគូសហប្រតិបត្តិការដ៏រឹងមាំ ដើម្បីបំពេញនូវតំរូវការអតិថិជននានានៅលើពិភពលោក។