ក្រោយចំណាយពេលអស់ប្រមាណជិត២ខែដែល ក្រុមហ៊ុន Sabay និង Smart បានបំពេញបេសកម្មស្វែងរកជើងខ្លាំងប្រចាំខេត្តក្រុងដើម្បីមកចូលរួមប្រកួតបន្តនៅទីក្រុងភ្នំពេញ ទីបំផុតកម្មវិធី Cambodia Cyber Championship 2014 វគ្គផ្តាច់ព្រ័ត្រដែលប្រព្រឹត្តទៅកាលពីថ្ងៃទី ២២-២៣ ខែវិច្ឆិកានៅសាលមហោស្រពចេនឡា បានរកឃើញជើងខ្លាំងដែលមានសមត្ថភាពខ្លាំងបំផុតក្នុងការបំបាក់ សត្រូវជាហូរហែតាំងពីព្រឹត្តិការណ៍ប្រកួតជម្រុះដំបូង រហូតមកដល់ជុំផ្ដាច់ព្រ័ត្រប្រចាំប្រទេសកម្ពុជា។
CCC 2014 បានបង្កភាពភ្ញាក់ផ្អើលដល់ទស្សនិកជន រួមទាំងអ្នកប្រកួតយ៉ាងខ្លាំង ដោយទទួលបានការចុះឈ្មោះប្រកួតពីក្រុមយុវវ័យសម័យបច្ចេកវិទ្យាកីឡា អេឡិចត្រូនិក E-Sports យ៉ាងច្រើនរហូតដល់ទៅចំនួន ១២០ ក្រុម សមាជិកសរុបចំនួន ៦០០ នាក់។ ឆ្លងកាត់ការប្រកួតប្រជែងដ៏តានតឹង រវាងជើងខ្លាំង ១៦ក្រុម ខាងក្រោមនេះគឺជាឈ្មោះក្រុមជយលាភីប្រចាំប្រទេសកម្ពុជាក្នុងឆ្នាំ ២០១៤ ក៏ដូចជារង្វាន់ដែលម្ចាស់ជយលាភីនីមួយៗទទួលបាន ៖
សេវាកម្សាន្ត Age Of Naga៖
@ក្រុមលេខ១ ( ក្រុម You Know The LOser ) ៖ ទទួលបានពានរង្វាន់កិត្តិយសចំនួន ១, មេដាយកិត្តិយស៥,ទឹកប្រាក់ ២.០០០ ដុល្លារអាមេរិក, រួមទាំង ៤ ម៉ឺន Sabay Gold ។
@ក្រុមលេខ២ ( ក្រុម Zu Miz168) ៖ ទទួលបានមេដាយកិត្តិយស៥,ទឹកប្រាក់ ១.០០០ដុល្លារអាមេរិក, រួមទាំង ៤ ម៉ឺន Sabay Gold ។
@ក្រុមលេខ៣ ( ក្រុម No future476) ៖ ទទួលបានមេដាយកិត្តិយស ៥, និង ២ ម៉ឺន Sabay Gold ។
សេវាកម្សាន្ត AK Online៖
@ក្រុមលេខ១ ( ក្រុម Secret) ៖ ទទួលបានពានរង្វាន់កិត្តិយស ១, មេដាយកិត្តិយស ៥, ទឹកប្រាក់ ២.០០០ ដុល្លារអាមេរិក, រួមទាំង ៤ ម៉ឺន Sabay Gold ។
@ក្រុមលេខ២ ( ក្រុម Never Care) ៖ ទទួលបានទឹកប្រាក់ ១.០០០ ដុល្លារអាមេរិក, និង ៤ ម៉ឺន Sabay Gold ។
@ក្រុមលេខ៣ ( ក្រុម Deng Srab Hai ) ៖ទទួលបានមេដាយកិត្តិយស ៥ ,និង ២ ម៉ឺន Sabay Gold ។
សម្រាប់ម្ចាស់ជយលាភីសេវាកម្សាន្ត AK Online ក្រុម Secret និងក្រុម Never Care នឹងត្រូវធ្វើជាជើងខ្លាំងសេវាកម្សាន្ត Ak Online តំណាងឲ្យប្រទេសកម្ពុជាក្នុងការចូលរួមប្រកួតស្វែងរកជើងខ្លាំងកីឡា អេឡិចត្រូនិក E-Sports អន្តរជាតិ MATIC 2015 ជាមួយ ៦ ប្រទេសផ្សេងទៀតរួមមាន សិង្ហបុរី ម៉ាឡេស៊ី ថៃ តៃវ៉ាន់ ឥណ្ឌូណេស៊ី និងប្រទេសចិន ដែលជាម្ចាស់ផ្ទះរៀបចំការប្រកួតឆ្នាំនេះ។
មិនមែនមានតែការប្រកួតប៉ុណ្ណោះទេ ប៉ុន្តែតារាស្រីល្បីឈ្មោះជួរមុខ ២ដួង កញ្ញា ឱក សុគន្ធកញ្ញា និង យូរី ក៏មកសម្ដែងផ្ទាល់នាឱកាសនោះដែរ។ លើសពីនេះទៅទៀតទស្សនិកជនដែលចូលរួមកម្មវិធីនេះ ក៏បានឈ្នះរង្វាន់ជាច្រើន ដូចជា៖ ទូរសព្ទ Samsung Galaxy S5 ១គ្រឿង, កាសម៉ាក SkullCandy 4 រង្វាន់, នាឡិកាដៃម៉ាក Guess ៥ រង្វាន់, Power Bank ៥ រង្វាន់ និងកាតបញ្ចូលទឹកប្រាក់ Smart ១០ ដុល្លារ ១០ រង្វាន់។
រំលឹកថាកាលពីថ្ងៃទី៣០ ខែតុលា ឆ្នាំ២០១៤ កន្លងទៅ ដើម្បីឆ្លើយតបទៅនឹងការវិវឌ្ឍន៍ឥតឈប់ឈររបស់កីឡាអេឡិចត្រូនិក អនឡាញ« សហព័ន្ធកីឡាអេឡិចត្រូនិកកម្ពុជា (E-Sports Federation Cambodia) ឬហៅកាត់ថា «EFC» ត្រូវបានបង្កើតឡើងជាផ្លូវការស្របតាមគោលនយោបាយកីឡាជាតិ និងគោលការណ៍កីឡា E-Sports អន្តរជាតិ ក្រោមអធិបតីភាព ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជានៅទីស្ដីការ គណៈកម្មាធិការជាតិអូឡាំពិកកម្ពុជា។ ក្នុងនោះសេវាកម្សាន្តអនឡាញ AK Online និងAge of Naga ក៏ជាប្រភេទកីឡា ក្នុងវិញ្ញាសាកីឡាអេឡិចត្រូនិក (E-Sports) របស់EFC ដែរ៕
