កាលពីថ្ងៃទី ១៥ ខែ កញ្ញា ឆ្នាំ ២០១៤៖ ក្រុមហ៊ុន អាយគ្លីក (i-Qlick) ដែលជាតំនាងចែកចាយផលិតផលសុទ្ធម៉ាក Canon ប្រចាំកម្ពុជាបានធ្វើការប្រកាសជាផ្លូវការ ពីកម្មវិធីប្រកួតថតរូបកាណុង ហ្វូតូម៉ារ៉ាតុង ប្រចាំកម្ពុជាឆ្នាំ២១០៤ (Canon PhotoMarathon Cambodia 2014) ដែលនឹងរៀបចំនៅមជ្ឈមណ្ឌលកោះពេជ្រ អគារ ជី (G) រាជធានីភ្នំពេញ នាថ្ងៃអាទិត្យ ទី ១៩ ខែ តុលា ឆ្នាំ ២០១៤ ចាប់ពីម៉ោង ៧ព្រឹក ដល់ម៉ោង ៩យប់។ នេះជាឆ្នាំទី ៤ ហើយដែល PhotoMarathon ត្រូវបានរៀបចំនៅកម្ពុជា ហើយឆ្នាំនេះពិតជាកាន់តែពិសេស ជាមួយកម្មវិធីប្រកួតថ្មី ជាងឆ្នាំមុន និង អាចមានអ្នកចូលរួមប្រកួតជាង ១០០០អ្នក។
ដោយយោងតាមល័ក្ខខ័ណ្ឌនៃការប្រកួតពីកម្មវិធី Canon PhotoMarathon ទូទាំងទ្វីបអាស៊ី អ្នកចូលរួមប្រកួត ទាំងអស់នឹងត្រូវផ្តល់ជូននូវ ប្រធានបទសំរាប់ការប្រកួត បន្ទាប់មកពួកគេនឹងបញ្ចេញស្នាដៃថតរូប ប្រកបដោយ ភាពប៉ិនប្រសប់ច្នៃប្រឌិតខ្ពស់ ដើម្បីថតរូបល្អបំផុតពាក់ព័ន្ធនឹងប្រធានបទ និង ត្រលប់មកប្រគល់រូប នោះមុន ម៉ោងកំណត់។
បន្ថែមពីលើល័ក្ខខ័ណ្ឌប្រកួតសំរាប់អ្នកចូលរួមទូទៅ (Open Category) ឆ្នាំនេះកម្មវិធី Canon PhotoMarathon Cambodia នឹងអនុញ្ញាតិអោយមានល័ក្ខខ័ណ្ឌប្រកួតសំរាប់សិស្សសាលា (Student Category) ដើម្បីផ្តល់ឱកាសដល់យុវជន ក្រោម អាយុ១៨ ឆ្នាំ អាចចូលរួមការប្រកួត ហើយនេះក៏ជាផ្នែកមួយនៃសកម្មភាពរបស់ Canon ក្នុងការលើកទឹកចិត្ត អោយយុវជនវ័យក្មេងកម្ពុជាអភិវឌ្ឍនូវចំនង់ចំណូលចិត្តរបស់ពួកគេក្នុងវិស័យថតរូបផងដែរ។
អ្នកចូលរួមក្រោមល័ក្ខខ័ណ្ឌប្រកួតសំរាប់សិស្សសាលា ត្រូវគោរពតាមល័ក្ខខន្តិកៈនានា ព្រមទាំងប្រកួតក្រោម ប្រធានបទ ដូចទៅនឹង ល័ក្ខខ័ណ្ឌប្រកួតសំរាប់អ្នកចូលរួមទូទៅផងដែរ ប៉ុន្តែអ្នកចូលរួមក្នុងល័ក្ខខណ្ឌនេះ នឹងទទួលរង្វាន់ ខុសពីល័ក្ខខណ្ឌប្រកួតសំរាប់អ្នកចូលរួមទូទៅ។
កញ្ញា លីវិន តាន់ នាយកគ្រប់គ្រងផ្នែកទីផ្សារក្នុងតំបន់ ក្រុមហ៊ុន អាយគ្លីក បានមានចំណាប់អារម្មណ៍ថា៖ ការប្រកួតឆ្នាំនេះ ពិតជាប្លែក អស្ចារ្យ! អ្នកឈ្នះមួយរូបក្នុងចំនោមអ្នកឈ្នះទាំង ៩ រូបពី Open Category នឹងត្រូវបានជ្រើសអោយចូលរួមក្នុងដំណើរកំសាន្តថតរូប ជាមួយអ្នកឈ្នះដទៃទៀតក្នុងតំបន់ នៅប្រទេស ជប៉ុន
ដឹកនាំដោយអ្នកថតរូបអាជីពល្បីៗ ក្នុងសកម្មភាពពង្រឹងសមត្ថភាពថតរូបរបស់ពួកគេ អោយឈានឡើងដល់កំរិត អន្តរជាតិ។ រាល់ការចំនាយទាំងអស់ត្រូវបានរ៉ាប់រងដោយក្រុមហ៊ុន។
Canon PhotoMarathon ត្រូវបានផ្តួចផ្តើមឡើងចេញពីក្រុមហ៊ុន Canon ប្រទេសសិង្ហបូរី ដែលជាកម្មវិធីប្រកួត ថតរូបធំមួយ ហើយបានប្រមូលផ្តុំអ្នកថតរូបពីគ្រប់ទិសទី ចូលរួមប្រកួតថតរូបពេញមួយថ្ងៃ។ អស់រយៈពេលជាង ១២ ឆ្នាំ ដោយគិតចាប់ពីឆ្នាំ ២០០២ មក កម្មវិធីប្រកួតថតរូប Canon PhotoMarathon អាស៊ី អាស៊ីខាងត្បូង និង អាស៊ីអាគ្នេយ៍ ត្រូវបានរៀបចំនៅ ប្រទេស សិង្ហបូរី ម៉ាឡេស៊ី ថៃ ឥណ្ឌា វៀតណាម ឥណ្ឌូនេស៊ី ព្រុយណេ និង ព្រះរាជាណាចក្រកម្ពុជា ដែលជាសមាជិកចុងក្រោយ។
កម្មវិធី Canon Photo Marathon Asia 2014 នឹងមានសភាពកាន់តែធំ ចាប់តាំងពីការចាប់ផ្តើមនាឆ្នាំដំបូង ហើយកាលពីឆ្នាំ ២០១៣ គេសង្កេតឃើញមានអ្នកចូលរួមជាង ១៤០០០ នាក់ ក្នុងចំនោមប្រទេសទាំង ៦។ ហើយឆ្នាំនេះ យើងជឿជាក់ថាចំនួនអ្នកចូលរួមសរុប នឹងកើនឡើងជាងឆ្នាំមុនដោយសារ មានការចូលរួមពីប្រទេស ជាច្រើនទៀត។
Canon PhotoMarathon Cambodia 2014 ត្រូវបានរៀបចំដោយក្រុមហ៊ុន អាយគ្លីក (i-Qlick) និងគាំទ្រយ៉ាងពេញ ទំហឹងដោយ Canon ជាមួយក្រុមហ៊ុន SMART ។ ដៃគូសហការឧបត្ថម្ភផ្សេងទៀត រួមមាន សាលាអន្តរជាតិ រ៉ាហ្វល (Raffles International College), រោងភាពយន្ត ផ្លាទីនៀម ស៊ីណេផ្លិក (Platinum Cineplex) , ក្រុមហ៊ុន ខេម ឡៅ (CamLau), ខេអេហ្វស៊ី (KFC), កូកាកូឡា (CocaCola), ឆាតថែម (Chat Time), ណេសកាហ្វេ (Nescafe) និង អង្គរហ្វូតូហេ្វសធីវល (Angkor Photo Festival)។ ពិសេស កាសែតភ្នំពេញប៉ុស្តិ៍ ក៏បានចូលរួមជាដៃគូ ផ្នែកសារព័ត៌មានផ្លូវការ សំរាប់ការផ្សព្វផ្សាយតាមសារព័ត៌មានកាសែត និង ក្រុមហ៊ុន សប្បាយ (SABAY) ជាដៃគូផ្នែកសារព័ត៌មានផ្លូវការ សំរាប់ការចុះផ្សាយព័ត៌មានតាមរយៈគេហទំព័រ។
