ក្រុមហ៊ុន Huawei ដែលជាដៃគូយុទ្ធសាស្ត្រដ៏សំខាន់ក្នុងការអភិវឌ្ឍវិស័យព័ត៌មានវិទ្យារបស់កម្ពុជា បានដើរតួជាអ្នកឧបត្ថម្ភធំនៅក្នុងពិព័រណ៍បច្ចេកវិទ្យាអេឡិចត្រូនិក និងទូរគមនាគមន៍អន្តរជាតិ ឆ្នាំ ២០១៤ (ITET 2014)។ សហព័ន្ធបច្ចេកវិទ្យាកម្ពុជា(ICTF) បានរៀបចំព្រឹត្ដិការណ៍អន្ដរជាតិដ៏ធំមួយនេះឡើងកាលពីម្សិលមិញ នៅមជ្ឈមណ្ឌលសន្និបាទ និងពិព័រណ៍កោះពេជ្រ។ ពិព័រណ៍នេះបង្កើតឡើងក្នុងគោលបំណងលើកកម្ពស់វិស័យICTនៅកម្ពុជា និងផលិតផលបច្ចេកវិទ្យាទំនើបៗ ដែលនឹងជួយឱ្យប្រជាជនកម្ពុជាអាចភ្ជាប់ទំនាក់ទំនងជាមួយពិភពលោកបានកាន់តែងាយស្រួល។
បើយោងតាមលោក Cary Yang នាយកប្រតិបត្តិនៃក្រុមហ៊ុន Huawei ប្រចាំនៅកម្ពុជា ការឧបត្ថម្ភចំពោះពិព័រណ៍ ITET 2014 នេះ គឺជាផ្នែកមួយនៃការបន្តកិច្ចខិតខំប្រឹងប្រែងរបស់ក្រុមហ៊ុន ដើម្បីគាំទ្រដល់វិស័យឧស្សាហកម្មបច្ចេកវិទ្យាព័ត៌មាននៅក្នុងប្រទេសកម្ពុជា។ លោកបានលើកឡើងថា ដោយបានធ្វើប្រតិបត្តិការនៅក្នុងប្រទេសកម្ពុជា អស់រយៈពេល១៥ឆ្នាំមកហើយនោះ ក្រុមហ៊ុន Huawei តែងតែគាំទ្រដល់ការអភិវឌ្ឍរបស់ប្រទេសនេះជានិច្ច។ យើងបានបង្កើនការសហការ្យ៉ាងទូលំទូលាយជាមួយក្រុមហ៊ុនទូរគមនាគមន៍ និងឧស្សាហកម្មធំៗ បណ្តុះបណ្តាលអ្នកជំនាញបច្ចេកទេសសម្រាប់សហគមន៍មូលដ្ឋានជាង ១.០០០ នាក់ ហើយបច្ចុប្បន្ន មានបុគ្គ លិកក្នុងប្រទេសបម្រើការជិត ២០០ នាក់។ យើងក៏បានចូលរួមសកម្មភាពក្នុងការអភិវឌ្ឍសេដ្ឋកិច្ចសង្គមក្នុងប្រទេស បរិច្ចាគថវិកា និងឧបករណ៍ផ្សេងៗ ដែលមានតម្លៃសរុបជាង៥លានដុល្លារអាមេរិក ដើម្បីជួយដល់ភាពភាពក្រីក្រក្នុងប្រទេស ការអប់រំនៅតាមជនបទ និងការអភិវឌ្ឍលើវិស័យព័ត៌មានវិទ្យា។
លើសពីនេះទៅទៀតយើង បានក្លាយទៅជាអ្នកផ្តល់យុទ្ធសាស្ត្រ ក៏ដូចជាដៃគូផ្តល់ ចំណេះដឹងមួយដល់ប្រទេសកម្ពុជា នៅក្នុងលក្ខខណ្ឌនៃការធ្វើឱ្យទំនាក់ទំនងរបស់សាធារណជនទូទៅ ដំណើរការងាយស្រួល រួមទាំងការអភិវឌ្ឍសង្គមព័ត៌មានវិទ្យានាពេលអនាគត។ ពិព័រណ៍បច្ចេកវិទ្យាអេឡិចត្រូនិក និងទូរគមនាគមន៍នេះ គឺជាវេទិកាដ៏សំខាន់ សម្រាប់ការចែករំលែកចំណេះដឹងពី អ្នកជំនាញក្នុង វិស័យព័ត៌មានវិទ្យា និងទូរគមនាគមន៍ (ICT)។ យើងមានមោទនភាពក្នុងនាមជាអ្នកឧបត្ថម្ភធំក្នុងការបង្កើតព្រឹត្តិការណ៍នេះឡើង រួមទាំងការបង្កើតគំនិតច្នៃប្រឌិតនានា ដើម្បីដំណើរការវិស័យ ICT ដល់សាធារណជនទូទៅ។
ការតាំងពិព័រណ៍នេះ មានអ្នកជំនាញជាច្រើនទាំងវិស័យឯកជន និងសាធារណៈដោយមានរបៀប វារៈផ្តោតលើហេដ្ឋារចនាសម្ព័ន្ធ ICT ឧបករណ៍ប្រព័ន្ធឌីជីថល ការធ្វើអាជីវកម្មនៅតាមប្រព័ន្ធអ៊ីនធើណេត ការប្រើប្រាស់អ៊ីនធើណេតប្រកបដោយសុវត្ថិភាព និងការ ច្នៃប្រឌិត។ ទន្ទឹមនឹងនេះព្រឹត្តិការណ៍ដែលប្រារព្ធធ្វើក្នុងរយៈពេលបីថ្ងៃនេះ ក៏មានគោលបំណងអំពាវនាវ ដល់អ្នកជំនាញវិស័យ ICT មកចែករំលែកមតិយោបល់ និងគំនិតរបស់ពួកគេដល់សង្គមកម្ពុជា ក៏ដូចជាសាធារណជនទូទៅដែលនឹងអាចយល់ដឹងពីសារៈសំខាន់ នៃវិស័យ ICT។
នៅក្នុងពិធីបើកសម្ពោធព្រឹត្តិការណ៍ដ៏មានសារប្រយោជន៍នេះ ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ កម្ពុជា បានមានប្រសាសន៍ថា៖ «យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះ ក្រុមហ៊ុន Huawei ដែលបានរួមចំណែកក្នុងនាមជាដៃគូយុទ្ធសាស្ត្រសម្រាប់ការអភិវឌ្ឍលើវិស័យព័ត៌មានវិទ្យារបស់កម្ពុជា។ យើងពិតជាពេញចិត្ត ចំពោះអ្វីដែលក្រុមហ៊ុន Huawei បានធ្វើសម្រាប់ប្រទេសកម្ពុជា ហើយយើងទន្ទឹងរង់ចាំចំពោះកិច្ចខិតខំប្រឹងប្រែងរបស់ក្រុមហ៊ុន ក្នុងការពង្រីកបច្ចេកវិទ្យាទូរគមនា គមន៍ថ្មីចុងក្រោយបំផុតរបស់ខ្លួន ទន្ទឹមនឹងការចូលរួមនៅក្នុងការអភិវឌ្ឍវិស័យព័ត៌មានវិទ្យានៅកម្ពុជា។ ដោយមានការសហការជាមួយ ក្រសួងប្រៃសណីយ៍ និងទូរគមនាគមន៍ (MPTC) ព្រឹត្តិការណ៍ដ៏ធំ មួយនេះ នឹងដំណើរការរហូតដល់ថ្ងៃទី ១៦ ខែវិច្ឆិកា ហើយ នឹងមានការដាក់បង្ហាញ បច្ចេកវិទ្យាទូរគមនាគមន៍ចុងក្រោយបំផុត ដំណោះស្រាយបណ្តាញអ៊ីនធើណេតឥតខ្សែ ទូរស័ព្ទស្មាតហ្វូន និងឧបករណ៍ឌីជីថលទំនើបៗជាច្រើនទៀត៕
