ក្រុមហ៊ុន Champagne Communications ដែលជាក្រុមហ៊ុនផ្សព្វផ្សាយពាណិជ្ជកម្មបាន និងកំពុងរីកចម្រើនយ៉ាង ឆាប់រហ័សនោះ ថ្មីៗនេះ បានឈ្នះពានរង្វាន់មេដាយមាសជាលើកដំបូង ក៏ដូចជាមេដាយប្រាក់ពីរបន្ថែមទៀត សម្រាប់រង្វាន់ច្នៃប្រឌិតល្អបំផុតប្រចាំឆ្នាំ ដែលបានប្រារព្ធធ្វើនៅក្នុងកម្មវិធីប្រគល់ពានរង្វាន់ Communicator Awards ប្រចាំឆ្នាំ លើកទី 21 នៅសហរដ្ឋអាមេរិក។ ការទទួលស្គាល់ប្រកបដោយកិត្យានុភាពនេះ រួមមាន ពានរង្វាន់ឆ្នើម(មាស) សម្រាប់ការផ្សព្វផ្សាយអំពីការសន្សំប្រាក់ តក់ៗពេញបំពង់ របស់ធនាគារ ABA ឆ្នាំ 2014 ពានរង្វាន់កិត្តិយស (ប្រាក់) សម្រាប់ការផ្សព្វផ្សាយអំពីកម្ចីប្រាក់ Farm របស់ធនាគារ ABA និងពានរង្វាន់កិត្តិយស (ប្រាក់) មួយទៀត សម្រាប់ការផ្សព្វផ្សាយពាណិជ្ជកម្មទូរទស្សន៍ Alphabet របស់ផលិតផលអំពូលសូឡា Total Awango ។
លោក អ៊ុង ដានិត នាយកគ្រប់គ្រងក្រុមហ៊ុន បានឱ្យដឹងថា ជោគជ័យលើកនេះគឺជាសញ្ញាវិជ្ជមានមួយ ដែលបង្ហាញនូវកម្លាំងចលករ ប្រកបដោយឧត្តមភាពរបស់ក្រុមហ៊ុនផ្សព្វផ្សាយដ៏ថ្មីសន្លាងមួយនេះ ដ្បិតក្រុមហ៊ុនទើបតែចាប់ផ្តើមប្រតិបត្តិការរបស់ខ្លួននៅក្នុងឆ្នាំ 2012។ លោកបានបន្ថែមទៀតថា តាំងពីចាប់ផ្តើមដំបូង យើងតែងតែនាំយកនូវមោទនភាពប្រកបដោយកិត្យានុភាពដ៏ធំធេង មកបំពេញមហិច្ឆតារបស់ក្រុមការងារដើម្បីបង្កើតនូវគំនិតច្នៃប្រឌិតថ្មី ខុសប្លែកពីគេ មានលក្ខណៈជាតិ និងទទួលបានការចាប់អារម្មណ៍ខ្ពស់។ ការទទួលស្គាល់ពីពានរង្វាន់ទំនាក់ទំនងល្អបំផុតប្រចាំឆ្នាំ ក៏ដូចជាការជាប់ឈ្មោះក្នុងបញ្ជីក្រុមហ៊ុនផ្សព្វផ្សាយល្អបំផុតប្រចាំឆ្នាំ របស់ទីភ្នាក់ងារ Campaign Asia-Pacific ជាសក្ខីភាពបញ្ជាក់ថា យើងគឺជាក្រុមហ៊ុនផ្សព្វផ្សាយដ៏មានឥទ្ធិពលមួយ ក្នុងចំណោមក្រុមហ៊ុនផ្សព្វផ្សាយដទៃទៀត ដែលក្រុមហ៊ុនអតិថិជននានាមិនគួរមើលរំលង»។
ពានរង្វាន់ទំនាក់ទំនងល្អបំផុតប្រចាំឆ្នាំ (The Communicator Awards) គឺជាកម្មវិធីប្រគល់ពានរង្វាន់អន្តរជាតិដ៏ឈានមុខគេមួយ ដែលទទួលស្គាល់នូវគំនិតច្នៃប្រឌិតខ្ពស់ក្នុងផ្នែកទីផ្សារ និងទំនាក់ទំនង។ ពានរង្វាន់នេះ ផ្តោតសំខាន់លើកិត្យានុភាព និងឧត្តមភាពការងារ ដែលពោរពេញដោយការច្នៃប្រឌិតខ្ពស់ និងភាពប៉ិនប្រសប់ក្នុងវិជ្ជាជីវៈ ដែលមានឥទ្ធិពលយូរអង្វែង ហើយផ្តល់នូវឱកាសឈ្នះស្មើៗគ្នា ដល់ក្រុមហ៊ុនចូលរួមទាំងអស់ ដោយមិនគិតពីវិសាលភាពរបស់ក្រុមហ៊ុន និងថវិការបស់គម្រោងនីមួយៗ។ ពានរង្វាន់ទំនាក់ទំនងនេះ បង្កើតឡើងក្នុងឆ្នាំ1995 ដោយទទួលបានការចូលរួមពីបណ្តាក្រុមហ៊ុន និងទីភ្នាក់ងារនានាទូទាំងពិភពលោកទាំងតូចទាំងធំជាង 6000 ក្រុមហ៊ុន ដែលធ្វើឱ្យពានរង្វាន់នេះ ក្លាយជាពានរង្វាន់ដ៏ធំបំផុតមួយ នៅក្នុងពិភពលោក។ សូមបញ្ជាក់ថា ក្រុមហ៊ុន Champagne បានទទួលពានរង្វាន់មាសនេះ ក្នុងចំណោម ក្រុមហ៊ុនផ្សព្វផ្សាយពាណិជ្ជកម្មធំៗដទៃទៀត មកពី សហរដ្ឋអាមេរិក អង់គ្លេស និងអាល្លឺម៉ង់។
លោក អ៊ុង ដានិត បានឱ្យដឹងទៀតថា សម្រាប់ក្រុមហ៊ុនផ្សព្វផ្សាយពាណិជ្ជកម្មរបស់កម្ពុជាដ៏តូចមួយនេះ ត្រូវបានទទួលស្គាល់ក្នុងចំណោមក្រុមហ៊ុនផ្សព្វផ្សាយពាណិជ្ជកម្មធំៗមកពីទីក្រុងញូវយ៉ក ទីក្រុងឡុងដ៍ និងទីក្រុង Hamburg គឺជាមហាកិត្តិយសដ៏អស្ចារ្យ និងជាសញ្ញាមួយបញ្ជាក់ថា ការងារប្រកបដោយគំនិតច្នៃប្រឌិត របស់យើង បានលេចមុខមាត់នៅទីនោះ ជាមួយការបង្កើតថ្មីដ៏ល្អឥតខ្ចោះនៅក្នុងពិភពលោក»។
ចាប់តាំងពីចាប់ផ្តើមប្រតិបត្តិការនៅឆ្នាំ 2012 ក្រុមហ៊ុន Champagne បានរីកចម្រើននៅក្រោមលក្ខខណ្ឌរបស់ អតិថិជន និងបុគ្គលិក ដែលបានអភិវឌ្ឍ និងរីកចម្រើនយ៉ាងឆាប់រហ័ស។ ជាការកត់សម្គាល់ ក្រុមហ៊ុនបានចុះកិច្ច សន្យាការងាររយៈពេលមួយឆ្នាំ ជាមួយក្រុមហ៊ុនស្រាបៀរ Ganzberg ។ ចំណែកក្រុមហ៊ុនដែលមានទំនាក់ទំនងការងារនិងសហប្រតិបត្តិការយូរអង្វែងជាមួយគ្នា មានដូចជា ធនាគារ ហុង លីអុង ក្រុមហ៊ុន Huawei មន្ទីរពេទ្យ បំរុងរ៉ាត់ ក្រុមហ៊ុនតូយ៉ូតា ក្រុមហ៊ុន DKSH និងក្រុមហ៊ុន Abbott ជាដើម៕
