កាលពីថ្ងៃទី 27 ខែ មិថុនា ឆ្នាំ 2015 ក្រុមហ៊ុន LG Electronics និង ក្រុមហ៊ុន G Gear ដែលជាក្រុមហ៊ុនដៃគូរយុទ្ធសាស្ត្រតែមួយគត់នៅក្នុងប្រទេសកម្ពុជា បានរៀបចំកម្មវិធីជួបជុំអ្នកតំណាងចែកចាយលក់ផលិតផល LG នៅទូទាំងប្រទេសកម្ពុជា (LG VIP Night) ដែលជាកម្មវិធីដ៏ធំមួយរបស់ ក្រុមហ៊ុន LG Electronics ក្នុងប្រទេសកម្ពុជាដើម្បីបង្ហាញពីផលិតផលថ្មីៗសំរាប់ឆ្នាំ 2015-2016 ទាំងអស់របស់ខ្លួន ដែលមានដូចជា ទូរស័ព្ទដៃ ទូរទស្សន៍ ម៉ាស៊ីនបោកគក់ ម៉ាស៊ីនត្រជាក់ ទូរទឹកកក ផលិតផលសំរាប់អាជីវកម្មធំៗ ដូចជា ទូរទស្សន៍សំរាប់សណ្ឋាគារ (Hotel TV) និង ប្រព័ន្ធម៉ាស៊ីនត្រជាក់ Multi V IV ។
ផលិតផលស្នូល ក្នុងការដាក់តាំងពិពរណ៍នៅ LG VIP Night របស់ ក្រុមហ៊ុន LG Electronics គឺទូរទស្សន៍ UHD អេក្រង់ 98 អ៊ីង ដែលមិនធ្លាប់មាននៅក្នុងប្រទេសកម្ពុជា, 84 អ៊ីង, 65 អ៊ីង និង OLED TV ដែលមានទាំងអេក្រង់កោង និងត្រង់ ដែលល្អផ្តាច់គេ ស្តើងជាងគេ ផ្តល់នូវបទពិសោធន៍សំរាប់ការទស្សនាដ៏អស្ចារ្យ និងល្អឥតខ្ចោះ។ អ្នកចូលរួមទាំងអស់នៅក្នុងកម្មវិធីនេះ គឺទទួលបានការណែនាំទូរទស្សន៍ស៊េរីថ្មីទំនើបៗ ប្រភេទ UHD (Ultra HD) និង OLED ដែលបង្ហាញពីភាពស៊ីជម្រៅនៃពណ៌កាន់តែច្រើន (Color Prime) រូបភាពកាន់តែច្បាស់ និងរស់រវើកពិតៗ ។
នៅកម្មវិធី LG VIP Night ក៏បានដាក់បង្ហាញនូវផលិតផលសំរាប់ប្រើប្រាស់ក្នុងគេហដ្ឋាន និងសំភារៈផ្ទះបាយដ៏ឆ្លាតវៃជាច្រើន ដែលរួមមានប្រពន្ធ័លាងសម្អាត TurboShot ដែលជាបច្ចេកវិទ្យាអភិវឌ្ឍន៍ថ្មី សំរាប់ម៉ាស៊ីនបោកគក់ ដែលអាចកាត់បន្ថយរយៈពេលនៃការបោកគក់ តែសមត្ថភាពលាងជម្រះកាន់តែល្អប្រសើរ។ ក្រុមហ៊ុន LG ក៏បានបង្ហាញនូវទូរទឹកកកស៊េរីថ្មីៗ ដែលមានសមត្ថភាពក្នុងការកំចាត់ក្លិន និងសំលាប់មេរោគបានយ៉ាងល្អ ហើយក៏មានការរចនាទ្វារបែប Door in Door ដែលអាចសន្សំសំចៃអគ្គិសនីទ្វេដង។ ម៉ាស៊ីនត្រជាក់ស៊េរីថ្មីរបស់ LG ក៏បានបំពាក់នូវបច្ចេកវិទ្យា Skin Care ដែលមានអនុភាពខ្ពស់ក្នុងការបង្កើននូវសំណើមដល់ស្បែក, មុខងារ Fresh & Dry ដែលអាចកំចាត់សំណើមនៅក្នុងបន្ទប់បាន ជាពិសេសនៅរដូវវស្សា និងបច្ចេកវិទ្យា ដេញមូសថ្មី ដែលបានបំពាក់នៅក្នុងម៉ាស៊ីនត្រជាក់របស់ LG និងការសន្សំសំចៃអគ្គិសនីបានរហូតទៅដល់ 65% ។ ជាមួយគ្នានេះផងដែលនៅក្នុង LG VIP Night ក៏បានបង្ហាញនៅការមកដល់ថ្មីបំផុតរបស់ LG G4 នៅក្នុងប្រទេសកម្ពុជាផងដែល។ LG G4 នេះជាបច្ចេកវិទ្យាទូរសព្ទចុងក្រោយគេបង្អស់របស់ LG នាពេលបច្ចុប្បន្ន ហើយ LG G4 នេះជាប្រភេទទូរសព្ទដែលបំពាក់ដោយ កាមេរ៉ាខាងក្រោយកម្រិតច្បាស់ល្អឥតខ្ចោះដល់ទៅ 16MP និងកាមេរ៉ាខាងមុខ 8MP ជាមួយ និងមុខងារថតរូបដោយប្រើកាយវិការ។ ទូរសព្ទ LG G4 មានអេក្រង់ 5.5 អ៊ីង ប្រភេទ Quad HD IPS Quantum Display ដំបូងគេបង្អស់ ពណ៌អេក្រង់ច្បាស់ជាងមុន 20% ភ្លឺជាមុន 25% និងដិតជាងមុន 50% ។ ទូរសព្ទស៊េរីថ្មី LG G4 នេះមានពីរប្រភេទក្នុងការជ្រើសរើស គឺប្រភេទសំបកខាងក្រោយធ្វើពីលោហៈធាតុ (Metal Diamond Cut) និងសំបកខាងក្រោយធ្វើពីស្បែកសុទ្ធ (Genuine Leather)។
តាមប្រសាសន៍របស់ លោក ឧកញ៉ា សុខ ពិសិដ្ឋ នាយកប្រតិបត្តិរបស់ ក្រុមហ៊ុន G Gear បានឲ្យដឹងថា “គោលបំណងធំទីមួយដែលក្រុមហ៊ុនយើងធ្វើការរៀបចំកម្មវិធីនេះ គឺជាការជួបជុំធំបំផុតប្រចាំឆ្នាំរបស់ក្រុមហ៊ុន LG Electronics និងក្រុមហ៊ុន G Gear ជាមួយដៃគូរ អាជីវកម្ម មកពីបណ្តាខេត្តក្រុងទូទាំងព្រះរាជាណាចក្រកម្ពុជា។ លើសពីនេះទៅទៀត ការ រៀបចំកម្មវិធីនេះ គឺជាការថ្លែងអំណរគុណ ទៅដល់ដៃគូរអាជីវកម្មរបស់ ក្រុមហ៊ុន G Gear ដែលបានចូលរួមគាំទ្រផលិតផល LG អេឡិចត្រួនិច ដែលធ្វើអោយការលក់របស់ក្រុមហ៊ុនមានសន្ទុះកើនឡើងគូរអោយគត់សម្គាល់” ។ ហើយ លោក Bong Soak Kim អគ្គនាយក ក្រុមហ៊ុន LG Electronics ប្រចាំព្រះរាជាណាចក្រកម្ពុជា ក៏បានឲ្យដឹងផងដែរថា “LG Electronics គឺជាម៉ាកផលិតផលមួយដែលនាំមុខគេក្នុងពិភពលោក ហើយដើម្បីជាការតបស្នងត្រលប់ទៅដល់សង្គមវិញ ក្រុមហ៊ុន LG តែងតែយកចិត្តទុកដាក់ និងចូលរួមយ៉ាងសកម្ម ចំពោះបញ្ហាប្រឈមក្នុងពិភពលោក និង ប្រជាពលរដ្ឋនៅក្នុងតំបន់។ តួយ៉ាង ក្រុមហ៊ុន LG Electronics បានជួយឧបត្ថម្ភដល់សមាគមក្រុមគ្រូពេទ្យស្ម័គ្រចិត្តយុវជនសម្តេចតេជោ នៅទឹកប្រាក់ចំនួន 100,000,000 KRW (ប្រមាណជាង 90,000 ដុល្លា) សំរាប់ឆ្នាំ 2015នេះ ក្នុងសកម្មភាពជួយពិនិត្យ និង ព្យាបាលជំងឺដោយឥតគិតថ្លៃ ដល់ប្រជាពលរដ្ឋនៅតំបន់ដាច់ស្រយាល រឺ ប្រជាពលរដ្ឋដែលពុំមានលទ្ធភាព នៅទូទាំងប្រទេសកម្ពុជា។ យើងបានជួយឧបត្ថម្ភដល់ សមាគមក្រុមគ្រូពេទ្យស្ម័គ្រចិត្តយុវជនសម្តេចតេជោ តាំងពីឆ្នាំ2014 ដែលឆ្នាំកន្លងទៅនេះ យើងបានទៅដល់ប្រជាជនប្រមាណជាង 20,264 នាក់ ដែលបានមកពិនិត្យ និងព្យាបាលជំងឺដោយឥតគិតថ្លៃ។