ចាប់តាំងពីខ្សែភាពយន្ត “Goldfinger” របស់លោក James Bond ខ្សែភាពយន្ត “Bullit” របស់លោក Steve McQueen និងខ្សែភាពយន្តដ៏ល្បីក្នុងពេលបច្ចុប្បន្ន “Need for Speed” រថយន្តFord Mustang បានប្រឡូកក្នុងអាជីពសិល្បៈជាច្រើនស្ទើររាប់មិនអស់រហូតដល់ទៅជាង ៣,០០០ដង ទាំងក្នុងខ្សែភាពយន្ត និងកម្មវិធីទូរ-ទស្សន៍។ តាមរយៈប្រវត្តិ និងបទពិសោធន៍ជាច្រើនដូចនេះ រថយន្ត Ford Mustang អាចនឹទទួលបាន រូបផ្កាយនៅក្នុងវិថីតារាហូលីវូដ (Star on the Hollywood Walk of Fame) ក្នុងពេលឆាប់ៗ។
ជាមួយនិងការប្រារព្ធខួបលើកទី៥០ឆ្នាំក្នុងឆ្នាំនេះ រថយន្ត Ford Mustang គឺជារថយន្តដែលតែងតែទទួលបានការស្នើសុំអនុញ្ញាតលើការប្រើប្រាស់ស្លាកសញ្ញាច្រើនជាងគេបំផុតក្នុងចំណោមរថយន្ត Ford។ ឈ្មោះ រូបភាព និងភាពពេញចិត្តនៃរថយន្តនេះ ត្រូវបានគេអបអរសាទរក្នុងវប្បធម៌ថ្មីរបស់អាមេរិកជាង ៥០ ឆ្នាំកន្លងមកហើយ តាមរយៈការបង្កើតនូវវត្ថុអនុស្សាវរីយ៍ជាច្រើនសន្ធឹកសន្ធាប់ ដូចជា អាវ មួក អាវធំ ប្រដាប់ប្រដាក្មេងលេង វីដេអូហ្គេម នាឡិកា គ្រឿងអលង្ការ វ៉ាលី ជាពិសេសរួមទាំងទឹកអប់ផងដែរ។ រថយន្តMustang ជារថយន្តដ៏ពេញនិយមបំផុតនៅលើពិភពលោក ដែលរហូតដល់មានអ្នកគាំទ្រម្នាក់ បានប្រើប្រាស់ព័ត៌មានផ្សេងៗពីអ្នកប្រើប្រាស់អ៊ីនធើណិត បង្កើតជាទិន្នន័យនៅលើគេហទំព័រ សម្រាប់ធ្វើជាបញ្ជីបង្ហាញពីរូបរាងផ្សេងៗរបស់រថយន្ត Mustang។
លោក Stefan Thorarensen ស្ថាបនិក និងសមាជិកក្លឹបរថយន្ត “The Icelandic Mustang Club” បានមានប្រសាសន៍ថា៖ “ខ្ញុំចាប់ផ្តើមចាប់អារម្មណ៍លើរថយន្ត Mustang ចាប់តាំងពីឆ្នាំ១៩៦៦ នៅពេលដែលខ្ញុំមានអាយុ១៤ឆ្នាំ។ ម្តាយមីងរបស់ខ្ញុំបានទិញរថយន្ត Mustang Fastback ស៊េរី១៩៦៤ ពណ៌ក្រហម មួយគ្រឿង ហើយខ្ញុំមិនដែលភ្លេចរថយន្តនោះទេ។”ចាប់តាំងពីពេលនោះមក ក្តីស្រឡាញ់របស់លោក Thorarensen ចំពោះរថយន្តMustang បាន កើនឡើងយ៉ាងខ្លាំង រហូតដល់លោកចាប់ផ្តើមប្រមូលកាសែតវីដេអូ និង DVD ដែលមានរូបរថយន្ត Mustang។ ក្នុងឆ្នាំ ២០០៩ លោកបានបង្កើតបញ្ជីខ្សែភាពយន្តចំនួន៣០០រឿង និងចំណងជើងកម្មវិធីទូរទស្សន៍ ធ្វើជាចំណុចចាប់ផ្តើមសម្រាប់ការបង្កើតគេហទំព័រមួយអំពីរថយន្តនេះដែលមានឈ្មោះថា “Mustanglmdb.com” ។ មានអ្នកចូលរួមផ្តល់ព័ត៌មានប្រហែល ១០០ នាក់ បានបង្ហាញពីបញ្ជីនៃខ្សែភាពយន្តចំនួន ៣,០០០រឿង ដែលមានថតជាមួយរថយន្ត Mustang។
ការខិតខំបង្កើតជាគេហទំព័រនេះ បានឆ្លុះបញ្ចាំងពីឥទ្ធិពលដ៏ខ្លាំងក្លារបស់រថយន្តMustang រហូតដល់មានអ្នកគាំទ្រជាច្រើននៅជុំវិញពិភពលោក ជាពិសេសព្រមទាំងមានក្លឹបអ្នកគាំទ្រនៅកន្លែងឆ្ងាយៗជាច្រើនដូចជា នៅប្រទេសអាយឡេន(Iceland) ប្រទេសប៉ូឡូញ និងប្រទេសញូវសេលេន ដែលនៅទីនោះមិនមានលក់រថយន្តFord Mustangនោះទេ។
តួនាទីដ៏ចម្បងរបស់រថយន្ត Mustang
រថយន្ត Mustang ទទួលបានភាពល្បីល្បាញក្នុងវិស័យភាពយន្តយ៉ាងលឿនបំផុត បន្ទាប់ពីវត្តមានក្នុងរយៈពេល៨ខែក្រោយការបង្ហាញខ្លួនក្នុងពិព័រណ៍ពិភពលោកនៅទីក្រុងញូវយ៉កក្នុងឆ្នាំ១៩៦៤។ ក្នុងរឿង “Goldfinger” រថយន្ត Mustang ឈ្មោះ “ Wimbeldon White” គឺជាជម្រើសរថយន្តដ៏ល្អបំផុតសម្រាប់ឃាតករស្រីស្អាតក្នុងការតាមប្រមាញ់លោក James Bond។ ប៉ុន្មានឆ្នាំក្រោយមក លោក James Bond បានប្រើប្រាស់រថយន្តMustang សម្រាប់ប្រណាំងនៅលើផ្លូវនៃរដ្ឋឡាសវេកាស (Las Vegas) ក្នុងរឿង “Diamonds are Forever”។
ត្រឹមឆ្នាំ១៩៦៨ រថយន្ត Mustang បានក្លាយជារថយន្តនិមិត្តរូបនៅលើដងវិថី (Icon on the Road) សម្រាប់មនុស្សទូទៅ។ ក្រោយមកលោក Steve McQueen បានកែប្រែមុខមាត់រថយន្តនេះឲ្យក្លាយជារថយន្តប្រណាំងសម្រាប់តួឯកក្នុងសាច់រឿង “Bullit” ដ៏អស្ចារ្យបំផុត។ រយៈពេល៤០ឆ្នាំក្រោយ រថយន្ត Mustang ក៏ត្រូវបានយកទៅថតសម្រាប់ឈុតឆាកដ៏កក្រើកក្នុងវគ្គបញ្ចប់នៃរឿង “Alcatraz”។
សម្រាប់រឿង “Gone in Sixty Seconds” ក្នុងឆ្នាំ២០០០ រថយន្ត Mustang ស៊េរី១៩៦៧ ពណ៌ខ្មៅលាយទឹកប្រាក់ ដែលមានឈ្មោះថា “Eleanor” ត្រូវបានយកទៅសម្តែងជាមួយលោក Nicolas Cage។ នៅពេលថ្មីៗនេះ រថយន្ត “Eleanor” ត្រូវបានយកទៅដាក់លក់សម្រាប់ការដេញថ្លៃក្នុងតម្លៃជាង១លានដុល្លាអាមេរិក និងត្រូវបានគេយកទៅផលិតឡើងវិញជាច្រើនគ្រឿងទៀត។ ក្នុងឆ្នាំ២០០៧ រថយន្ត Shelby Mustang ស៊េរីចុងទសវត្ស១៩៦០ និង រថយន្ត Mustang Shelby GT500 ស៊េរីឆ្នាំ២០០៨ បានចូលរួមសម្តែងជាមួយលោក Will Smith ក្នុងការប្រយុទ្ធជាមួយពួកខ្មោចឆៅ ក្នុងរឿង “I Am Legend”។
វត្តមានរថយន្ត Mustang តាមកញ្ចក់រោងភាពយន្តក្នុងឆ្នាំ ២០១៤
កាលពីពេលថ្មីៗនេះ រថយន្ត Mustang បានប្រារព្ធខួបលើកទី៥០ឆ្នាំ និងបានបង្ហាញខ្លួនសាជាថ្មីនៅក្នុងរឿង “Need for Speed” របស់ផលិតកម្ម DreamWorks Studios ។ សាច់រឿងនេះ បានយកខ្លឹមសារតាមវីដេអូហ្គេមប្រណាំងឡានរបស់ក្រុមហ៊ុន Electronic Arts។ តួអង្គឯកនៃរឿងនេះ គឺលោក Aaron Paul ដែលលោកបានប្រើរថយន្តFord Mustang ជារថយន្តនិមិត្តរូប (Hero Car)។ លោក Scott Waugh អ្នកដឹកនាំរឿងនេះ បានមានប្រសាសន៍ថា៖ “ដូចដែលយើងធ្លាប់ឃើញជាច្រើនដងក្នុងរយៈពេលច្រើនឆ្នាំកន្លងមកនេះ គឺចាប់តាំងពីរឿង ‘Bullit’ រហូតដល់រឿង ‘Gone in Sixty Seconds’ រថយន្តMustang ជារថយន្តដ៏សក្តិសមបំផុតសម្រាប់សាច់រឿងរបស់យើង ហើយរថយន្តនេះ ពិតជារថយន្តដែលតំណាងឲ្យវប្បធម៌អាមេរិកដ៏ពិតប្រាកដ អាស្រ័យដូច្នេះទើបយើងជ្រើសរើសរថយន្តនេះ សម្រាប់រឿង ‘Need for Speed’”។
រថយន្ត Mustang ដែលបានថតក្នុងរឿង “Need for Speed” ជារថយន្តដែលបានរចនាឡើងជាពិសេស ជាមួយតួរថយន្តដ៏វែងស្រស់ស្អាត និងមានយ៉ាន់កង់ទំហំ២២អ៊ីញ ហើយរថយន្តនេះប្រើប្រាស់នូវប្រភេទម៉ាស៊ីន V8 Supercharged។ទន្ទឹមនឹងនេះ អ្នកលេងហ្គេមប្រណាំងរថយន្ត “Need for Speed” ដែលបង្កើតឡើងដោយក្រុមហ៊ុន EA ក៏អាចសប្បាយរីករាយជាមួយការប្រណាំងរថយន្ត Ford Mustang ស៊េរីថ្មី ដោយការជ្រើសរើសនូវរូបរាងរថយន្តចំនួន៥ប្រភេទខុសៗគ្នា ដើម្បីធ្វើឲ្យរថយន្តរបស់ពួកគេកាន់តែមានភាពស្រស់ស្អាតផងដែរ។
រយៈពេល ៥០ ឆ្នាំនៃរថយន្ត Mustang
អស់រយៈពេលជាច្រើនឆ្នាំកន្លងមកនេះ អ្នកគាំទ្រការរចនារថយន្ត បានចាត់ទុករថយន្ត Mustang ជារថយន្តដែលប្រកបដោយគំនិតសិល្បៈដ៏ខ្ពស់បំផុត។ ដើម្បីចូលរួមអបអរសាទរខួបទី៥០ឆ្នាំនៃរថយន្ត Mustang លោកRobin Bark ដែលជាអ្នកសិល្បៈខាងផ្នែកចម្លាក់ម្នាក់បានទទួលសិទ្ធិពិសេសពីក្រុមហ៊ុន Ford Motor ក្នុងការបង្កើតជារូបចម្លាក់រថយន្ត Mustang។ រថយន្ត Mustang ជារថយន្តដែលពោរពេញដោយភាពស្រស់សង្ហា កម្លាំងខ្លាំង រឹងមាំ និងជារថយន្តស្ព័រដ៏ទំនើប មានតម្លៃសមរម្យ។ រថយន្តនេះ ជារថយន្តដែលទទួលបានប្រជាប្រិយភាពខ្លាំងជាងគេបំផុតនៅទូទាំងពិភពលោក។ ក្នុងរយៈពេលជាង៥០ឆ្នាំកន្លងមកនេះ រថយន្តMustang ជាង៩លានគ្រឿងត្រូវបានលក់នៅទូទាំងពិភពលោក។ ចាប់តាំងពីពេលបង្ហាញវត្តមានជាលើកដំបូងនៅក្នុងការប្រណាំងរថយន្ត ខ្សែភាពយន្ត និងកម្មវិធីទូរទស្សន៍ រហូតដល់បច្ចុប្បន្ន រថយន្ត Mustang បានដើរតួយ៉ាងសំខាន់នៅក្នុងវប្បធម៌សម័យថ្មី។