កាលពីថ្ងៃទី 22 សីហា ក្រុមហ៊ុន Samsung បានសម្ពោធលក់ជាផ្លូវការនូវកម្មវិធី Note 5 Day នៅផ្សារទំនើបសូរីយា។ ក្រុមហ៊ុន Samsung បានរំពឹងថា Galaxy Note 5 នឹងអាចដណ្តើមយកចំណែកទីផ្សារដ៏ធំនៅកម្ពុជា ដោយសារតែប្រណីតភាព និងការរចនាថ្មីសន្លាង ក៏ដូចជាបច្ចេកវិទ្យាទំនើបៗដែលមានជាមួយទូរស័ព្ទថ្មីមួយនេះ បន្ទាប់ពីអ្នកនិយមប្រើទូរស័ព្ទដៃជាច្រើននាក់បានមកតម្រង់ជួររង់ចាំទិញទូរស័ព្ទថ្មីនេះ។ បើយោងតាមប្រភពពី Samsung បានឲ្យដឹងថាទូរស័ព្ទ Galaxy Note 5 ជាច្រើនត្រូវបានលក់អស់ពីស្តុក ដែលធ្វើឲ្យអតិថិជនជាច្រើនអ្នកត្រូវទៅដើរស្វែងរកទូរស័ព្ទដែលមានប្រើប៊ិក S Pen មួយនេះ នៅតាមហាងទូរស័ព្ទជាច្រើននៅក្នុងទីក្រុងភ្នំពេញ។
លោក ជា សុជាតិ នាយកផ្នែកទូរស័ព្ទដៃ នៃក្រុមហ៊ុន Samsung ប្រចាំកម្ពុជាបានមានប្រសាសន៍ថា៖ «Samsung ជឿជាក់ថា ការលក់ Galaxy Note 5 នឹងអាចទទួលបានកំណើន រហូតដល់ទៅ 30% នៅកម្ពុជាក្នុងឆ្នាំ2015 បើយើងប្រៀបធៀបនឹងការលក់ Galaxy Note 4 ឆ្នាំទៅ ដោយសារតែទូរស័ព្ទស្មាតហ្វូនមួយនេះមានការរចនាថ្មី យ៉ាងប្រណីត ស្រស់ស្អាត ជាមួយនឹង S Pen ដ៏ទំនើបដែលពុំមានគួប្រជែងណាមួយមានសមត្ថភាពផលិត S Pen ទំនើប អស្ចារ្យ និង ឆ្លាតវៃដែលបំពាក់នៅលើ Galaxy Note5 នេះឡើយ។ គួបផ្សំជាមួយនឹងបច្ចេកវិទ្យាទំនើបដែលអាចបំពេញតម្រូវការប្រើប្រាស់ប្រចាំថ្ងៃទាំងផ្នែកការងារ និងទាំងផ្នែកកម្សាន្តយ៉ាងសម្បូរបែប ខណៈពេលដែលទីផ្សាររបស់ សាមសុង កំពុងតែមានការកើនឡើងជារៀងរាល់ឆ្នាំ។
កញ្ញា ចាន់ ដាលីន ដែលមានវត្តមាននៅក្នុងកម្មវិធីសម្ពោធ សម្តែងនូវការពេញចិត្តដែរថា៖ Galaxy Note5 ថ្មីនេះពិតជាសក្តិសមបំផុតសម្រាប់នាងខ្ញុំ និង ងាយស្រួលប្រើ ដោយសារ ប៊ិច S Pen ដែលមានរាង ស្រស់ស្អាត ហើយទូរស័ព្ទនេះមានរាងកោងអាចកាន់ពេញដៃបានស្រួល។
លោក ស៊ីន ឧត្តមនី ដែលឈ្នះបាន Galaxy Tab A 9.7” មួយគ្រឿង ក្រោយពីការទិញទូរស័ព្ទ Galaxy Note 5 នៅក្នុងពិធីសម្ពោធបានឲ្យដឹងថា លោកនឹងមិត្តភក្តិបីបួននាក់ទៀតបានមករងចាំទិញទូរស័ព្ទនេះតាំងពីព្រឹកព្រលឹម។ ពីដំបូងខ្ញុំ មិនរំពឹងថាអាចទិញទូរស័ព្ទនេះបានទេ ព្រោះមានមនុស្ស ជាច្រើនកំពុងរងចាំនៅទីនេះដូចគ្នា តែឥលូវខ្ញុំទិញវាបានហើយ! ខ្ញុំសប្បាយមែនទែន។
សូមបញ្ចាក់ថា Galaxy Note 5 ក៏ជាការវិវត្តថ្មីនៃ Galaxy Note ដែលមុខងាររបស់ Air Command កាន់តែមានភាពឆ្លាតវៃនិងងាយស្រួលជាងមុនដែលវាបង្ហាញ ចេញលើអេក្រង់ភ្លាមនៅពេលអ្នកប្រើ S Pen ហើយអ្នកអាចសរសេរអក្សរនៅលើឯកសារ PDF និងអាចថតចំលងអត្ថបទវែងពីគេហទំព័រនិងរូបភាពផ្សេងដោយប្រើ Scroll capture។ ឥលូវនេះ លោកអ្នកអាចរកទិញនៅគ្រប់ហាងទូរស័ព្ទទាំងអស់នៅ ក្នុងប្រទេសកម្ពុជា៕
