កាលពីថ្ងៃទី 04 ខែតុលា នេះ មន្ទីពេទ្យ BUMRUNGRAD INTERNATIONAL HOSPITAL បានរៀបចំឡើងនូវសិក្ខាសាលាស្តីពីការផ្សព្វផ្សាយអំពីការព្យាបាលជំងឺទឹកនោមផ្អែម និងជំងឺតម្រងនោមនៅទីក្រុងភ្នំពេញ។ តាមរបាយការណ៍របស់មន្ទីពេទ្យអន្តរជាតិមួយនេះ បានអោយដឹងថា វាគ្មានអ្វីគួរឱ្យងឿងឆ្ងល់នោះទេ ដែលជំងឺទឹកនោមផ្អែម និងជំងឺតម្រងនោមស្ថិតនៅក្នុងចំណោមជំងឺរ៉ាំរ៉ៃធ្ងន់ធ្ងរជាងគេនៅក្នុងប្រទេសកម្ពុជា។ ប្រជាជន ដែលទទួលរងផលប៉ះពាល់ដោយសារជំងឺទាំងពីរនេះ មានចំនួនកើនឡើងជារៀងរាល់ឆ្នាំ និងមានតែមួយចំនួនតូចប៉ុណ្ណោះ ដែលស្វែងរកការព្យាបាលបានត្រឹមត្រូវ។ មូលហេតុនៃជំងឺទាំងពីរមានលក្ខណៈខុសៗគ្នា ប៉ុន្តែប្រសិនបើយើងស្គាល់ច្បាស់អំពីជំងឺទាំងនេះគឺកាន់តែប្រសើរ។
ការព្យាបាលមានច្រើនសម្បូរបែប រីឯវិធានការការពារក៏បានផ្សព្វផ្សាយយ៉ាងទូលំទូលាយរួចហើយដែរ។ ទោះយ៉ាងណាក៏ដោយ គេមិនបានដឹងជាទូទៅទេថា ជំងឺទាំងពីរនេះមានទំនាក់ទំនងគ្នាយ៉ាងជិតស្និទ្ធ។ ទន្ទឹមនឹងនេះ ទោះជាមានការផ្សព្វផ្សាយច្រើនហើយក៏ដោយក៏នៅតែមានមនុស្សជាច្រើនមិនបានដឹងពីវិធីបង្ការ និងព្យាបាលនៃជំងឺទឹកនោមផ្អែម និងជំងឺតម្រងនោមដែរ។ យើងទាំងអស់គ្នា សុទ្ធតែចង់ការពារមនុស្សជាទីស្រឡាញ់របស់ខ្លួន ឱ្យបានល្អបំផុតតាមដែលអាចធ្វើទៅបាន ហើយមានតែការផ្តល់ព័ត៌មានច្បាស់លាស់ប៉ុណ្ណោះ ដែលជាគន្លឹះសំខាន់។ មន្ទីរពេទ្យបំរុងរ៉ាត់បានអញ្ជើញ វេជ្ជបណ្ឌិតជំនាញពីររូប មកធ្វើបទបង្ហាញអំពីសុខភាព នៅក្នុងសិក្ខាសាលាមួយដោយឥតគិតថ្លៃ នៅរាជធានីភ្នំពេញ និងខេត្តព្រះសីហនុ។
លោកស្រីវេជ្ជបណ្ឌិត Petpring Prajuabpransri មានឯកទេសផ្នែកក្រពេញអ័រម៉ូន ទទួលសញ្ញាប័ត្រពីសហរដ្ឋអាមេរិកចំនួនពីរ ផ្នែកឱសថសាស្ត្រ និងក្រពេញអ័រម៉ូន និងផ្នែកជំងឺទឹកនោមផ្អែម និងការរំលាយអាហារ នឹងធ្វើការពន្យល់អំពីជំងឺទឹកនោមផ្អែម លើផ្នែករោគសញ្ញា និងការព្យាបាល។
ចំណែកលោកវេជ្ជបណ្ឌិត Tatpong Chit-u-aree មានជំនាញផ្នែកប្រព័ន្ធតម្រងនោម ទទួលបានសញ្ញាប័ត្រចំនួនពីរពីសហរដ្ឋអាមេរិក ផ្នែកឱសថសាស្ត្រ និងប្រព័ន្ធតម្រងនោម នឹងធ្វើការពន្យល់អំពីជំងឺតម្រងនោម។ ជំនាញ និងបទពិសោធន៍របស់វេជ្ជបណ្ឌិតទាំងពីរ រួមទាំងសំណួរចម្លើយគួរឱ្យចាប់អារម្មណ៍នានា នឹងជួយឱ្យលោកអ្នកយល់ដឹងបន្ថែមអំពីជំងឺទឹកនោមផ្អែម និងជំងឺតម្រងនោមបានល្អប្រសើរជាងមុន។