នៅថ្ងៃទី 26 ខែមេសា ក្រុមហ៊ុន សែលកាត បានរៀបចំពិធីស្វាគមន៍ដ៏កក់ក្តៅមួយចំពោះឯកអគ្គរាជទូតសុឆន្ទៈឯកសិទ្ធិរបស់ខ្លួន កញ្ញាស៊ន សៀវម៉ី នៅការិយាល័យកណ្តាលសែលកាត ដើម្បីអបអរសាទរដោយផ្ទាល់ពីជ័យជម្នះរបស់នាងនៅប្រទេសហ្វ៊ីលីពីន និងដែលមានសិទ្ធិចូលរួមប្រកួតព្រិត្តិការណ៍កីឡាអូឡាំពិករដូវក្តៅ 2016 ក្នុងទីក្រុងរីយ៉ូ ប្រទេសប្រស៊ីល ដែលនឹងប្រារព្ធនៅក្នុងខែសីហាខាងមុខ។
លោក អៀន វ៉ាតសុន នាយកប្រតិបត្តិក្រុមហ៊ុនសែលកាតបានមានប្រសាសន៍ថាៈ យើងមានកិត្តិយសដែលមានកញ្ញា ស៊ន សៀវម៉ី ជាឯកអគ្គរាជទូតសុឆន្ទៈរបស់ក្រុមហ៊ុនយើង។ ក្នុងនាមជាក្រុមហ៊ុនខ្មែរមួយដែលជឿជាក់យ៉ាងមុតមាំក្នុងស្មារតីដ៏រឹងមាំនៃប្រជាជនកម្ពុជាគ្រប់រូប ដែលមានសមត្ថភាពប្រឈម និងសាងស្នាដៃដ៏អស្ចារ្យជាច្រើន យើងជឿជាក់ថា កញ្ញា ស៊ន សៀវម៉ី ជាអ្នកការទូតដ៏មានតម្លៃសម្រាប់កិត្តិនាមសែលកាត និងគោលជំហររបស់យើង។
ស៊ន សៀវម៉ី បាននាំមេដាយមាសជូនជាតិមាតុភូមិជាលើកដំបូងនៅឆ្នាំ 2014 ក្នុងការប្រកួតកីឡាទ្វីបអាស៊ី នៅពេលដែលនាងបញ្ចប់ការប្រកួត និងទទួលបានជ័យជម្នះក្នុងក្របខណ្ឌនារីប្រភេទទម្ងន់ក្រោម 73 គីឡូក្រាមនៅក្នុងឆ្នាំ 2014 នៃព្រិត្តិការណ៍កីឡាទ្វីបអាស៊ីក្នុងទីក្រុង Incheon ប្រទេសកូរ៉េខាងត្បូង។ ជ័យជម្នះនេះ ធ្វើឲ្យនាងក្លាយជាជនកម្ពុជាដំបូងគេដែលឈ្នះមេដាយមាសពីកីឡាទ្វីបអាស៊ី។ នាងបានក្លាយជាឯកអគ្គរាជទូតសុឆន្ទៈឯកសិទ្ធិរបស់សែលកាតនៅក្នុងឆ្នាំនោះដែរ។ ក្រុមហ៊ុនបានជូនផ្តល់ជូននាងដោយគាំទ្រផ្នែកហិរញ្ញវត្ថុក្នុងការសម្រេចក្តីសុបិនរបស់នាង នៅក្នុងការបើកក្លិបតៃក្វាន់ដូ ដែលពេលបច្ចុប្បន្ននេះមានដំណើរការពេញលេញ និងកំពុងទទួលការចុះឈ្មោះ។ កាលពីថ្ងៃទី 21 មេសាកន្លងទៅនេះ នាងបានត្រឡប់ពីប្រទេសហ្វ៊ីលីពីន ជាមួយនឹងមេដាយមាសមួយទៀត ដែលមានសិទ្ធិចូលរួមប្រកួតជម្រុះសម្រាប់ព្រឹត្តិការណ៍កីឡាអូឡាំពិករដូវក្តៅក្នុងទីក្រុងរីយ៉ូ។
នាយកប្រតិបត្តិដែលតំណាងឲ្យក្រុមហ៊ុនសែលកាត លោក អៀន វ៉ាតសុន ចាត់ទុកនាងជា វីរៈនារីជាតិ និងជាគំរូដ៏ថ្លៃថ្លាសម្រាប់ប្រជាជនខ្មែរ។ នាងគឺជាគំរូដ៏អស្ចារ្យសម្រាប់ខ្មែរគ្រប់រូបជាវីរនារីជាតិ ដែលមិនត្រឹមតែតំណាងឲ្យប្រជាពលរដ្ឋប៉ុណ្ណោះទេ ថែមទាំងតំណាងឲ្យព្រះរាជាណាចក្រកម្ពុជា និងសក្ដានុពលដ៏អស្ចារ្យបំផុតរបស់ខ្លួនផងដែរ។ ជោគជ័យរបស់នាងបង្ហាញពីកិច្ចខិតខំប្រឹងប្រែងយ៉ាងខ្លាំងក្លា និងការប្តេជ្ញាចិត្តខ្ពស់បំផុត គ្មានអ្វីដែលមិនអាចទៅរួចនោះទេ។ ក្រុមហ៊ុនសែលកាត កាលពីពេលថ្មីៗនេះបានបើកយុទ្ធនាការ 2016 របស់ខ្លួនដែលបង្ហាញពីសមត្ថភាពនិងនិងសហគ្រិនវ័យក្មេងកម្ពុជា ជាមួយនឹងបដាពាក្យស្លោកដ៏មាំមួន ដែលជាបាវនារបស់ខ្លួនគឺ #KhmerWeCan (ខ្មែរទាំងអស់អាចធ្វើបាន) ក្នុងនេះផងដែរបានផ្ដល់ជូនអាវយឺតសែលកាត #KhmerWeCan ដែលចុះហត្ថលេខាដោយ ស៊ន សៀវម៉ី ក្នុងអំឡុងពេលព្រឹត្តិការណ៍នោះ និងព្រមទាំងរូបថតអនុស្សាវរីយ៍ជាមួយនឹងតារាក្នុងដួងចិត្តផងដែរ។
