កាន់តែថ្មីកាន់តែប្លែកជាមួយនឹងការប្រើប្រាស់នៅលើទូរស័ព្ទស្មាតហ្វូនស៊េរីថ្មីពីក្រុមហ៊ុន Leagoo គឺ Leagoo Alfa2។ ហើយអ្វីទៅដែលមានលក្ខណះប្លែកសម្រាប់ការប្រើប្រាស់នៅលើទូរស័ព្ទស្មាតហ្វូន Alfa2 នេះទៅ? ចឹងតោះ..! តាមដានជាមួយក្រុមការងារទស្សនាវដ្តីពិភពអេឡិចត្រូនិកយើងខ្ញុំទាំងអស់គ្នា។
រូបរាង និងការរចនា
ចំនុចដំបូងយើងចង់និយាយពីររូបរាង និងការរចនារបស់ទូរស័ព្ទ Leagoo Alfa2 ជាមុនសិន។ ផ្ទៃខាងមុខរបស់ Alfa2 ពាសដោយកញ្ចក់អេក្រង់ទំហំ 5.0” រំលេចដោយប៊ូតុងថាច់ស៊ិនស័រស៊ីធីបីនៅពីក្រោមដែលមានពន្លឺផ្តល់ភាពងាយស្រួលក្នុងការចុចបញ្ជានៅទីងងឹតគឺប៊ូតុងហូមមានរាងរង្វង់ អមដោយប៊ូតុងត្រឡប់ និងប៊ូតុងសម្រាប់បិទកម្មវិធីដែលបើកចោល។ ខាងលើកញ្ចក់មានកាមេរ៉ា អំពូល LED flash មួយគ្រាប់ ឧប៉ាល័រស្តាប់ការសន្ទនា និងស៊ិនស័របិទពន្លឺអេក្រង់។ជុំវិញតួរផ្នែកខាងស្តាំមានប៊ូតុងបិទ-បើកចាកសោរអេក្រង់ និងប៊ូតុងឡើងចុះសម្លេង ខាងលើមានរន្ធដោតកាសខ្នាត 3.5 មម, ក្រោមមានរន្ធដោត USB សម្រាប់សាកបញ្ចូលថាមពលថ្ម និងចម្លងទិន្នន័យ។ ងាកមកចាប់អារម្មណ៍នៅផ្នែកខាងខ្នងវិញគឺមានការរចនាប្លែកជាមួយនឹងស៊ិនស័រសម្គាល់ម្រាមដៃដែលអាចបញ្ជាបានមុខងារច្រើនយ៉ាងដូចជាចុចពីរដងសម្រាប់ដោះសោរទូរស័ព្ទ ចុចថតរូប គ្រវាស់ទៅឆ្វេងស្តាំ លើក្រោមដើម្បីមើលរូបភាព ឬ Scroll ដើម្បីឆែកមើលសារ និងហ្វេសប៊ុកជាដើម។ ហើយនេះជាបទពពិសោធន៍ថ្មីសម្រាប់ការប្រើប្រាស់ ពិសេសអ្នកដែលចូលចិត្តថតរូប Selfie។ ហើយនៅលើទ្រនាប់ស៊ិនស័រនេះមានកាមេរ៉ា អំពូលភ្លើង LED ពីរគ្រាប់ ក្រោមផុតមានបង្កប់ដោយអក្សរ LEAGOO និងឧប៉ាល័របំពងសម្លេង។ ហើយរន្ធដោតដាក់ស៊ីមកាតទាំងពីរ និងម៉េមូរីកាតស្ថិតនៅខាងក្រោមសន្ទះខាងក្រោយរបស់វា។
កញ្ចក់អេក្រង់កោងផុសទំហំ 5.0”
Leagoo Alfa2 បំពាក់ដោយកញ្ចក់អេក្រង់គែមជុំវិញមានសភាពផុសប្រភេទ IPS LCD 2.5D ទំហំ 5.0” ដែលអាចទ្រទ្រង់ការបង្ហាញរូបភាពវីដេអូបានក្នុងកម្រិត HD (1280x720px) បានច្បាស់ល្អជាមួយនឹងកម្រិតភាពម៉ដ្ឋ 294ppi។
កាមេរ៉ាថតរូប និងវីដេអូ
ងាកមកកាមេរ៉ាដែលបំពាក់នៅលើ Leagoo Alfa2 គឺមានទំហំ 13 មេហ្គាភិចសែលប្រភេទ BSI Camera នៅផ្នែកខាងក្រោយជាមួយនឹងអំពូល LED flash ចំនួនពីរ និងមានកាមេរ៉ាខមុខទំហំ 5.0 មេហ្គាភិចសែលព្រមទាំងភ្ជាប់ដោយអំពូល LED flash មួយគ្រាប់ជាជំនួយដល់ការថត Selfie ឲ្យបានច្បាស់នៅទីដែលមានកម្រិតពន្លឺទាប។
កំលាំងម៉ាស៊ីនខ្លាំងល្មមប្រើការ
បើនិយាយពីសមត្ថភាពប្រើការទូទៅនៅលើ Leagoo Alfa 2 គឺវាពឹងផ្អែកលើបន្ទះឈីប MediaTek MT6580 ប្រភេទ Quad-core Processor ល្បឿនប្រតិបត្តិការ 1.0GHz ជំនួយការដោយរ៉េមប្រភេទ DDR2 ទំហំ 1GB។ អង្គផ្ទុកទិន្នន័យក្នុងម៉ាស៊ីនមានទំហំ 16GB អាចបង្កើនបាន 32GB និងមានថ្មប្រភេទ Li-Polymer កំលាំង 2,600mAh ព្រមទាំងមានបច្ចេកវិទ្យាសាកថាមពលថ្មល្បឿនលឿន LGCQ1.5 Flash Charge ដែលនេះគឺជាគុណសម្បត្តិដ៏ពិសេសមួយធ្វើឲ្យលោកអ្នកចំនេញពេលក្នុងការសាកថាមពលថ្មជាមួយទូរស័ព្ទស្មាតហ្វូន Leagoo Alfa2 មួយនេះ។
ប្រព័ន្ធប្រតិបត្តិការ
Leagoo Alfa2 ដំណើរការដោយ Android ជំនាន់ Lollipop កំនែប្រែ 5.1 ស្រោបដោយយួរស័រអ៊ីនធើហ្វេសកំនែប្រែថ្មីដែររចនាឡើងដោយក្រុមហ៊ុន Leagoo ផ្ទាល់តែម្តង។ សម្រាប់មុខងារប្រើប្រាស់ឃើញថាសម្បូរបែបផងដែរក្នុងនោះរួមមាន Smart Stay, Smart Wake up, Smart Gesture, Gesture & Motion, Smart Windows View, Power Saving Mode និង HotKnot ជាដើម។Leagoo Alf2 មានដាក់លក់លើទីផ្សារហើយដែលមានបួនពណ៌សម្រាប់ជ្រើសគឺ ស ខៀវចាស់ ទឹកមាសស្រាល និងផ្កាឈូកខ្ចី៕
