កាលពីព្រឹកថ្ងៃទី 24 ខែមិថុនា គណៈកម្មាធិការជាតិអូឡាំពិកកម្ពុជា ដែលហៅកាត់ថា NOCC បានប្រកាសថា ព្រឹត្តិការណ៍ប្រកួតកីឡាសម្រាប់សិស្ស-និស្សិតនឹងត្រូវបានក្រសួងអប់រំយុវជននិងកីឡា ព្រមជាមួយដៃគូជាច្រើនទៀតនឹងត្រូវរៀបចំឡើងចាប់ពីថ្ងៃទី 28 ខែមិថុនាឆ្នាំ 2016 ដើម្បីសំដៅធ្វើយ៉ាងណាជ្រើសរើសរកសមត្ថភាពក្រុមកីឡា ដែលមានសមត្ថភាពសម្រាប់ការជ្រើសរើសយកទៅប្រកួតថ្នាក់ជាតិនិងក៏ដូចជាថ្នាក់អន្តរជាតិផងដែរ។
លោក វ៉ាត ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានមានប្រសាសន៍នៅក្នុងសន្និសិទ្ធសារពត៌នៅក្នុងគណៈកម្មាធិការជាតិអូឡំពិកកម្ពុជា ថា ព្រឹត្តិការណ៍ការប្រកួតកីឡាឧត្តមសិក្សានិងមធ្យមសិក្សាបច្ចេកទេសទូទាំងប្រទេសឆ្នាំ 2015-2016 នេះ ក្រសួងអប់រំនឹងរៀបចំឡើងចាប់ពីថ្ងៃទី 28 ខែមិថុនា ហើយនឹងបញ្ចប់ទៅវិញនៅដើមខែកកក្កដាឆ្នាំ 2016។ លោកបានបញ្ចាក់ថា ការប្រកួតកីឡាឧត្តមសិក្សានិងមធ្យមសិក្សាបច្ចេកទេសទូទាំងប្រទេសក្នុងឆ្នាំនេះមានសិស្ស និស្សិតប្រមាណ 5ពាន់នាក់ចូលរួមក្នុងនោះមានកីឡាចំនួន 5ប្រភេទត្រូវបានជ្រើសរើសយកមកប្រកួតក្នុងនេះរួមមាន វាយកូនឃ្លឺលើតុ អត្តពលកម្ម បាល់បោះ បាល់ទះនិងបាល់ទាត់។
សម្រាប់កីឡាដែលជាយុវជនចូលរួមប្រកួតនេះមានទាំងនិស្សិតគ្រប់ខេត្តក្រុង សិស្សវិទ្យាល័យនិង កីឡាមកពីសាលាបច្ចេកទេសនានា ក៏អាចមានសិទ្ធចូលរួមប្រកូតក្នុងព្រឹត្តិការណ៍ថ្នាក់ជាតិនេះបានដែរ។ លោកបានបញ្ជាក់ទៀតថា”ការប្រកួតកីឡានេះដើម្បីរកអ្នកមានគុណភាពហេតុនេះបើយើងមានគុណភាពហើយកីឡារបស់យើងចេញទៅប្រកូតទទួលជោគជ័យដែរ។នាពេលបច្ចុប្បន្នក្រសួងអប់រំតែងជំរុញឱ្យកីឡាយុវជនមកពីគ្រប់វិទ្យាល័យនិងរួមទាំងថ្នាក់ឧត្តមសិក្សាផងដើម្បីហ្វឹកហាត់បង្កើនសមត្ថភាពហេតុនេះនៅពេលដែលយើងមានសមត្ថភាពហើយការចេញប្រកួតក៏តែងដណ្តើមជ័យជំនះមកវិញដែរ”។ លោកបានបញ្ជាក់ថាតាមទិសដៅដែលក្រសួងអប់រំចង់បាននោះគឺកីឡាដែលមានគុណភាពចាប់ពីថ្នាក់ក្រោមមកហើយពិសេសកីឡាតាមថ្នាក់សាកលវិទ្យាល័យដែលជាគ្រឹះមួយសម្រាប់ឈោងទៅប្រកួតកីឡាថ្នាក់អន្តរជាតិ។
ជាមួយគ្នានេះ លោក Laszlo Barta ដែលជានាយកផ្នែកផ្សាយពាណិជ្ជកម្មក្រុមហ៊ុនសែលកាត ក៏បានបញ្ជាក់ឱ្យដឹងដែរថា ដោយមើលឃើញពីការរីកចម្រើនរបស់កីឡាកម្ពុជានេះហើយ ទើបក្រុមហ៊ុនសែលកាតដែលជាដៃគូមួយជាមួយកីឡាជាតិកម្ពុជាតែងចូលរួមឧបត្ថម្ភជាបន្តបន្ទាប់សំដៅធ្វើយ៉ាងណាចូលរួមលើកស្ទួយវិស័យកីឡាកម្ពុជាដែលមានបច្ចុប្បន្នកាន់តែលេចត្រដែតលើសមត្ថភាពថែមទៀត។ លោកបានបន្ថែមថា ក្នុងរយៈជាច្រើនឆ្នាំមកនេះក្រុមហ៊ុនសែលកាតបានចូលរួមជួយកិច្ចការសង្គមជាច្រើនក្នុងចំណោមនេះកីឡាក៏ស្ថិតនៅក្នុងទស្សនៈវិស័យដែលក្រុមហ៊ុនជួយលើកស្ទួយយ៉ាងខ្លាំងក្លាផងដែរ ។
សម្រាប់ពេលនេះក្រុមហ៊ុនសែលកាតបានចូលរួមឧបត្ថម្ភក្នុង ព្រឹត្តិការណ៍ការប្រកួតកីឡាឧត្តមសិក្សានិងមធ្យមសិក្សាបច្ចេកទេសទូទាំងប្រទេសឆ្នាំ 2015-2016 នេះ គឺជាផ្នែកមួយទៀតសម្រាប់លើកទឹកចិត្តដល់កីឡាពិសេសយុវជនដើម្បីឱ្យពួកគេក្លាយជាកីឡាឆ្នើមមួយសម្រាប់បម្រើប្រទេសជាតិនាថ្ងៃខាងមុខ៕
