នៅថ្ងៃទី 26 ខែកក្កដា ឆ្នាំ 2016 នេះ សែលកាត បានប្រកាសផ្ដល់ការឧបត្ថម្ភផ្លូវការដល់អត្តពលិកកម្ពុជាទាំង 6 រូប ដែលជាក្ដីសង្ឃឹមនៅក្នុងការនាំមកនូវភាពល្បីរន្ទឺ របស់កម្ពុជាលើឆាកអន្តរជាតិនៅក្នុងការប្រកួតកីឡាអូឡាំពិក នៅទីក្រុងរីយ៉ូ ប្រទេសប្រេស៊ីល។ កញ្ញាស៊ុន សៀវ ម៉ី គឺជាក្ដីសង្ឃឹម ដ៏មុតមាំរបស់កម្ពុជា ក្នុងការដណ្ដើមេដាយ ហើយក៏ជាកីឡាការិនីខែ្មរ ដំបូងដែលទទួលបានសិទ្ធិ ចូលរួមការប្រកួត ជាផ្លូវការផងដែរ។ កីឡាការិនី វ័យ 21 ឆ្នាំរូបនេះ ដែលត្រូវបានគេទទួលសា្គល់ ទូទាំងពិភពលោក ដែលបានជាប់មេដាយមាស កីឡាស៊ីហ្គេម ឆ្នាំ 2011 និងកីឡាទ្វីបអាស៊ី ឆ្នាំ 2014 ក៏ដូចជា មេដាយប្រាក់ពានរង្វាន់ កីឡាតេក្វាន់ដូទ្វីបអាស៊ី ក្នុងឆ្នាំនេះផងដែរ ។
កញ្ញាបានឲ្យដឹង នៅថ្ងៃទី 26 កក្កដានេះថា នាងខ្ញុំមានកិត្តិយស និងមោទនភាពបំផុត ក្នុងនាមជាតំណាងដឹកនាំ ទទួលខុសត្រូវរបស់ ក្រុមអត្តពលិកកម្ពុជា ទៅចូលរួមការប្រកួត កីឡាអូឡាំពិក ។ យើងទាំងអស់គ្នានឹង ខំប្រឹងប្រែងឲ្យអស់ពីសមត្ថភាពដើម្បី បង្ហូតទង់ជាតិ កម្ពុជាឡើងនៅទីក្រុងរីយ៉ូ ហើយក៏សូមថ្លែង អំណរគុណដល់ ការប្តេជ្ញាចិត្ត និងការឧបត្ថម្ភរបស់ សែលកាតផងដែរ។ យើងបានត្រៀម ជាស្រេចដើម្បីបង្ហាញថា ខ្មែរអាចធ្វើបាន” ។
លោក អៀន វ៉ាតសុន បានថ្លែងបញ្ជាក់ថា “ យើងជឿជាក់ថា អត្តពលិក ទាំង៦រូបរបស់យើង មានកាតព្វកិច្ចជាច្រើន និង សម្រេចឲ្យបាន ប៉ុន្តែយើងប្រាកដ ក្នុងចិត្តថា ពួកគាត់នឹងកា្លយជាកីឡាករ កីឡាការិនីគំរូសម្រាប់អនាគត ហើយប្រកាន់ខ្ជាប់នូវ គុណតម្លៃនូវភាពជាកីឡាករ និងបាវចនារបស់សែលលកាត (#KhmerWeCan)” ។
លោក វ៉ាត់ ចំរើន អគ្គលេខាធិការ គណៈកម្មការជាតិអូទ្បាំពិក កម្ពុជាបានថ្លែងថា “ កីឡាករ និងកីឡាការិនី៦រូប ដែលទទួលបានសិទ្ធិ អនុគ្រោះចូលរួមប្រកួត កីឡាអូឡាំពិកដែរនោះ រួមមាន ១ កីឡាការិនីចំបាប់ ចូវ សុធារ៉ា ជាម្ចាស់មេដាយមាស កីឡាស៊ីហ្គេមពីរ សម័យដែលត្រូវចូលរួម ប្រកួតក្នុងប្រភេទកីឡា ចំបាប់នារីទម្ងន់ 48 គីឡូក្រាម។ 2 កីឡាការិនីហែល ទឹក ហែមថុន បច្ចុប្បន្នជាម្ចាស់ជើងឯក ហែលទឹកថ្នាក់ជាតិ ចម្ងាយ 50 ម៉ែត្រ និង 100 ម៉ែត្រ។ 3 កីឡាករហែលទឹក ពូ សុវិជ្ជា ជាកីឡាករស្ថិតក្នុង កំណត់ត្រាកីឡាករ ហែលទឹកបែបកង្កប (Breaststroke) ថ្នាក់ជាតិចម្ងាយ 100 ម៉ែត្រ នៅក្នុងការប្រកួតស៊ីហ្គេម 2015 ក្នុងប្រទេសសិង្ហបុរី។ 4 កីឡាការិនីរត់ប្រណាំង លី ណារី ជាអ្នកបំបែកកំណត់ត្រារត់បីម៉ោង នៅក្នុងព្រឹត្តិការណ៍រត់ប្រណាំង ម៉ារ៉ាតុងវ៉ាឡេនស៊ា ប្រទេសអេស្ប៉ាញ ហើយក៏ជាកីឡាការិនីម៉ារ៉ាតុង ឆ្នើមបំផុតរបស់កម្ពុជាផងដែរ។ ៥ កីឡាកររត់ប្រណាំង តាគីហ្សាគីគូនីអាគី ធ្លាប់ចូលរួមការប្រកួតរត់ប្រណាំង ពេញម៉ារ៉ាតុង និងពាក់កណា្ដលម៉ារ៉ាតុង ក្នុងឆ្នាំ 2009 ហើយទទួលបាន ថេរវេលាល្អបំផុត គឺ២ម៉ោង 27 នាទី និង 52 វិនាទី ក្នុងការប្រកួត ពេញម៉ារ៉ាតុង។
គួរបញ្ជាក់ថា ការឧបត្ថម្ភនេះ បានរៀបចំឡើងដោយ ជើងឯកតេក្វាន់ដូ កញ្ញាស៊ុន សៀវ ម៉ី និងគណៈកម្មាធិការជាតិ អូឡាំពិកកម្ពុជា ក្នុងពិធីចុះហត្ថលេខា រវាងក្រុមហ៊ុនទូរគមនាគមន៍ សែលកាត និងមន្ត្រីគណៈកមា្មធិការ ជាតិអូឡាំពិកកម្ពុជា នៅការិយាល័យពីលើកមុន ៕
