ថ្មីៗនេះ MediaTek ដែលជាក្រុមហ៊ុនផលិតបន្ទះឈីបដ៏ល្បីល្បាញ ទើបតែប្រកាសបង្ហាញនូវបន្ទះឈីបចុងក្រោយបំផុតរបស់ខ្លួន ដែលប្រើប្រាស់សម្រាប់ទូរទស្សន៍ឆ្លាតវៃ។ បន្ទះឈីប S900 ថ្មីនេះ បានបង្ហាញខ្លួននៅថ្ងៃទី 2 ខែកក្កដា ឆ្នាំ 2020 ដោយបាននាំយកនូវមុខងារជាច្រើនទៀតដូចជា AI, 8K និង WiFi 6 ថែមទៀតផង។ MediaTek S900 មានសមត្ថភាពក្នុងការបម្លែងពីរលកសញ្ញាឌីជីថលចេញពីវីដេអូជាច្រើន ទៅជារលកសញ្ញារូបភាព។ បន្ទះឈីបនេះ អាចធ្វើការ Decode ទៅលើ Files វីដេអូជាច្រើនយ៉ាងសម្បូរបែប។
បន្ថែមពីនេះទៀតនោះ បច្ចេកវិទ្យា AI នេះ ក៏ធ្វើការពង្រឹងទៅលើគុណភាពរូបភាពផងដែរ។ បន្ទះឈីបនេះ នឹងប្រើប្រាស់នៅលើទូរទស្សន៍ Samsung 8K QLED TV ហើយវានឹងក្លាយជាទូរទស្សន៍ Wi-Fi 6 8K TV ដំបូងបំផុតរបស់ពិភពលោកផងដែរ។ តាមការបញ្ជាក់របស់ក្រុមហ៊ុន MediaTek នេះ S900 មានការបញ្ចូលគ្នានូវ CPU, GPU និង AI processor unit (APU) ដែលធ្វើការទ្រទ្រង់ទៅលើ AI voice-user interface និងការពង្រឹងទៅលើគុណភាពរូបភាពថែមទៀត។ វាប្រើប្រាស់នូវ multi core CPU ដែលមាន ARM Cortex- A73 cores និង multi core Mali-G52 GPU ដែលទ្រទ្រង់ទៅលើ 8K decoding, HDR10+ និងក្រាហ្វិកពីខាងក្រៅថែមទៀត។
សម្រាប់ការតភ្ជាប់វិញនោះ បន្ទះឈីបនេះ ទ្រទ្រង់ទៅលើ HDMI 2.1A ដែលមានកម្រិត bandwidth រហូតដល់ទៅ 48Gps ដែលមានសមត្ថភាពក្នុងការដំណើរការនូវមាតិការ HDR10+ និងវីដេអូ 4K នៅក្នុងកម្រិត120Hz និងវីដេអូ 8K នៅក្នុងកម្រិត 60Hz ផងដែរ។ ចំពោះ AI PQ (Picture Quality) ក៏ប្រើប្រាស់នូវមុខងារឆ្លាតវៃជាច្រើនទៀតដូចជា AI facial និង scene recognition ផងដែរ៕
