កំពូលស្មាតហ្វូន Samsung Galaxy S22 Series ជិតដល់ថ្ងៃបង្ហាញខ្លួនជាផ្លូវការណ៍ហើយ គឺនៅដើមឆ្នាំ 2022 ខាងមុខនេះ។ ទន្ទឹមនឹងនេះ យើងឃើញថាមានប្រភពព័ត៌មានចចាមអារាម និងរបាយការណ៍ជាច្រើនបានធ្វើការចុះផ្សាយពីលក្ខណៈសម្បត្តិ និងគុសម្បត្តិដែលនឹងមានមកជាមួយកំពូលស្មាតហ្វូនជំនាន់ថ្មីទាំងអស់នេះ។
ដោយកន្លងមកយើងទទួលបានព័ត៌មានថា Samsung Galaxy S22 និង S22+ នឹងមានផ្ទៃខ្នងខាងក្រោយ និងស៊ុមជុំវិញជាជ័រ Plastic។
ដោយឡែកក្នុងថ្ងៃនេះ ប្រភពចេញពីគណនីទម្លាយព័ត៌មាននៅលើបណ្តាញ Twitter ល្បីឈ្មោះដែលមានឈ្មោះថា Ice universe បានប្រកាសថា បងប្អូនកំពូលស្មាតហ្វូន Samsung Galaxy S22 Series ដែលមាន Galaxy S22, S22+ និង S22 Ultra ដែលព័ត៌មានចុងក្រោយថានឹងប្តូរឈ្មោះទៅជា S22 Note គឺមានតួរខ្លួនស្រោបដោយកញ្ចក់ទាំងអស់គ្នា ដែលផ្ទុយពីព័ត៌មានលើកមុនថា ផ្ទៃខ្នងខាងក្រោយរបស់ម៉ូដែល S22 និង S22+ នឹងស្រោបដោយ Plastic។ ប្រសិនបើដំណឹងថ្មីនេះជាការពិតមែននោះ វាពិតជាដំណឹងល្អបំផុតសម្រាប់អ្នកគាំទ្រផលិតផលស្មាតហ្វូនត្រកូល Galaxy S របស់ Samsung។
យើងដឹងហើយថា នៅលើជំនាន់ Galaxy S21 Series ដែលមានវត្តមានលើទីផ្សារបច្ចុប្បន្ននេះ ម៉ូដែល Galaxy S21 និង S21+ ត្រូវបាន Samsung ស្រោបផ្ទៃខ្នងខាងក្រោយដោយជ័រ Plastic រលោង ដែលធ្វើឲ្យអ្នគគាំទ្រមានការមិនពេញចិត្ត។ ដូច្នេះ សម្រាប់ Galaxy S ជំនាន់ថ្មីដែលត្រៀមចេញក្នុងឆ្នាំ 2022 ខាងមុខនេះ រំពឹងថា Samsung នឹងប្តូរមកប្រើកញ្ចក់សម្រាប់ផ្ទៃខ្នងខាងក្រោយវិញ ព្រោះថាផ្ទៃខ្នងស្មាតហ្វូនដែលស្រោបដោយកញ្ចក់ គឺមានភាពស្និត និងផ្តល់នូវភាព Premium ក្នុងការកាន់ប្រើប្រាស់។
Samsung Galaxy S22 Series នឹងបំពាក់នូវកំពូលឈីប Snapdragon 8 Gen1 រួមនឹងកំពូលឈីប Exynos 2200 តម្រូវតាមទីផ្សារក្នុងតំបន់ផ្សេងៗគ្នា។ ហើយសម្រាប់ម៉ូដែលកំពូលជាងគេ គឺ Galaxy S22 Ultra/Note អាចនឹងភ្ជាប់មកជាមួយប៊ិច S-Pen ថែមទៀតផង។ Samsung អាចនឹងបញ្ចេញស្មាតហ្វូនកំពូលជំនាន់ថ្មីគ្រួសារ Galaxy S22 Series នៅក្នុងខែមករា ឬខែកុម្ភៈឆ្នាំ 2022 ខាងមុខនេះ៕