ក្រុមហ៊ុន Huawei ទើបតែបានប្រកាសចេញឧបករណ៍ Smart Screen Portable Version ស៊េរីថ្មី។ ឧបករណ៍ Vision Smart Screen ស៊េរីថ្មីនេះបានបំពាក់នូវអេក្រង់គុណភាពខ្ពស់កម្រិតបង្ហាញ 4K ទំហំ 10.4 អ៊ីញ និងមានថ្មទំហំធំខ្លាំងដល់ទៅ 10,995mAh។ មិនត្រឹមតែបានបង្ហាញចេញឧបករណ៍ Smart Screen Portable Version ស៊េរីថ្មីតែមួយនោះទេ Huawei ក៏បានបង្ហាញចេញនូវអេក្រង់ឆ្លាតវៃខ្នាតយក្សស៊េរីថ្មីមួយទៀតផងដែរ គឺ Vision Smart Screen Z65 Gaming Edition។ សម្រាប់ឧបករណ៍អេក្រង់ឆ្លាតវៃស៊េរីថ្មីនេះ Huawei នឹងមានការបើកដាក់ឲ្យធ្វើការបញ្ជាក់ទិញមុនបាននៅថ្ងៃទី 20 ខែតុលានេះ រីការចេញលក់ផ្លូវការណ៍អាចនឹងធ្វើឡើងនៅថ្ងៃទី 31 ខែតុលា។
Huawei Smart Screen Portable Version ស៊េរីថ្មីនេះមានអេក្រង់កម្រិត 4K ទំហំ 10.4 អ៊ីញ និងមានប្រព័ន្ធ Speaker បំពងសំឡេងដ៏ធំស្ថិតនៅផ្នែកខាងក្រោមអេក្រង់។ ឧបករណ៍ស៊េរីថ្មីនេះត្រូវបានរចនាឡើងជារាងចតុកោណកែងជាមួយការបំពាក់ថ្មទំហំយក្សដល់ទៅ 10,995mAh។ បន្ទះអេក្រង់គុណភាពខ្ពស់របស់ Smart Screen Portable Version ស៊េរីថ្មីនេះក៏មានប្រព័ន្ធការពារកម្រិតជះចេញពន្លឺពណ៌ខៀវខ្លាំងបានយ៉ាងល្អ ផ្តល់នូវផាសុខភាពដល់ភ្នែក និងទទួលស្គាល់ដោយវិញ្ញាណបនប័ត្រ TUV Rheinland របស់ប្រទេសអាល្លឺម៉ង់ថែមទៀតផង។ បន្ថែមពីនេះអេក្រង់របស់ឧបករណ៍ឆ្លាតវៃស៊េរីថ្មីនេះ ក៏មានប្រព័ន្ធកែប្រែកម្រិតពន្លឺដោយស្វ័យប្រវត្តិតម្រូវតាមពន្លឺនៅមជ្ឈដ្ឋានខាងក្រៅ និងមានកាមេរ៉ាវ៉ិបខេមទំហំ 8MP ស្ថិននៅត្រង់កែងខាងស្តាំនៃអេក្រង់ផងដែរ។
សម្រាប់កាមេរ៉ាទំហំ 8MP មួយគ្រាប់នៅលើឧបករណ៍ឆ្លាតវៃស៊េរីថ្មីនេះ គឺមានគុណភាពខ្ពស់ ដែលល្អបំផុតសម្រាប់ប្រើជាមួយវីដេអូខល ឬ Video Conference។ Smart Screen Portable Version ស៊េរីថ្មីឆ្នាំ 2022 នេះ មានបំពាក់មកជាមួយប្រព័ន្ធបំពងសំឡេងចំនួន 5 ឬ 5-Unit sound system ដែលផ្តល់សំឡេងស្រែកចេញបានលឺខ្លាំងល្អបំផុតសម្រាប់ការទស្សនាវីដេអូ និងខ្សែភាពយន្ត។ ជាងនេះទៅទៀតឧបករណ៍កម្សាន្តស៊េរីថ្មីនេះមានបំពាក់មកជាមួយរ៉េមទំហំ 4GB និងម៉េមូរីផ្ទុកក្នុងម៉ាស៊ីនទំហំ 64GB រួមជាមួយនឹងមុខងារ Xiaoyi Butler ដើម្បីផ្តល់នូវសេវាកម្មប្រើប្រាស់ដ៏ឆ្លាតវៃបំផុត។ ទោះបីជា Huawei បានប្រកាសចេញឧបករណ៍ Smart Screen Portable Version 2022 ពិតមែនក្តី ប៉ុន្តែក្រុមហ៊ុនមិនទាន់បានបញ្ជាក់លម្អិតលើផ្នែកសំខាន់ៗដែលមាននៅលើឧបករណ៍ថ្មីមួយនេះ រួមទាំងតម្លៃរបស់វានៅឡើយទេ ហើយការនាំចេញទៅលក់នៅលើទីផ្សារសកលក៏មិនទាន់ត្រូវបានបញ្ជាក់ឲ្យដឹងនៅឡើយទេ៕
