បើតាមរបាយការណ៍ដែលបានចេញផ្សាយនាពេលកន្លងមកបានបញ្ជាក់ថា Apple នឹងប្រកាសចេញម៉ាស៊ីនកុំព្យូទ័រ MacBook Pro 14-inch និង 16-inch ដែលបំពាក់ឈីបជំនាន់ថ្មី M2 Pro និង M2 Max នៅក្នុងខែវិច្ឆិកាខាងមុខនេះ។ ប៉ុន្តែ យោងទៅលើព័ត៌មានថ្មីក្នុងពេលនេះ បានបញ្ជាក់ជាថ្មីថា Apple MacBook Pro Series ដែលបំពាក់ឈីប M2 Pro និង M2 Max នឹងត្រូវពន្យាពេលប្រកាសចេញរហូតដល់ឆ្នាំ 2023។
ប្រភពចេញពីគណនីឈ្មោះថា “yeux1122” របស់កូរ៉េខាងត្បូងបានបញ្ជាក់ថា MacBook Pro 14-inch និង Pro 16-inch នឹងត្រូវពន្យាពេលប្រកាសចេញរហូតដល់ដើមឆ្នាំក្រោយ ឬអាចមកដល់ផ្លូវការណ៍ក្នុងខែមិនា។ គណនីដដែលនេះ បានលើកឡើងថា សង្វាក់ផ្គត់ផ្គង់ការផលិតម៉ាស៊ីន MacBook Pro Series ជំនាន់ថ្មីត្រូវបានធ្វើបច្ចុប្បន្នភាពកាលវិភាគថ្មីដែលបានស្នើឲ្យមានការចាប់ផ្តើមនៅដើមឆ្នាំក្រោយ មិនមែនក្នុងខែវិច្ឆិកាខាងមុខនេះនោះទេ។ សូមរំលឹងថា ប៉ុន្មានឆ្នាំចុងក្រោយនេះ Apple តែងតែកំនត់យកខែវិច្ឆិកាក្នុងការប្រកាសចេញម៉ាស៊ីន MacBook Pro របស់ខ្លួនដោយក្នុងនោះ Apple បានប្រកាសចេញ MacBook Pro 16-inch នៅក្នុងខែវិច្ឆិកា ឆ្នាំ 2019, ប្រកាសចេញ MacBook Pro ចំនួន 3 ស៊េរីជាលើដំបូងដែលបំពាក់ឈីប M1 នៅក្នុងឆ្នាំ 2020 ជាដើម។
យោងទៅលើរបាយការណ៍របស់លោក Mark Gurman មកពី Bloomberg ដែលបានចេញផ្សាយថ្មីៗនេះបាននិយាយថា MacBook Pro 14-inch និង 16-inch ជំនាន់ថ្មីដែលបំពាក់ឈីប M2 Series ជំនាន់ថ្មី នឹងប្រកាសចេញផ្លូវការណ៍នៅក្នុងខែវិច្ឆិកា។ ហើយថ្មីៗនេះ នាយកប្រតិបត្តិ Apple លោក Tim Cook បាននិយាយថា "ក្រុមផលិតផលរបស់ Apple ត្រូវបានកំណត់" ចេញនៅមុនថ្ងៃវិស្សមកាល ដែលនាយកប្រតិបត្តិការរូបនេះចង់បង្ហាញថា ផលិតផលថ្មីរបស់ក្រុមហ៊ុនខ្លួននឹងមិនមានការចេញលក់នៅក្នុងឆ្នាំនេះទេ គឺក្រុមហ៊ុនបានត្រៀមចេញលក់សម្រាប់រដូវកាលវិស្សមកាលឆ្នាំក្រោយឯណោះ៕