នៅថ្ងៃនេះ ក្រុមហ៊ុន Honor ដែលជាម៉ាកសញ្ញាស្មាតហ្វូនកំពុងតែមានឈ្មោះបោងះសម្លេងខ្លាំងនៅលើទីផ្សារប្រទេសចិន និងទីផ្សារសកលនោះ បានប្រកាសថា ខ្លួនបានត្រៀមរៀបចំនូវព្រឹត្តិការណ៍សម្ភោធន៍ស្មាតហ្វូនជំនាន់ថ្មីមួយ នៅថ្ងៃទី 23 ខែវិច្ឆិកាខាងមុខនេះហើយ។ ក្រុមហ៊ុន Honor នេះ ត្រូវបានគេដឹងថា នឹងមានប្រកាសចេញនូវស្មាតហ្វូនដែលអាចបត់បាន Honor Magic Vs របស់ខ្លួននៅក្នុងព្រឹត្តិការណ៍សម្ភោធន៍នេះផងដែរ ។
បើតាមការបង្ហោះនៅលើ Weibo នៅថ្ងៃនេះ ក្រុមហ៊ុននេះ ក៏បានទម្លាយអំពីព័ត៌មានលម្អិតមួយចំនួនរបស់ស្មាតហ្វូននេះផងដែរ។ បើតាមប្រភពខាងលើនេះ បាននិយាយថា ស្មាតហ្វូនបត់បានជំនាន់ថ្មីម៉ូដែល Honor Magic Vs នេះ គឺនឹងមានការដាក់អោយប្រើប្រាស់នូវបន្ទះឈីប Snapdragon 8+ Gen 1។ ស្មាតហ្វូនជំនាន់ថ្មីនេះ អាចនឹងមានថាមពលថ្មភ្លោះដែលមានទំហំ 2030mAh និង 2870mAh។ ថាមពលថ្មនេះ ក៏ទ្រទ្រង់នូវបច្ចេកវិទ្យាសាកថ្មលឿន 66W fast charging។
ស្មាតហ្វូនបត់បានជំនាន់ថ្មី Honor Magic Vs នេះ នឹងមានការបំពាក់មកជាមួយនឹងអេក្រង់ដែលមានទំហំដល់ទៅ 7.9-អ៊ីង ហើយអេក្រង់នេះ គឺមានកម្រិត 2K នឹងទ្រទ្រង់បានជាមួយនូវល្បឿន 90Hz refresh rate ។ អេក្រង់នេះ គឺមានការឌីស្សាញទម្រង់ជា punch-hole។ គួរបញ្ជាក់ផងដែរថា ថ្មីៗនេះ ក្រុមហ៊ុននេះ ទើបតែប្រកាសបង្ហាញនូវវីដេអូផ្សព្វផ្សាយស្មាតហ្វូននេះដែលមានទម្រង់នៃការបត់ចូលក្នុងជាមួយនឹងគែមពណ៌មាសផងដែរ៕
