ថ្មីៗនេះមានការចាប់អារម្មមួយទៅលើបុគ្គលមួយរូបដែលលោកហ៊ានចំនាយលុយរហូតដល់ទៅជាងខ្ទង់ $218,000 ក្នុងការទិញយកស្បែកជើងផ្ទាត់ខ្សែសង្រែកចាស់មួយគូដែលត្រូវបានប្រើប្រាស់ដោយស្ថាបនិកក្រុមហ៊ុនផលិត iPhone គឺ Apple លោក Steve Jobs។ ស្បែកជើងចាស់មួយគូរបស់លោក Jobs គឺម៉ាក Birkenstock ហើយបើតាមសេចក្តីរាយការណ៍បានឲ្យដឹងថា កត្តាដែលធ្វើឲ្យបុគ្គលដែលជាអ្នកគាំទ្រផលិតផលរបស់ក្រុមហ៊ុន Apple រូបនោះហ៊ានចំណាយប្រាស់ខ្ទង់សែនដុល្លារដើម្បីទិញយកស្បែកចាស់មួយគូនេះ គឺលោកចង់ទុកវាជាកម្រងអនុស្សាវរីយ៍ ដែលលោកគិតថាស្បែកជើងនេះគឺមានជាប់នូវញើសឈាមរបស់កំពូលបិតាបច្ចេកវិទ្យាលោក Steve Jobs។
យ៉ាងណាមិញសម្រាប់ឈ្មោះបុគ្គលដែលបានទិញ និងក្លាយពីម្ចាស់ស្បែកជើងចាស់របស់លោក Steve Jobs គឺមិនត្រូវបានគេបញ្ចេញឈ្មោះនោះទេ។ ហើយលោកបានទិញស្បែកជើងម៉ាក Birkenstock ចាស់មួយគូនេះ ពីការដាក់ដេញថ្លៃមួយឈ្មោះថា Icons & Idols: Rock ‘N’ Roll Auction ដែលរៀបចំឡើងដោយ Julien’s House។
សូមបញ្ជាក់ថាស្បែកជើងផ្ទាត់ខ្សែសង្រែកចាស់មួយគូនេះត្រូវបានរក្សាទុកដោយលោក Mark Sheff ដែលអតិតអ្នកគ្រប់គ្រងផ្ទះរបស់ Steve Jobs។ លោក Sheff ត្រូវបានគេរាយការណ៍ថា លោកបានរើសស្បែកជើងម៉ាក Birkenstock មួយគូនេះពីធុងសំរាមនៅអំឡុងពេលដែលលោកបានបម្រើការនៅក្នុងផ្ទះស្ថាបនិកក្រុមហ៊ុន Apple Inc រូបនេះ។ ដំបូងឡើយ Auction House បានវាយតម្លៃពីការរំពឹងទុកថា ស្បែកជើង Birkenstock ចាស់មួយគូនេះអាចនឹងទទួលបានតម្លៃខ្ទ់ង $60,000 ប៉ុណ្ណោះ ប៉ុន្តែ ស្ទើរមិនគួរឲ្យជឿដោយសារតម្លៃរបស់វាបានហក់ឡើងលើការរំពឹងទុកដល់ជិត 4 ដងឯណោះជាមួយតម្លៃចុងក្រោយខ្ទង់ $218,750។
ជាមួយគ្នានេះមានការយល់ឃើញថា ការទិញយកស្បែកជើងម៉ាក Birkenstock ចាស់មួយគូដែលជារបស់ប្រើប្រាស់ផ្ទាល់ពីស្ថាបនិកក្រុមហ៊ុន Apple លោក Steve Jobs គឺជាការបង្ហាញពីគោរពស្រឡាញ់គាំទ្ររបស់អ្នកប្រើប្រាស់ចំពោះលោក Jobs ក៏ដូចជាក្រុមហ៊ុន Apple ផងដែរ។ ជាការពិតណាស់ក្រុមហ៊ុនបិតាបច្ចេកវិទ្យាអាមេរិកដែលមានមូលដ្ឋាននៅទីក្រុង Cupertino មួយនេះទទួលបានការគាំទ្រពីសំណាក់អ្នកប្រើប្រាស់យ៉ាងច្រើនលើសលប់នៅទូទាំងពិភពលោក ដោយក្នុងមួយឆ្នាំៗក្រុមហ៊ុននេះបានទាក់ទាញអតិថិជនថ្មីៗរាប់លាននាក់ឲ្យងាកមកជ្រើសរើសប្រើផលិតផលថ្មីៗរបស់ខ្លួនដែលមានរួមមានទូរស័ព្ទ iPhones ដ៏ទំនើប កុំព្យូទ័រយួរដៃ MacBook Series, នាឡិកាដៃឆ្លាតវៃ Apple Watch Series, iPads រួមនឹងផលិតផលបច្ចេកវិទ្យាជាច្រើនមុខផ្សេងៗទៀត៕
