ក្រុមហ៊ុន Huawei កំពុងតែអភិវឌ្ឍទៅលើប្រព័ន្ធប្រតិបត្តិការថ្មីរបស់ខ្លួន ដែលមានឈ្មោះហៅថា Harmony OS NEXT។ ខុសប្លែកពីប្រព័ន្ធ systems កាលពីពេលមុននេះ ប្រព័ន្ធប្រតិបត្តិការថ្មីនេះ មិនទ្រទ្រង់ទៅលើ Android Apps នោះទេ ដែលនេះគឺជាការផ្លាស់ប្តូរដ៏ធំមួយ។ ពេលនេះ ក្រុមហ៊ុននេះ ក៏បានធ្វើការកែប្រែដ៏សំខាន់មួយទៀតតាមរយៈការកែប្រែទៅលើ Harmony kernel របស់ខ្លួនផ្អែកនៅលើ HarmonyOS NEXT។ នេះ គឺជាការចាកចេញពី Linux kernel ដែលមានទម្រង់ផ្អែកនៅលើប្រព័ន្ធប្រតិបត្តិការជាច្រើន ដែលក្នុងនោះ ក៏មាន Android ផងដែរ។
ការផ្លាស់ប្តូរនេះ គឺជាហានិភ័យដ៏ធំមួយសម្រាប់ក្រុមហ៊ុន Huawei ប៉ុន្តែប្រព័ន្ធនេះក៏ជាចលករមួយជម្រុញក្រុមហ៊ុននេះអោយកាន់តែខ្លាំងផងដែរ បន្ទាប់ការប្រឈមមុខដោយសារតែនយោបាយពិភពលោកអស់ពេលជាច្រើនកន្លងមក។ ប្រព័ន្ធប្រតិបត្តិការ HarmonyOS NEXT នេះ គឺផ្អែកទោលើវិធីសាស្រ្តក្នុងការដោះស្រាយទៅលើបញ្ហាទាំងនេះ និងការព្យាយាមក្នុងការបង្កើតទៅលើអត្តសញ្ញាណផ្ទាល់ខ្លួននៅក្នុងពិភព OS របស់ខ្លួន។
ក្រុមហ៊ុន Huawei បានអះអាងថា ប្រព័ន្ធប្រតិបត្តិការ HarmonyOS NEXT នេះ គឺមានប្រសិទ្ធិភាពល្អជាងមុន 3 ដងបើធៀបជាមួយនឹង Linux មានន័យថា ប្រព័ន្ធប្រតិបត្តិការនេះ គឺងាយស្រួលក្នុងការប្រើប្រាស់នៅលើឧបករណ៍ជាច្រើនដូចជាស្មាតហ្វូន កាសស្តាប់ និងឧបករណ៍ប្រើប្រាស់ជាច្រើនទៀត។ លក្ខណៈសម្បត្តិរបស់វាគឺការប្រើប្រាស់នូវ “heterogeneous native” ដែលអាចគ្រប់គ្រងទៅលើសមត្ថភាពបានយ៉ាងប្រសើរនៅលើ hardware ផ្សេងៗគ្នា។
លោក Yu Chengdong នាយកប្រិតបត្តិនៃក្រុមហ៊ុន Consumer Business Group របស់ក្រុមហ៊ុន Huawei បាននិយាយថា ប្រព័ន្ធ system ដែលហៅថា Hongmeng នៅក្នុងប្រទេសចិននោះ គឺបង្កើតឡើងក្នុងការអភិវឌ្ឍដោយក្រុមហ៊ុន Huawei ។ នេះមានន័យថា វាអាចប្រើប្រាស់បាននៅលើឧបករណ៍ជាច្រើន។ ប្រព័ន្ធប្រតិបត្តិការ HarmonyOS NEXT ទទួលបាននូវវិញ្ញាបនបត្រទៅលើប្រព័ន្ធសុវត្ថិភាពចំនួន 3 នៅក្នុងឧស្សាហកម្មនេះ ដែលនេះ បង្ហាញអំពីកម្រិតសុវត្ថិភាពនៅក្នុង kernel របស់វា។
ការបង្កើតនូវ HarmonyOS NEXT នេះ គឺជាផ្នែកមួយដ៏ធំនៃយុទ្ធសាស្រ្តរបស់ក្រុមហ៊ុន Huawei ។ ក្រុមហ៊ុននេះ ក៏ផ្តោតទៅលើការកែប្រែទៅតាមនិន្នាការជាច្រើន ដែលក្នុងនោះមានការផ្តោតទៅលើមុខងារ AI ជាច្រើននៅក្នុង OS ដែលផ្តល់នូវសេវាកម្មកាន់តែឆ្លាតជាងមុន និងប្រសិទ្ធិភាពខ្ពស់ជាងមុនថែមទៀត។ សម្រាប់ភាពជោគជ័យនៃ HarmonyOS NEXT នៅមិនទាន់ដឹងនៅឡើយទេ!
