យោងទៅលើការការបង្ហោះសារនៅ Tweet នៅលើបណ្តាញ X (អតីត Twitter) នាពេលថ្មីៗនេះ របស់មេធំ និងជានាយកប្រតិបត្តិក្រុមហ៊ុនរថយន្តអគ្គិសនី Tesla គឺមហាសេដ្ឋីមានផុតលេខលោក Elon Musk បាននិយាយថា កំពូលរថយន្តស៊េរីថ្មី Tesla Roadster នឹងមានសមត្ថភាពហោះហើរ។ ហើយប្រសិនបើការអះអាងរបស់ Elon Musk ជាការពិតមែននោះ Roadster នឹងក្លាយជារថយន្តដែលនឹងទទួលបានការចាប់អារម្មណ៍កាន់តែខ្លាំងក្នុងទីផ្សាររថយន្ត។ លោក Elon Musk មិនបានបង្ហាញព័ត៌មានលម្អិតបន្ថែមដើម្បីជាអំណះអំណានគាំទ្រសម្រាប់ការអះអាងរបស់គាត់នោះទេ ប៉ុន្តែ ការបង្ហោះសារនេះ គឺបានទាក់ទាញចំណាប់អារម្មណ៍ជាខ្លាំងពីសំណាក់អ្នកឃ្លាំមើលក្នុងឧស្សាហកម្មមួយនេះ។
យ៉ាងណាមិញក៏មានការលើកឡើងថា សម្រាប់ការអះអាងរបស់លោក Elon Musk នាពេលកន្លងមកសម្រាប់អនាគតរថយន្តអគ្គិសនីរបស់ Tesla ហាក់មិនមានភាពត្រឹមត្រូវនោះទេនៅពេលការបង្ហាញវត្តមានជាផ្លូវការណ៍។ ទោះយ៉ាងណាក៏ដោយ ការអះអាងរបស់ CEO រូបនេះ ទំនងជាបង្ហាញថា កំពូលរថយន្តនាពេលអនាគត គឺ Tesla Roadmaster គឺនឹងមានល្បឿនលឿនខ្លាំងបំផុត។ លោក Musk ក៏ធ្លាប់ធ្វើការអះអាងថា រថយន្តស៊េរីថ្មី Roadmaster នឹងអាចហោះហើរបាន។ រថយន្តស៊េរីថ្មីនេះត្រូវបានក្រុមហ៊ុនប្រកាសបង្ហាញលើកដំបូងកាលពី 7 ឆ្នាំមុនក្នុងអំឡុងពេលព្រឹត្តិការណ៍ Semi and Roadster របស់ក្រុមហ៊ុន Tesla។
Roadster គឺជាយានយន្តលំដាប់កំពូលរបស់ Tesla ដែលមាននៅក្នុងបញ្ជីដែលមិនទាន់ត្រូវបានប្រកាសចេញផ្លូវការណ៍ចាប់តាំងពីឆ្នាំ 2020 មកម្ល៉េះ។ Roadmaster ត្រូវបានគេនិយាយថា គឺជាអ្នកស្នងតំណែងពី Roadster ស៊េរីឆ្នាំ 2008 ដែលត្រូវបានផលិតឡើយដោយប្រើទម្រង់ Elise platform ។ Roadster ត្រូវបានប្រកាសដាក់ចូលក្នុងម៉ាកយីហោ របស់ Tesla ក្នុងបញ្ចីទីផ្សាររថយន្តអគ្គិសនី។Tesla Roadster ត្រូវបានក្រុមហ៊ុនបញ្ជាក់ថា មានសមត្ថភាពអាចបង្កើនសន្ទុះល្បឿនពី 0 ទៅ 100km/h ប្រើពេលត្រឹមតែ 1.9 វិនាទីប៉ុណ្ណោះ។ ដោយបច្ចុប្បន្ននេះមានរថយន្តម៉ាក Tesla និង Lucid មួយចំនួនដែលមានសមត្ថភាពអាចជាន់សន្ទុះល្បឿនប្រសើរជាង 0 ទៅ 100km/h ប្រើពេលតិចជាង 2 វិនាទី។ លើសពីនេះទៅទៀតរថយន្តទំនើបក្នុងប្រភេទដូចគ្នាជាមួយ Roadster អាចសម្រេចបាននូវការជាន់សន្ទុះល្បឿនពី 0 ទៅ 100km/h ដោយប្រើរយៈពេលត្រឹម 1.7 វិនាទី។
នាអំឡុងឆ្នាំ 2021 លោក Elon Musk បានអះអាងថា Tesla Roadster អាចបង្កើនល្បឿនពី 0 ទៅ 100km/h ប្រើរយៈពេលត្រឹមតែ 1.1 វិនាទីប៉ុណ្ណោះ។ ដោយល្បឿនលឿនដ៏មហិមានេះ ត្រូវបានលោកបញ្ជាក់ថា Roadster ត្រូវបានផលិតឡើងដោយរួមបញ្ចូលនូវកញ្ចប់បច្ចេកវិទ្យារបស់ SpaceX ដែលក្នុងនោះរួមបញ្ចូលនូវបច្ចេកវិទ្យារ៉ុក្កែតតូចៗរហូតដល់ 10 ដែលរៀបចំបំពាក់ជុំវិញរថយន្ត។ មុខងារនេះត្រូវបាន Tesla ប្រកាសបង្ហាញនៅក្នុងឆ្នាំ 2018 ហើយវាជាលើកដំបូងហើយដែលលោក Elon Musk អះអាងថា Roadster អាចហោះហើរបាន។ ប្រសិនបើអ្វីៗដំណើរការដូចការគ្រោងទុក កំពូលរថយន្តអគ្គិសនីកំពូលល្បឿន Tesla Roadster ត្រូវបានគេរំពឹងថានឹងប្រកាសចេញផ្លូវការនៅឆ្នាំនេះ ហើយនឹងចូលសង្វាក់ផលិតកម្មនៅឆ្នាំ 2025។ សម្រាប់តម្លៃបឋមរបស់ Roadster គឺខ្ទង់ 20 ម៉ឺនដុល្លារអាមេរិក៕