យោងតាមប្រភពថ្មីមួយចេញពីប្រទេសកូរ៉េខាងត្បូង បានឲ្យដឹងថា ក្រុមហ៊ុនផលិតរថយន្តឈានមុខគេរបស់កូរ៉េខាងត្បូង Kia នឹងចាប់ផ្តើមសង្វាក់ផលិតកម្មរថយន្តអគ្គិសនីប្រភេទ Sedan ស៊េរីថ្មី EV4 នៅក្នុងខែមិនា ឆ្នាំ 2025។ ក្រុមហ៊ុន Kia គ្រោងផលិតរថយន្តអគ្គិសនីស៊េរីថ្មី EV4 នេះ ឲ្យបានចំនួន 70,000 គ្រឿង ក្នុងឆ្នាំ 2025 នៅរោងចក្ររបស់ខ្លួនក្នុងប្រទេសកូរ៉េខាងត្បូង។
រថយន្តអគ្គិសនីស៊េរីថ្មីនេះ ត្រូវបានគេដឹងថា នឹងជារថយន្តអគ្គិសនីដែលមានតម្លៃសមរម្យ ដែលនឹងចូលរួមចំនែកជាមួយ Kia EV3 ក្នុងការប្រគូតប្រជែងទីផ្សារ និងតម្រូវការរបស់អ្នកប្រើប្រាស់ហើយដើម្បីបង្កើនចំណែកទីផ្សារលក់រថយន្តអគ្គិសនីរបស់ខ្លួនថែមមួយកម្រិតទៀត។ គំរូរថយន្តអគ្គិសនី Kia EV4 ត្រូវបានបង្ហាញដំបូងកាលពីខែមុននេះ (ឧសភា) ហើយការធ្វើតេស្តរបស់ Kia EV4 ត្រូវបានចាប់ផ្តើមធ្វើឡើងនៅលើដងវិថីក្នុងប្រទេសកូរ៉េខាងត្បូង រួមនឹងនៅបណ្តាទីផ្សារអន្តរជាតិសំខាន់ៗមួយចំនួនផងដែរ។
បន្ទាប់ពីការធ្វើតេស្តបន្ថែមទៀតក្នុងរយះពេលពេញមួយឆ្នាំរបស់រថយន្តអគ្គិសនីស៊េរីថ្មី Kia EV4 នឹងត្រូវធ្វើការបិទបញ្ចប់នៅខែកុម្ភៈ ឆ្នាំ 2025 មុនពេលការផលិតចាប់ផ្តើមនៅក្នុងខែមីនា។ បច្ចុប្បន្ន Kia កំពុងពិនិត្យមើលថា តើត្រូវផលិតរថយន្តអគ្គិសនីស៊េរីថ្មី EV4 នៅរោងចក្ររបស់ខ្លួននៅក្រៅប្រទេសកូរ៉េខាងត្បូងដែរឬអត់ទេ។ បច្ចុប្បន្នសម្រាប់គុណសម្បត្តិបច្ចេកទេស និងតម្លៃរបស់ Kia EV4 Sedan មិនទាន់ត្រូវបានទម្លាយចេញនៅឡើយទេ៕
