កាលពីម្សិលមិញនេះ realme បានបញ្ជាក់ស្មាតហ្វូនម៉ូដែល realme GT5 ជាផ្លូវការណ៍ហើយ ដោយស្មាតហ្វូនជំនាន់ថ្មីនេះបានគាំទ្របច្ចេកវិទ្យាសាកភ្លើងល្បឿនលឿនកំលាំង 150W និង 240W ជាមួយជម្រើសរ៉េម On-board ទំហំដល់ 24GB។ ក្រៅពីម៉ូដែលដែលមានរ៉េមទំហំ 24GB ទៅ realme ក៏ផ្តល់នូវជម្រើសម៉ូដែលបំពាក់រ៉េមទំហំ 12GB ជាមួយម៉េមូរីទំហំ 256GB និង 16GB ជាមួយម៉េមូរីទំហំ 512GB រីឯម៉ូដែលរ៉េមទំហំ 24GB មានម៉េមូរីទំហំដល់ 1TB។
ជាមួយគ្នានេះសម្រាប់ម៉ូដែល 12GB/256GB និង 16GB/512GB មានតម្លៃប្រហែល $410 និង $450។ ចំនែកម៉ូដែលរ៉េមទំហំ 24GB/1TB ជាមួយកំលាំងសាកភ្លើងល្បឿនលឿន 240W មានតម្លៃប្រហែល $520។ សម្រាប់ទំហំថ្មវិញម៉ូដែល realme GT5 150W មានថ្មទំហំ 5,240mAh ចំនែកម៉ូដែល TG5 240W មានថ្មទំហំ 4,600mAh។ បើតាមការអះអាងពី realme បាននិយាយថា ល្បឿនសាកភ្លើងនៅលើ realme GT5 240W សាកប្រមាណ 80 វិនាទីអាចបំពេញថាមពលថ្មបានដល់ 20% រីម៉ូដែល GT5 150W សាកប្រមាណ 7 នាទី អាចបំពេញថាមពលថ្មបានដល់ 50%។
realme GT5 Series បានប្រើប្រាស់បន្ទះឈីប Snapdragon 8 Gen 2 ជាមួយស្រទាប់ការពារការឡើងកំដៅ 9-layer cooling vapor chamber system ដែលមានផ្ទៃទំហំដល់ 20,827mm²។ ស្មាតហ្វូនជំនាន់ថ្មីនេះមានអេក្រង់ជាប្រភេទ Flat-AMOLED Display 144Hz ទំហំ 6.74 អ៊ីង គាំទ្រកម្រិតបង្ហាញ 1,240 x 2,772px លើខ្នាត 20:9 ratio ជាមួយកម្រិតទឹកពណ៌ 10-bit រួមនិងបច្ចេកវិទ្យា 100% DCI-P3 និងកម្រិតពន្លឺខ្ពស់ដល់ 1,400nits ហើយនិងប្រើនូវប្រព័ន្ធពន្លឺបញ្ចាំង 2,160Hz high frequency PWM dimming។
realme GT 5 មានកាមេរ៉ាក្រោយទំហំ 50MP ប្រើសែនស័រ Sony IMX890 ខ្នាត 1/1.56” មាន aperture f/1.9 និងមាន OIS។ សម្រាប់លែនបន្ថែមពីរគ្រាប់ទៀតមាន Ultrawide lens 120 ដឺក្រេទំហំ 8MP និង Macro ទំហំ 2MP ជាមួយអំពូល LED Flash រួមនឹងភ្លើង LED Light រាងចតុកោណកែងព័ទ្ធជុំវិញស្លាកសញ្ញាឈីប Snapdragon ដ៏ទាក់ទាញ ហើយភ្លើង LED Light នេះ អាចធ្វើការកំណត់ប្តូរពណ៌បានដល់ 16 ពណ៌ និងកម្រិតពន្លឺបាន 5 កម្រិតថែមទៀតផង។ ចំនែកសែនស័រកាមេរ៉ាសែលហ្វីមានទំហំ 16MP ប្រើសែនស័រ Samsung-S5K3P9 ស្ថិតក្នុងលែនទំលុះថ្ងាសអេក្រង់។
សម្រាប់មុខងារពិសេសៗមួយចំនួនផ្សេងទៀតមានដូចជា គាទ្រការប្រើប្រាស់ស៊ីមកាត 5G បានពីរ, មានប្រព័ន្ធអង់តែនចាប់សេវា Wi-Fi ចំនួន 4 គាំទ្រជាមួយ Wi-Fi 7, Bluetooth v5.3, ប្រព័ន្ធបំពងសំឡេង Stereo Speaker គាំទ្របច្ចេកវិទ្យាសំឡេង Dolby Atmos/Hi-Res Audio, ប្រព័ន្ធ 3-band GPS, ប្រព័ន្ធរំញ័រ Haptic feedback ប្រភេទ X-axis linear motor ហើយនិងបច្ចេកវិទ្យាស្កែនក្រយ៉ៅម្រាមដៃដក្រោមអេក្រង់ល្បឿនលឿន 0.25s ជាដើម។ realme GT5 ត្រូវបានក្រុមហ៊ុនដាក់ឲ្យធ្វើការបញ្ជាទិញមុនបានចាប់ពីថ្ងៃប្រកាសចេញនេះទៅ ហើយសម្រាប់ការចេញលក់ផ្លូវការណ៍នឹងធ្វើឡើងនៅថ្ងៃចន្ទ ទី 04 ខែកញ្ញា ខាងមុខនេះ សម្រាប់ទីផ្សារប្រទេសចិន។ ស្មាតហ្វូនជំនាន់ថ្មីនេះ មានជម្រើសពណ៌ទឹកប្រាក់ថ្លាបែបកញ្ចក់, បៃតង និងខ្មៅ៕
