យោងតាមព័ត៌មានថ្មីកាលពីពេលថ្មីៗនេះបានបញ្ជាក់ថា ក្រុមហ៊ុន Huawei នឹងប្រកាសចេញនូវស្មាតហ្វូនជំនាន់ថ្មីរបស់ខ្លួន Mate 60 lineup នៅក្នុងពេលឆាប់ៗនេះហើយ។ គួរបញ្ជាក់ថា កាលពីសប្តាហ៌មុននេះ ក្រុមហ៊ុន Huawei បានបង្ហាញចេញនូវស្មាតហ្វូន Mate60 និង Mate60 Pro ដោយស្មាតហ្វូនជំនាន់ថ្មីទំាងពីរនេះ នឹងមានការប្រើប្រាស់នូវបន្ទះឈីប Kirin 9000s។ របាយការណ៌ដដែលបានបន្តថា ស្មាតហ្វូនដែលស្ថិតនៅក្នុងស្រឡាយ Mate60 Series នេះ ក៏នឹងម៉ូដែលថ្មី Mate60 Pro+ និង Mate60 RS Ultimate Design ដែលគ្រោងនឹងប្រកាសចេញនៅក្នុងខែកញ្ញានេះផងដែរ។
ថ្មីៗនេះ មានការទម្លាយនូវរូបភាពថ្មីមួយ ដែលបានបង្ហាញចេញនូវលេខម៉ូដែលរបស់ស្មាតហ្វូន Mate60 Pro+ នេះហើយ។ Huawei Mate60 Pro+ មានលេខម៉ូដែល ALN-AL10 ហើយនៅលើរូបភាពថ្មីនេះ ក៏មានបង្ហាញពីអង្គចងចាំទំហំ 512GB និង 1TB ផងដែរ។ ស្មាតហ្វូនជំនាន់ថ្មីទាំងពីរនេះ នឹងមានរ៉េមទំហំ 16GB ដូចគ្នា។ របាយការណ៌ដដែលនេះ បានបន្តថា Mate60 Pro+ នឹងមានការដាក់អោយប្រើប្រាស់នូវបន្ទះ Kirin 9100។ សម្រាប់ការថតរូប ស្មាតហ្វូននេះ គឺមានការបំពាក់នូវកាមេរ៉ាក្រោយ 4 គ្រាប់។
Mate60 Pro+ ត្រូវបានគេរាយការណ៌ថា នឹងមានម៉ូដែលពិសេសមួយទៀតហៅថា Huawei Mate 60 RS Ultimate Design។ សម្រាប់ម៉ូដែលនេះ ត្រូវបានគេរំពឹងថា នឹងមកជំនួសកន្លែងម៉ូដែល “Porsche Design” ដែលធ្លាប់ប្រើប្រាស់កន្លងមកនៅលើ Mate Series។ Mate60 Pro+ និង Ultimate Design នៅមិនទាន់មានការទម្លាយព័ត៌មានស៊ីជម្រៅនោះទេ ប៉ុន្តែមានរបាយការណ៌ថា ស្មាតហ្វូនទាំងពីរនេះ នឹងសមត្ថភាពខ្ពស់កប់ជាក់ជាមិនខាន។
សូមជំរាបថា Mate60 Pro បានបង្ហាញវត្តមានជាមួយនិងទំហំ 12GB+256GB, 12GB+512GB និងទំហំ 12GB+1TB ហើយនិងមានតម្លៃ 6,499 Yuan (~$887), 6,999 Yuan (~$956) និង 7,999 Yuan (~$1,092)។ មានការទម្លាយថា Mate60 Pro+ អាចនឹងមានតម្លៃ 8,999 Yuan (~$1,228)។
