នៅក្នុងខណៈពេលនេះមានលេចលឺព័ត៌មានអំពី iPhone Pro ជំនាន់បន្ទាប់ដែលចេញនៅឆ្នាំ 2024 គឺ iPhone 16 Pro និង 16 Pro Max ឬ 16 Ultra ជាបណ្តើរៗហើយ។ ហើយបើយោងទៅលើព័ត៌មានចចាមអារាមថ្មីនេះ បានបញ្ជាក់ពីគុណសម្បត្តិមួយចំនួនដែលនឹងមាននៅលើ iPhone ជំនាន់ថ្មីឆ្នាំ 2024 គឺ iPhone 16 Pro និង 16 Pro Max/Ultra។ បើតាមប្រភពបាននិយាយថា Apple នឹងមានការកែប្រែទៅលើលក្ខណៈសម្បត្តិថ្មីមួយចំនួននៅលើ iPhone ម៉ូដែល Pro ឆ្នាំ 2024 ហើយខាងក្រោមនេះ គឺជាលក្ខណៈសម្បត្តិថ្មីមួយចំនួនដែលនឹងធ្វើការ Upgraded បន្ថែមពីម៉ូដែល iPhone Pro Series ឆ្នាំនេះ។
-បន្ទះអេក្រង់ធំជាងមុនៈ បើតាមប្រភពរបាយការណ៍បាននិយាយថា Apple នឹងធ្វើការបង្កើនទំហំអេក្រង់របស់ iPhone 16 Pro Series ឲ្យធំជាងជំនាន់ 15 Pro Series ឆ្នាំនេះ។ បើតាមលោក Ross Young ដែលជាអ្នកជំនាញផ្នែកបន្ទះអេក្រង់មកពីស្ថាប័ន Display Supply Chain Consultant បាននិយាយថា iPhone 16 Pro នឹងកើនទំហំអេក្រង់ឡើងដល់ 6.3-inch ធៀបនឹង 6.1-inch នៅលើ iPhone 15 Pro រី iPhone 16 Pro នឹងកើនទំហំអេក្រង់ឡើងដល់ 6.9-inch ធៀបនឹង 6.7-inch នៅលើ iPhone 15 Pro បច្ចុប្បន្ន។
-បំពាក់បន្ថែមនូវប៊ូតុងថ្មីៈ យោងទៅលើការចុះផ្សាយនៅលើបណ្តាញ MacRumors បានឲ្យដឹងថា Apple មានគម្រោងក្នុងការដាក់បន្ថែមនូវប៊ូតុងថ្មីមួយទៀតហៅថា “Capture Button” ដែលនឹងស្ថិតនៅពីក្រោម Power Button សម្រាប់ iPhone 16 ទាំងអស់ ប៉ុន្តែ មិនមានការបញ្ជាក់ថា Capture Button នេះប្រើសម្រាប់គោលបំណងអ្វីនៅឡើយទេ ក៏ប៉ុន្តែបើតាមការសន្និដ្ឋានអាចប្រើសម្រាប់ការចុចថតរូបដូចគ្នានឹង Capture Button នៅលើស្មាតហ្វូនរបស់ SONY អីចឹងដែរ។
-បង្កើនទំហំសែនស័រកាមេរ៉ា Ultrawide ដល់ 48MP: បើតាមអ្នកវិភាគល្បីឈ្មោះលោក Jeff Pu បាននិយាយថា Apple នឹងបង្កើនទំហំសែនស័រកាមេរ៉ា Ultrawide ឡើងដល់ទំហំ 48MP នៅលើ iPhone 16 Pro និង 16 Pro Max/Ultra ដែលធ្វើឲ្យការថតរូបប្លង់ទូលាយបានកាន់តែច្បាស់ជាងជាមួយមុខងារ 0.5x Mode។
-គាំទ្របច្ចេកវិទ្យា Wi-Fi 7: លោក Jeff Pu បានបន្ថែមទៀតថា iPhone 16 Pro Series ក៏នឹងគាំទ្រប្រព័ន្ធបច្ចេកវិទ្យា Wi-Fi កម្រិសខ្ពស់ គឺ Wi-Fi 7 ដែលនឹងអនុញ្ញាតិឲ្យធ្វើការបញ្ចូន និងទទួលទិន្នន័យលើប្រព័ន្ធបណ្តាញ បានក្នុងកម្រិត 2.4GHz, 5GHz និង 6GHz ជាមួយកម្រិតរអាក់រអួល Low Latency ទាបបំផុត។ Wi-Fi 7 អាចនឹងផ្តល់នូវល្បឿនបញ្ចូនទិន្នន័យបានដល់ជាង 40Gbps ដែលលឿនជាង 4 ដងធៀបនឹង Wi-Fi 6E។
-ប្រើបន្ទះឈីបជំនាន់ថ្មីៈ iPhone 16 Pro និង 16 Pro Max/Ultra ក៏នឹងប្រើប្រាស់បន្ទះឈីបជំនាន់ថ្មី A18 Pro Bionic ដែលត្រូវផលិតតាមស្តង់ដារ 3nm ឬ N3E ជំនាន់ថ្មីជំនាន់ទីពីររបស់ TSMC។
-បច្ចេកវិទ្យាសេវាកម្រិតខ្ពស់ៈ បើតាមការលើកឡើងរបស់លោក Jeff Pu បានឲ្យដឹងថា iPhone 16 Pro និង 16 Pro Max/Ultra នឹងប្រើម៉ូឌឹមសេវា 5G ជំនាន់ថ្មី Snapdragon X75 របស់ Qualcomm ដែលមានអនុភាពល្បឿនលឿន និងសេវាខ្លាំងជាងជំនាន់បច្ចុប្បន្ន ជាមួយនឹងកម្រិតល្បឿន 5G Advance ដែលជាបច្ចេកវិទ្យាសេវាកម្រិតខ្ពស់ក្នុងការអភិវឌ្ឍន៍ទៅកាន់បច្ចេកវិទ្យាជំនាន់ថ្មី 6G Connectivity។
-បច្ចេកវិទ្យាកាមេរ៉ា Tetraprism: នៅលើ iPhone 15 Pro Series បច្ចុប្បន្ន បានបំពាក់នូវបច្ចេកវិទ្យា Tetraprism Lens System ដែលមានលទ្ធភាពក្នុងការពង្រីកប្លង់ថតរូបបានដល់ 5x ហើយប្រព័ន្ធបច្ចេកវិទ្យាកាមេរ៉ានេះ ក៏នឹងបន្តប្រើនៅលើ iPhone 16 Pro Series ដែលចេញនៅឆ្នាំក្រោយផងដែរ នេះបើតាមការបញ្ជាក់ពីអ្នកវិភាគល្បីឈ្មោះលោក Ming Chi-Kuo។
ជាចុងក្រោយ Apple ត្រូវបានគេដឹងថា នឹងធ្វើការប្រកាសចេញ iPhone 16 Series នៅខែកញ្ញា ឆ្នាំ 2024 ដែលមានដូចជា iPhone 16, iPhone 16 Pro, iPhone 16 Plus និង iPhone 16 Pro Max ឬ 16 Ultra៕
