ស្មាតហ្វូនស៊េរីថ្មីចំនួនពីរម៉ូដែលរបស់ realme ត្រូវបានបង្ហាញវត្តមាននៅលើបញ្ចីនៃបណ្តាញ China Telecom ជាមួយនឹងការបង្ហាញចេញពីគុណសម្បត្តិលម្អិតមួយចំនួន។ ស្មាតហ្វូនស៊េរីថ្មីទាំងពីររបស់ក្រុមហ៊ុន realme ដែលបានបង្ហាញនៅលើបញ្ចីរបស់ China Telecom ត្រូវបានគេដឹងថា ជាម៉ូដែល realme V50 និង V50s។បើតាមរូបភាពដែលបានបង្ហាញច្បាស់ៗនេះ ឲ្យឃើញថា ការរចនាស្មាតហ្វូនស៊េរីថ្មីទាំងពីររបស់ realme គឺដូចគ្នាទាំងស្រុងតែម្តង គ្រាន់តែអាចខុសគ្នាទៅលើគុណសម្បត្តិមួយចំនួន និងការចេញលក់នៅទីផ្សារផ្សេងគ្នាក្រៅពីទីផ្សារប្រទេសចិន។
realme V50 និង V50e នឹងបំពាក់បន្ទះឈីប MediaTek Dimensity 6100+ គាំទ្រប្រព័ន្ធសេវា 5G និងមានជម្រើសរ៉េមចំនួន 3 ហើយនិងម៉េមូរីចំនួន 2 ទំហំ។ ស្មាតហ្វូនទាំងពីរនេះ នឹងមានអេក្រង់កម្រិត Full-HD+ ជាប្រភេទបន្ទះបង្ហាញ LCD Display ទំហំ 6.72 អ៊ីង ដោយមានប្រជ្រុយកណ្តាលថ្ងាសមួយគ្រាប់ដែលភ្ជាប់សែនស័រកាមេរ៉ាសែលហ្វីទំហំ 8MP។ realme V50/V50e នឹងមានកាមេរ៉ាក្រោយរចនាជាកង់រង្វង់ធំ ដោយមានបង្កប់នូវលែនកាមេរ៉ាពីរគ្រាប់ភ្ជាប់ដោយសែនស័រទំហំ 13MP (Main) និង 2MP (Macro/Portrait) ។
នៅលើបញ្ជីរបស់ China Telecom បង្ហាញថា ស្មាតហ្វូនស៊េរីថ្មីរបស់ realme គឺមានប្រើរន្ធសាកភ្លើងប្រភេទUSB-C, រន្ធដោតកាសខ្នាត 3.5mm, និងអាចដាក់ microSD បន្ថែមបានដល់ទំហំ 256GB។ សម្រាប់តម្លៃវិញ ត្រូវបានគេប៉ាន់ប្រមាណជាបឋមថា realme V50/V50e នឹងមានតម្លៃខ្ទង់ $170 សម្រាប់ម៉ូដែល 4GB RAM+128GB Storage, ខ្ទង់ $210 សម្រាប់ម៉ូដែល 6GB RAM+128GB Storage និង $250 សម្រាប់ម៉ូដែល 8GB RAM+256GB Storage។ ទោះជាយ៉ាង មិនទាន់មានព័ត៌មានបញ្ជាក់ពីការថ្ងៃប្រកាសចេញរបស់ស្មាតហ្វូនកម្រិតថវិការស៊េរីថ្មីទាំងពីររបស់ realme ឡើយ៕
