ក្រុមហ៊ុន vivo នឹងធ្វើការប្រកាសចេញស្មាតហ្វូន Mid-range Flagship ជំនាន់ថ្មី V30 Series ក្នុងពេលឆាប់ៗខាងមុខនេះ។ ស្មាតហ្វូនជំនាន់ថ្មីនេះដំបូងឡើង ត្រូវបានគេដឹងថាមានតែម៉ូដែល V30 និង V30 Pro តែប៉ុណ្ណោះដែលនឹងត្រូវបង្ហាញខ្លួន ប៉ុន្តែ នៅពេលនេះ ក៏មានការទម្លាយថា V30 Series ក៏មានសមាជិតមួយបន្ថែមទៀត គឺ V30 Lite ផងដែរ។
បើតាមប្រភពរបាយការណ៍ព័ត៌មានដែលបានទម្លាយចេញថ្មីៗនេះ បាននិយាយថា vivo V30 Lite ដែលត្រៀមបង្ហាញវត្តមានឆាប់ៗជាមួយ V30 និង V30 Pro គឺនឹងមានជម្រើសពីរម៉ូដែល មានម៉ូដែលបំពាក់រ៉េមទំហំ 8GB ជាមួយម៉េមូរីទំហំ 128GB និងរ៉េមទំហំ 12GB ជាមួយម៉េមូរីទំហំ 256GB។ ហើយ V30 Lite ក៏នឹងមានថ្មទំហំ 4,700mAh និងគាំទ្របច្ចេកវិទ្យាសាកថ្មល្បឿនលឿនកំលាំង 44W Wired Fast Charging តាមរយះរន្ធចម្លង USB-C។ ស្មាតហ្វូនកម្រិតថវិកាដែលជាសមាជិតក្នុងគ្រួសារ Vivo V30 Series នេះ ក៏នឹងគាំទ្រការដំឡើងមកជាមួយ Android 13 ចេញពីប្រអប់ស្រាប់តែម្តង។
ប្រភពរបាយការណ៍ក៏បានបញ្ជាក់ទៀតថា vivo V30 Lite អាចជាម៉ូដែលសម្រាប់ទីផ្សារសកលដែលបានប្តូរឈ្មោះចេញពីម៉ូដែល Vivo V29e ដែលបានប្រកាសចេញកាលពីដើមខែតុលានៅក្នងប្រទេសចិន។ ហើយប្រសិនបើរបាយការណ៍នេះពិតនោះ មានន័យថា vivo V30 Lite គឺនឹងមានអេក្រង់ FHD+ AMOLED 120Hz ទំហំ 6.67-inch ដែលមានគែមកោងដូចគ្នានឹង V29e ដែរ។ សម្រាប់បន្ទះឈីបវិញ vivo V29e បានបំពាក់នូវឈីប Qualcomm Snapdragon 695 SoC, មានលែនកាមេរ៉ាក្រោយពីរគ្រាប់ភ្ជាប់ដោយសែនស័រមេទំហំ 50MP និងមានសែនស័រសែលហ្វីទំហំ 50MP។ ចំពោះម៉ូដែល vivo V30 ត្រូវបានបង្ហាញនៅលើបញ្ចីរបស់កម្មវិធី Geekbench ជាមួយការប្រើប្រាស់បន្ទះឈីបជំនាន់ថ្មី Qualcomm Snapdragon 7 Gen 3 ខណៈម៉ូដែល V30 Pro ទំនងជានឹងប្រើកំពូលឈីប MediaTek Dimensity 8200 SoC និងភ្ជាប់ដោយរ៉េមទំហំ 12GB៕
