យោងតាមការចេញផ្សាយព័ត៌មានកាលពីប៉ុន្មានថ្ងៃមុននេះ បានអោយដឹងថា OPPO នឹងមានការប្រកាសចេញនូវស្មាតហ្វូនជំនាន់ថ្មី OPPO Find X7 Series នៅលើទីផ្សារប្រទេសចិននាចុងខែមករាខាងមុខនេះហើយ ដោយរបាយការណ៌ខាងលើបានបន្ថែមថា ស្មាតហ្វូននេះ នឹងមាន Find X7 ហើយនិង Find X7 Pro។ ប៉ុន្តែបើតាមរបាយការណ៌ថ្មីនេះ បានបបញ្ជាក់ថា ក្រុមហ៊ុននេះ ក៏នឹងមានការប្រកាសចេញនូវម៉ូដែលថ្មីមួយទៀតដែលមានឈ្មោះថា Find X7 Ultra ផងដែរ។
កាលពីម្សិលមិញនេះ អ្នកទម្លាយ Digital Chat Station ក៏បានបង្ហោះនៅលើ Weibo ផងដែរ ដោយមានការបញ្ជាក់ថា ស្មាតហ្វូននេះនឹងមាន 3 ម៉ូដែល ក្នុងនោះមានដូចជា Find X7, Find X7 Pro និង Find X7 Ultra។ នៅក្នុងរបាយការណ៌នោះ បានបញ្ជាក់ទៀតថា Find X7 នឹងមានការប្រើប្រាស់បន្ទះឈីប Dimensity 9300 ខណៈដែល Find X7 Pro នឹងមានការប្រើប្រាស់បន្ទះឈីប Snapdragon 8 Gen 3 SoC។ នៅថ្ងៃនេះ អ្នកទម្លាយរូបនេះបានបន្តចែកចាយនូវព័ត៌មានបន្ទះឈីបដែលប្រើលើ OPPO Find X7 Ultra រួននិងថ្មរបស់ X7 Pro ហើយនិង X7 ថែមទៀតហើយ។
សូមជំរាបថា កន្លងមក Digital Chat Station ក៏ធ្លាប់មានការបញ្ជាក់ថា Find X7 នឹងបំពាក់នូវបន្ទះឈីបជំនាន់ថ្មី Dimensity 9300 និងមានថ្មទំហំ 5,000mAh ផងដែរ។ ចំពោះម៉ូដែល Pro វិញ គឺនឹងមានការបំពាក់នូវបន្ទះឈីប Snapdragon 8 Gen 3 SoC និងមានថ្មទំហំ 4,860mAh។ សម្រាប់ Find X7 Ultra ដែលជាបងធំគេ ត្រូវគេព្យាករណ៌ថា នឹងមានលក្ខណៈសម្បត្តិដូចម៉ូដែល Pro អញ្ចឹងដែរ គឺនឹងប្រើឈីប Snapdragon 8 Gen 3 SoC ហើយនិងថ្មទំហំ 5,000mAh។
នៅក្នុងនោះក៏មានការរំពឹងថា ម៉ូដែលនេះ នឹងមានការប្រើប្រាស់នូវសិនស័រ Dual Periscope ថែមទៀតផង។ Find X7 Ultra អាចនឹងមានការប្រើប្រាស់នូវសិនស័រកាមេរ៉ាទំហំ 1-អ៊ីដ LYT-900 នៅលើកាមេរ៉ាគោលទំហំ 50-Megapixel និងគ្រាប់ទីពីរ 50-Megapixel ultra-wide lens ហើយនិងគ្រាប់ទីបីជាសិនស័រ IMX890 ទំហំ 50-Megapixel periscope telephoto ដែលហ៊្សូមបាន 3x optical zoom។ ចំពោះគ្រាប់ទី 4 គឺប្រើសិនស័រ IMX858 50-megapixel periscope zoom ហ៊្សូមបាន 6x optical zoom។
