បន្ទាប់ពីការទម្លាយព័ត៌មានជាច្រើនរួចមក នៅពេលនេះ ក្រុមហ៊ុន vivo បានចេញមកបញ្ជាក់ជាផ្លូវការអំពីកាលបរិច្ឆេទនៃការប្រកាសចេញនូវស្មាតហ្វូន X100 series របស់ខ្លួននៅក្នុងប្រទេសឥណ្ឌាហើយ។ ស្មាតហ្វូន Vivo X100 series នឹងបង្ហាញខ្លួននៅក្នុងប្រទេសឥណ្ឌានៅថ្ងៃទី 4 ខែមករាឆ្នាំ 2024 នេះ។ នៅថ្ងៃនេះ ក្រុមហ៊ុននេះ ទើបតែចែករំលែកអំពីព័ត៌មាននេះនៅលើបណ្តាញសង្គមរបស់ខ្លួនដែលមានការទម្លាយអំពីកាលបរិច្ឆេទនៃការសម្ពោធស្មាតហ្វូននេះ នៅម៉ោង 12 PM Indian Standard Time (IST)។
អ្វីដែលគួរអោយកត់សម្គាល់នោះ ប្រទេសម៉ាឡេស៊ី ក៏នឹងក្លាយជាទីផ្សារដំបូងបំផុតមុនគេនៅក្នុងប្រទេសចិន ដែលទទួលបាននូវស្មាតហ្វូន X100 series ខណៈពេលដែលកាលបរិច្ឆេទនៃការប្រកាសជាផ្លូវការរបស់ស្មាតហ្វូននេះគឺនៅថ្ងៃទី 3 ខែមករាខាងមុខនេះ។ ចាប់តាំងពីស្មាតហ្វូននេះ បានបង្ហាញខ្លួនរួចហើយនៅក្នុងប្រទេសចិននោះ ពេលនេះ យើងបានដឹងអំពីលក្ខណៈសម្បត្តិ និងមុខងារជាច្រើនរបស់ស្មាតហ្វូន។
ស្មាតហ្វូន vivo X100 និង X100 Pro មានអេក្រង់ទំហំ 6.78-អ៊ីង ដែលមានគែមកោង OLED និងបង្ហាញចេញជាមួយនឹងកម្រិតភាពច្បាស់ 1.5K resolution ល្បឿន 120Hz refresh rate ហើយនិងពន្លឺអេក្រង់ 3000nits។ ស្មាតហ្វូននេះ មានកាមេរ៉ាខាងមុខទំហំ 32-Megapixel selfie ផងដែរ។ សម្រាប់កម្លាំងម៉ាស៊ីនស្មាតហ្វូននេះវិញ គឺប្រើប្រាស់នូវបន្ទះឈីប Dimensity 9300, រ៉េម LPDDR5x RAM និងអង្គចងចាំ UFS 4.0 ហើយនិងមានប្រព័ន្ធប្រតិបត្តិការ Android 14។
ស្មាតហ្វូនទាំងពីរនេះ មានកាមេរ៉ា និងទំហំថាមពលថ្មខុសគ្នា ដោយស្មាតហ្វូន X100 មានកាមេរ៉ា 3 គ្រាប់នៅខាងក្រោយដែលមានទំហំ 50-Megapixel (OIS) និងគ្រាប់ទីពីរទំហំ 50-Megapixel ultra-wide lens (150° FOV) និងគ្រាប់ទីបីទំហំ 50-Megapixel periscope (OIS) ។ ស្មាតហ្វូននេះ មានថាមពលថ្មទំហំ 5,000mAh និងបច្ចេកវិទ្យា 120W fast charging ។
សម្រាប់ស្មាតហ្វូន X100 Pro គឺមានកាមេរ៉ាគោលទំហំ 50-megapixel 1-អ៊ីង និងគ្រាប់ទីពីរមានទំហំ 64-Megapixel periscope telephoto ហើយនិងគ្រាប់ទីបីមានទំហំ 50-Megapixel ultra-wide។ ស្មាតហ្វូននេះ ដំណើរការនូវបន្ទះឈីប V3 និងថាមពលថ្មទំហំ 5,400mAh គាំទ្រជាមួយនឹង 100W wired និង 50W wireless charging។ សម្រាប់ស្មាតហ្វូន X100 និង X100 Pro នឹងមានអាវក្រោះការពារទឹក IP68 ជាមួយនឹងការទ្រទ្រង់នូវ WiFi 7, Bluetooth 5.4, USB-C (USB 3.2), NFC, IR blaster និង X-axis linear motor ថែមទៀតផង៕
