កាលពីថ្ងៃម្សិលមិញនេះ iQOO បានរៀបចំព្រឹត្តិការណ៍ប្រកាសចេញសមត្ថិផលថ្មីៗជាច្រើនរបស់ខ្លួននៅក្នុងប្រទេសចិន ដែលរួមមាន ស្មាតហ្វូន កាសស្តាប់ និងនាឡិកាដៃឆ្លាតវៃជាដើម។ ហើយសម្រាប់ស្មាតហ្វូនជំនាន់ថ្មីចុងក្រោយប្រចាំឆ្នាំ 2023 របស់ក្រុមហ៊ុនបុត្រសម្ព័ន្ធរបស់ vivo មួយនេះ គឺមាន IQOO Neo 9 និង Neo 9 Pro ដែលជាជំនាន់ថ្មីស្នងដំណែងពីជំនាន់ iQOO Neo 8 Series ដែលបានបង្ហាញវត្តមានកាលពីឆ្នាំ2022។
iQOO Neo 9 និង Neo 9 Pro ត្រូវបានក្រុមហ៊ុនធ្វើការបំពាក់ជាមួយអេក្រង់ OLED Display កម្រិត 1.5K ទំហំ 6.78-inch ល្បឿន refresh rate 144Hz គាំទ្រមុខងារ HDR10+ និងបច្ចេកវិទ្យាស្កែនក្រយ៉ៅម្រាមដៃក្រោមអេក្រង់ផងដែរ។ បន្ថែមពីនេះប្រព័ន្ធអេក្រង់របស់ស្មាតហ្វូនជំនាន់ថ្មីនេះ ក៏មានភ្ជាប់មកជាមួយបន្ទះឈីប iQOO Q1 ដើម្បីជំនួយដល់ការបង្ហាញរបស់អេក្រង់ឲ្យកាន់តែមានគុណភាពខ្ពស់ជាពិសេសសម្រាប់ដំណើរការកាន់តែរលូននៅពេលចុចបញ្ជាការលេងហ្គេមតែម្តង។ iQOO Neo 9 និង Neo 9 Pro បំពាក់នូវផ្ទៃអេក្រង់រាបស្មើរគែម និងមានកាមេរ៉ាក្រោយរាងជាកងរង្វងធំចំនួនពីរដាច់ពីគ្នា។
នៅលើម៉ូដែល iQOO Neo 9 Series បានបំពាក់នូវសែនស័រកាមេរ៉ាគោលទំហំ 50MP មាន OIS ជាសែនស័រ SONY IMX920 ដូចគ្នានឹងម៉ូដែល vivo X100 ដែរ។ ចំនែកលែន Ultra-wide នៅលើម៉ូដែល iQOO Neo 9 មានទំហំ 8MP ខណៈនៅលើម៉ូដែល Pro មានទំហំ 50MP ហើយស្មាតហ្វូនទាំងពីរនេះ មានកាមេរ៉ាសែលហ្វីទំហំ 16MP ដូចគ្ន។ សម្រាប់កំលាំងម៉ាស៊ីនវិញ ម៉ូដែល iQOO Neo 9 បានប្រើបន្ទះឈីប Qualcomm Snapdragon 8 Gen 2 រីម៉ូដែល Neo 9 Pro បំពាក់ឈីប MediaTek Dimensity 9300។ ហើយទាំងពីរម៉ូដែលមានរ៉េមទំហំធំបំផុតដល់ 16GB LPDDR5 និងម៉េមូរីទំហំធំបំផុតដល់ 1TB UFS4.0។ បន្ថែមពីនេះនៅលើប្រព័ន្ធម៉ាស៊ីន iQOO Neo 9 Series ក៏មានភ្ជាប់ជាមួយប្រព័ន្ធបន្សាបកម្តៅ 6K VC liquid cooling 3D heat dissipation system ថែមទៀតផង។
ចំពោះទំហំថ្មវិញ ទាំង iQOO Neo 9 និង Neo 9 Pro គឺមានថ្មទំហំ 5,160mAh និងគាំទ្របច្ចេកវិទ្យាសាកភ្លើងល្បឿនលឿនកំលាំង 120Hz ដូចគ្នា។ ហើយសម្រាប់មុខងារសំខាន់ៗផ្សេងៗទៀតនៅលើបងប្អូនស្មាតហ្វូនជំនាន់ថ្មីទាំងពីរនេះ រួមមានប្រព័ន្ធ Speaker បំពងសំឡេងចំនួនពីរគ្រាប់, មុខងារ IR Blaster, ប្រព័ន្ធរំញ័រX-Axis linear motor, ប្រព័ន្ធ Wi-Fi 7 និងគាំទ្រការដំឡើងមកស្រាប់ជាមួយ OriginOS 4.0 គាំទ្រដោយ Android 14 ចេញពីប្រអប់ស្រាប់តែម្តង។
ស្មាតហ្វូនជំនាន់ថ្មីទាំងពីរនេះ មានជម្រើសពណ៌ខ្មៅ, ខៀវ និងពណ៌ក្រហមលាយសជាប្រភេទស្បែក (dual-tone leather textured back panel)។ iQOO Neo 9 មានតម្លៃខ្ទង់ប្រហែល $321 សម្រាប់ម៉ូដែល 12GB +256GB ខណៈម៉ូដែល 16GB + 256GB មានតម្លៃប្រហែល $349, 16GB + 512GB មានតម្លៃប្រហែល $391 និង 16GB + 1TB មានតម្លៃប្រហែល $447។ ចំនែក iQOO Neo 9 Pro មានតម្លៃប្រហែល $419 សម្រាប់ម៉ូដែល 12GB + 256GB រីម៉ូដែល 12GB + 512GB មានតម្លៃប្រហែល $461, 16GB + 512GB មានតម្លៃប្រហែល $503 និង 16GB + 1TB មានតម្លៃប្រហែល $559 (តម្លៃនៅទីផ្សារប្រទេសចិន)៕
