នារយៈពេលប៉ុន្មានឆ្នាំចុងក្រោយនេះ ក្រុមហ៊ុនបច្ចេកវិទ្យាយក្ស Samsung បានផលិតនូវកាមេរ៉ាសេនស័រល្អបំផុតសម្រាប់ប្រើប្រាស់នៅលើស្មាតហ្វូន ហើយក្រុមហ៊ុនម៉ាកយីហោជាច្រើន ក៏បានប្រើប្រាស់នូវកាមេរ៉ាសេនស័រនេះ នៅលើស្មាតហ្វូនរបស់ពួកគេផងដែរ ដែលមានកម្រិតចាប់ពីលំដាប់ថវិការហូតដល់ស្មាតហ្វូន high-end។ បើមើលទៅលើសិនស័រកាមេរ៉ា 200MP របស់ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ គឺមានលក្ខណៈប្លែកពីគេ ហើយស្មាតហ្វូនថ្មីៗ flagship ជាច្រើន ក៏ចាប់ផ្តើមប្រើប្រាស់សិនស័រនេះ ជាកាមេរ៉ា telephoto ផងដែរ។ ជាក់ស្តែងស្មាតហ្វូន Honor ជាដើម។
បើតាមការបបញ្ជាក់នៅពេលនេះ បានការបញ្ជាក់ថា Honor Magic 6 Pro ដែលជាស្មាតហ្វូន flagship ជំនាន់ថ្មីរបស់ក្រុមហ៊ុននេះប្រើប្រាស់នូវកាមេរ៉ាសេនស័រទំហំ 200MP របស់ក្រុមហ៊ុន Samsung សម្រាប់កាមេរ៉ា telephoto។ យោងតាមការទម្លាយព័ត៌មានចេញពី @Rodent950 គឺបានសសេរថា ស្មាតហ្វូនម៉ូដែល Porsche Design version របស់ Magic 6 Pro គឺមានកាមេរ៉ា 200MP ISOCELL HP3 របស់ក្រុមហ៊ុន Samsung ដែលអាចនឹងប្រើជាឡែនហ៊្សូម 3.5x ឬ 5x optical zoom lens ប៉ុន្តែនៅមិនទាន់ប្រកាសជាផ្លូវការនៅឡើយទេ។ រូបភាពនេះ ក៏មានការទម្លាយនូវកម្រិតនៃ 100x zoom ដែលព្រីននៅលើកាមេរ៉ានេះផងដែរ។
សម្រាប់កាមេរ៉ាគោលនៅលើស្មាតហ្វូន Magic 6 Pro Porsche Design នេះ គឺនឹងមានការប្រើប្រាស់នូវសិនស័រ 1-អ៊ីង OV50K ដែលផ្តត់ផ្គង់ដោយក្រុមហ៊ុន OmniVision។ សម្រាប់កាមេរ៉ា ultrawide នៅលើស្មាតហ្វូននេះវិញ គឺនឹងប្រើប្រាស់នូវសិនស័រ OmniVision OV50M 1/2.88-អ៊ីង។ បន្ថែមពីនេះ ក៏មានរបាយការណ៍ជាច្រើនទៀតបានទម្លាយថា ស្មាតហ្វូន Honor Magic 6 Pro នេះ ប្រើប្រាស់នូវបន្ទះឈីប Snapdragon 8 Gen 3 ស្រដៀងគ្នាទៅនឹងស្មាតហ្វូន Galaxy S24 Ultra ផងដែរ។ ស្មាតហ្វូននេះ នឹងមានថាមពលថ្មទំហំ 5,600mAh ដែលមានទំហំធំជាងមុន 12%។
សម្រាប់អង្គចងចាំនៅលើស្មាតហ្វូននេះ គឺមានទំហំចាប់ពី 256GB, 512GB និង 1TB ខណៈដែលរ៉េម គឺមានទំហំ 12GB។ ស្មាតហ្វូនថ្មីនេះ គឺមានអេក្រង់គែមកោង quad-curved OLED គាំទ្រជាមួយនឹងល្បឿន 120Hz refresh rate និង Dynamic Island ដូចទៅនឹងស្មាតហ្វូន iPhones ថ្មីៗនេះផងដែរ។ ក្រុមហ៊ុន Honor ដែលជាក្រុមហ៊ុនឯករាជ្យនោះ ក៏មានគម្រោងក្នុងការបង្ហាញនូវស្មាតហ្វូន onor Magic 6 Pro series ជាមួយនិងស្បែកមុខកម្មវិធី MagicOS 8.0 នៅក្នុងប្រទេសចិន នារយៈពេល 2 ថ្ងៃ នាសប្តាហ៍ក្រោយនេះ (ថ្ងៃទី 10-11 ខែមករា)។ យើងរំពឹងថា ស្មាតហ្វូននេះនឹងបង្ហាញខ្លួននៅក្រៅប្រទេសចិនផងដែរនៅខែក្រោយនេះដើម្បីប្រកួតប្រជែងជាមួយនឹងស្មាតហ្វូន Galaxy S24 Ultra ៕