នៅពេលនេះ ក្រុមហ៊ុន Motorola ត្រូវបានគេទម្លាយថា បាននឹងកំពុងតែធ្វើការនៅលើស្មាតហ្វូនជាច្រើនស៊េរីថែមទៀតហើយទៅលើត្រកូល Razr និង Edge Series។ គួរបញ្ជាក់ថា កន្លងមកមានពាក្យចចាមអារ៉ាម និងរបាយការណ៍ជាច្រើន បាននិយាយពីស្មាតហ្វូនទាំងនេះរួចមកហើយ ខណៈពេលនេះ ការបែកធ្លាយថ្មីមួយ បានបញ្ជាក់អំពីតម្លៃ ពណ៌ និងទំហំរបស់ស្មាតហ្វូន Razr 60 Ultra, Edge 60 Pro និង Edge 60 នៅក្នុងទីផ្សាររបស់អ៊ឺរ៉ុបផងដែរ។
យោងតាមការទម្លាយនៅលើវិបសាយ 91Mobiles បានបញ្ជាក់ថា ស្មាតហ្វូនស៊េរីថ្មី Edge 60 និង Edge 60 Pro គឺមានការដាក់លក់នៅលើហាងលក់រាយ Epto របស់អ៊ឺរ៉ុបហើយ ដោយស្មាតហ្វូនទាំងពីររបស់ក្រុមហ៊ុន Motorola នេះ នឹងមាន 2 ពណ៌គឺខៀវ និងបៃតង។ នៅក្នុងបញ្ជីនេះថែមទាំងមានការបញ្ជាក់ទៀតថា ស្មាតហ្វូនថ្មីនេះ នឹងមានទំហំ 12GB+512GB ហើយនឹងមានតម្លៃ 649.89 អ៊ឺរ៉ូ។ សម្រាប់ស្មាតហ្វូន Edge 60 ដែលមានទំហំ 8GB-256GB គឺមានតម្លៃ 399.9 អ៊ឺរ៉ូ។ សម្រាប់ឈ្មោះពណ៌ផ្លូវការរបស់វាអាចជា Gibraltar Sea Blue និង Shamrock Green ។
បន្ថែមពីនេះ យើងនឹងឃើញវត្តមានរបស់ស្មាតហ្វូនបត់បាន Motorola Razr 60 Ultra ស៊េរីថ្មីផងដែរ។ ស្មាតហ្វូននេះ មានទំហំ 12GB+512Gb ដែលមានតម្លៃ 1346.9 អ៊ឺរ៉ូ។ ស្មាតហ្វូននេះមាន 2 ពណ៌គឺ Scarab Green និង Mountain Trail Wood ។ សម្រាប់ព័ត៌មានផ្សេងទៀតរបស់ស្មាតហ្វូននេះ នៅមិនទាន់ទម្លាយនៅលើបញ្ជីនៃហាងលក់រាយរបស់អ៊ឺរ៉ុបនៅឡើយទេ។
សូមជំរាបថា ថ្មីៗនេះ ស្មាតហ្វូន Motorola Razr 60 Ultra ក៏ត្រូវបានគេប្រទះឃើញថា បានបង្ហាញខ្លួននៅនៅលើវិញ្ញាបនបត្រ TENAA រួចហើយផងដែរ។ ស្មាតហ្វូនថ្មីនេះ នឹងមានបន្ទះឈីប Snapdragon 8 Elite SoC ថាមពលថ្ម 4,500mAh និងឆ្នាំងសាក 68W fast charger ថែមទៀតផង។ បន្ថែមពីនេះ ស្មាតហ្វូននេះ នឹងមានកាមេរ៉ាទំហំ 50MP សម្រាប់ថតរូបភាព Selfie និងវីដេអូខលផងដែរ ខណៈពេលដែលកាមេរ៉ាខាងក្រោយរបស់ស្មាតហ្វូននេះ នឹងមានទំហំ 50MP ចំនួន 2 គ្រាប់៕
