ក្រុមហ៊ុនផលិតរថយន្ត Dongfeng-Peugeot-Citroen ដែលហៅកាត់ថា DPC ដែលកើតឡើងពីការបណ្តាក់ទុនរួមគ្នារវាងសម្ព័ន្ធក្រុមហ៊ុន Stellantis Group និង Dongfeng បានត្រៀមខ្លួនរួចរាល់ក្នុងការចូលប្រឡូកនៅក្នុងវិស័យរថយន្តអគ្គិសនីរបស់ប្រទេសចិនជាមួយនឹងការត្រៀមបញ្ចេញរថយន្តអគ្គិសនីម៉ូដែលថ្មីរបស់ខ្លួនដែលមានឈ្មោះថា Hedmos ជាមួយម៉ូដែលដំបូងដែលមានឈ្មោះថា Hedmos 06 ជាប្រភេទរថយន្តអគ្គិសនី SUV។
រថយន្តអគ្គិសនី SUV ស៊េរីថ្មីនេះត្រូវបានគេរំពឹងថា នឹងមានការនាំចេញផ្លូវការណ៍នៅក្នុងខែឧសភា ឆ្នាំនេះ ដោយក្រុមហ៊ុនមានរំពឹងខ្ពស់ថា វាអាចនឹងដណ្តើមបានចំនែកទីផ្សារដ៏ល្អបំផុតនៅក្នុងវិស័យរថយន្តអគ្គិសនីពិភពលោក។ ស្លាកសញ្ញាពាណិជ្ជកម្មនៃម៉ាករថយន្ត Hedmos ត្រូវបានក្រុមហ៊ុន DPC ធ្វើការស្នើរសុំតាំងពីអំឡុងឆ្នាំ 2019 ប៉ុន្តែ ទើបតែបានប្រកាសផ្លូវការណ៍នៅថ្ងៃទី 03 ក្នុងខែមិនា។
ចំពោះនិមិត្តសញ្ញារបស់ Hedmosត្រូវបានបំផុសគំនិតចេញពីម្ជុលចង្អុលនៃឧបករណ៍ត្រីវិស័យ នេះបើយោងតាមការចេញផ្សាយព័ត៌មានផ្លូវការ។ Hedmos 06 ត្រូវបានគេដឹងថាមិនមែនជាឈ្មោះនៃគំរូរថយន្តដើមនោះទេ ដែលដំបូងឡើយវាត្រូវបានគេស្គាល់ឈ្មោះថា Fukang 06។ រថយន្តប្រភេទ Compact all-electric SUV ម៉ូដែលថ្មីនេះ មានបណ្តោយខ្លួន 4,670mm/ ទទឹង 1,900mm/កំពស់ 1,617mm និងមានគម្លាតចន្លោះកង់មុខក្រោយប្រមាណ 2,775mm។
Hedmos 06 ត្រូវបានផលិតឡើងដោយឈរនៅលើគំរូស្ថាបត្យកម្ម DSMA architecture របស់ក្រុមហ៊ុន Dongfeng ដែលដំណើរការដោយប្រព័ន្ធម៉ូទរ័មួយប្រើនៅផ្នែកខាងមុខមានកំលាំង 160kW ដែលអាចជាន់សន្ទុះល្បឿនពី 0-100km/h ចាយពេលខ្ទង់ 6.9 វិនាទី នេះបើតាមការបញ្ជាក់ពីក្រុមហ៊ុនផ្ទាល់។
Hedmos 06 នឹងមកជាមួយកញ្ចប់ថ្មដែលមានទំហំ 62.3kWh ដែលសាកភ្លើងមួយពេញអាចជិះបានចម្ងាយផ្លូវប្រមាណ 520km តាមស្តង់ដារតេស្ត CLTC។ ទៅលើប្រព័ន្ធនៃកំលាំងសាកភ្លើងក្រុមហ៊ុនមិនទាន់បញ្ជាក់នៅឡើយទេ ប៉ុន្តែ គ្រាន់តែដឹងថារថយន្តអគ្គិសនីនេះគាំទ្រនូវបច្ចេកវិទ្យាសាកភ្លើងល្បឿនលឿនដែលអាចសាកបញ្ចូលថាមពលថ្មពី 30% ទៅ 80% ចាយពេលប្រមាណ 28 នាទី។
សម្រាប់ផ្នែកខាងក្នុងឃើញថាមានការរចនាបែបប្រណិតទាន់សម័យជាមួយដៃចង្កូតរចនាជាពីរកាំរាងជាអក្សរ D មានអេក្រង់បង្ហាញព័ត៌មាននៅខាងក្រោយទំហំ 10.2-inch instrument panel និងអេក្រង់កម្សាន្តនៅកណ្តាលមានទំហំ 14.6-inch រីនៅផ្នែកស្នូរកណ្តាលឃើញមានកន្លែងដាក់កែវទឹកពីរ និងកន្លែងសាកភ្លើងស្មាតហ្វូនឥតខ្សែផងដែរ។ បើតាមការបង្ហើបពីក្រុមហ៊ុនបាននិយាយថា Hedmos 06 គឺត្រូវបានកម្លាយចេញពីម៉ូដែល Dongfeng Aeolus L7 ដែលបានប្រកាសចេញកាលពីខែកញ្ញា ឆ្នាំ 2024។ Hedmos 06 ត្រូវបានគេព្យាករណ៍ថាអាចនឹងមានតម្លៃខ្ទង់ប្រហែលជាង $16,000 នៅទីផ្សារប្រទេសចិន៕
