កាលពីចុងខែមករាកន្លងទៅនេះ នៅក្នុងកំឡុងព្រឹត្តិការណ៌ Galaxy Unpacked 2025 ក្រុមហ៊ុនបច្ចេកវិទ្យាយក្សកូរ៉េខាងត្បូង Samsung បានបង្ហាញចេញនូវស្មាតហ្វូនស៊េរីថ្មី Galaxy S25 Series ចំនួន 3 ម៉ូដែល។ ហើយនៅពេលនោះដែរ ក្រុមហ៊ុននេះ ក៏បានញ្ចេញនូវគំរូរបស់ស្មាតហ្វូនម៉ូដែលពិសេសមួយទៀតនៃត្រកូល S25-Series នេះផងដែរ នោះគឺ Galaxy S25 Edge។
នៅថ្ងៃនេះ តាមការទម្លាយជាថ្មីមួយ បានសសេរថា យើងប្រហែលជាមិនត្រូវចំណាយពេលវេលាយូរទៀតនោះទេ នៅក្នុងការទន្ទឹងរង់ចាំវត្តមានរបស់ស្មាតហ្វូនដែលមានកម្រាស់ស្តើងមួយនេះ ដោយសារតែស្មាតហ្វូន Edge នេះ នឹងបង្ហាញខ្លួននៅខែនេះហើយ។ បើតាមការបង្ហោះរបស់គណនី @chunvn8888 បានបញ្ជាក់ថា ស្មាតហ្វូន Galaxy S25 Edge នឹងមានលក់ជាផ្លូវការណ៌នៅក្នុងខែមេសានេះហើយ ដោយនឹងមានលក់ផ្តាច់មុខនៅ MWG នៅក្នុងប្រទេសវៀតណាមថែមទៀតផង។
សូមជំរាបថា មុននេះ គឺមានពាក្យចចាមអារ៉ាមបញ្ជាក់ថា កាលបរិច្ឆេទនៃការប្រកាសជាផ្លូវការរបស់ស្មាតហ្វូននេះ នឹងមាននៅថ្ងៃទី 15 ខែមេសាខាងមុខនេះ។ សម្រាប់ MWG គឺជាហាងលក់រាយដ៏ល្បីឈ្មោះមួយនៅក្នុងប្រទេសវៀតណាម។ គួរបញ្ជាក់ថា មុននេះស្មាតហ្វូន Samsung Galaxy S25 Edge ត្រូវបានគេទម្លាយរូបភាពគំនូសព្រាងជាច្រើនរួចមកហើយ។ ស្មាតហ្វូនថ្មីនេះ នឹងមានការប្រើប្រាស់នូវបន្ទះឈីប Snapdragon 8 Elite ដូចទៅនឹងស្មាតហ្វូន Galaxy S25 Series ផ្សេងៗទៀតអញ្ចឹងដែរ។
នៅលើស្មាតហ្វូនមានកម្រ៉ាស់ស្តើងនេះ នឹងមានថាមពលថ្មទំហំ 3,900mAh គាំទ្រជាមួយនឹងបច្ចេកវិទ្យាសាកថ្មល្បឿនលឿនកម្លាំង 25W charging ហើយនឹងមានអេក្រង់ទំហំ 6.65 អ៊ីងមានកម្រាស់ត្រឹមតែ 5.84mm ព្រមទាំងមានទម្ងន់ប្រហែលជា 160g ប៉ុណ្ណោះ។ គួរបញ្ជាក់ផងដែរថា សម្រាប់ថេប្លេត Samsung Galaxy Tab S10 FE និង Tab S10 FE+ ក៏អាចនឹងបង្ហាញខ្លួននៅក្នុងខែមេសានេះផងដែរ៕
