ទូរស័ព្ទ iOS ជំនាន់ថ្មីឆ្នាំ 2025 គឺ iPhone 17 Series ដែលត្រៀមបង្ហាញខ្លួននៅក្នុងខែកញ្ញា ឆ្នាំនេះ នឹងមានជម្រើស 4 ម៉ូដែល ដូចជា iPhone 17, iPhone 17 Pro, iPhone 17 Pro Max និងម៉ូដែលថ្មីដែលជំនូសម៉ូដែល Plus គឺ iPhone 17 Air។ សម្រាប់ iPhone 17 Air ត្រូវបានគេព្យាករណ៍ថា នឹងមានតម្លៃខ្ទង់ប្រហែល $899។
ការឌីស្សាញថ្មី
តាមរបាយការណ៍បានបញ្ជាក់ថា iPhone 17 Series ដែលចេញនៅចុងឆ្នាំនេះ នឹងមានការផ្លាស់ប្តូរការឌីស្សាញរូបរាងថ្មី និងបំពាក់នូវបច្ចេកវិទ្យាកាន់តែទំនើប និងចុងក្រោយបំផុត។ ដោយក្នុងនោះម៉ូដែលថ្មី iPhone 17 Air ត្រូវបានគេរំពឹងថា មានការផ្លាស់ប្តូររចនាបថលែនកាមេរ៉ាមកផ្តេកទទឹងតួរវិញម្តង។ ហើយម៉ូដែល 17 Air នឹងក្លាយជា iPhone ដែលមានកម្រាស់ស្តើងបំផុតក្នុងប្រវត្តិសាស្ត្រ iPhone គឺត្រឹមតែ 5.5mm ទៅ 6mm។
គ្រប់ម៉ូដែលបំពាក់បន្ទះអេក្រង់ ProMotion
ក្នុងឆ្នាំនេះ ក្រុមហ៊ុន Apple ត្រូវបានគេរាយការណ៍ថា នឹងប្រើប្រាស់បច្ចេកវិទ្យាអេក្រង់ ProMotion នៅលើ iPhone 17 គ្រប់ម៉ូដែល ដែលនាំឲ្យអេក្រង់ iPhone 17 Series ទាំងបួនម៉ូដែលគាំទ្រនូវល្បឿន refresh rate 120Hz។ ហើយបច្ចេកវិទ្យានេះ ក៏នឹងធ្វើឲ្យបច្ចេកវិទ្យា LTPO-OLED Display អាចគាំទ្រនូវមុខងារ Always on Display។ លើសពីនេះ Apple ត្រូវបានគេរាយការណ៍ថា នឹងបង្កើននូវប្រសិទ្ធិភាពលើបច្ចេកវិទ្យាការពារអេក្រង់ថ្មីជំនូសឲ្យ Ceramic Shield ដែលនឹងធ្វើឲ្យកាន់តែមានសមត្ថភាពការពារការកកិតឆ្កូត និងធន់ជាងមុន និងកាត់បន្ថយចំណាំងពន្លឺកាន់តែប្រសើរជាងមុនថែមទៀតផង។
ប្រើបន្ទះឈីប A19 និង A19 Pro
នៅលើ iPhone 17 Pro Model ត្រូវបានគេដឹងថា នឹងបំពាក់នូវបច្ចេកវិទ្យាបន្ទះឈីបជំនាន់ថ្មី A19 Pro ដែលផលិតដោយក្រុមហ៊ុន TSMC តាមស្តង់ដារខ្នាត 3nm N3P Processor ដែលមានប្រសិទ្ធិភាព និងសមត្ថភាពដំណើរការខ្លាំងជាងមុន។ ចំនែកម៉ូដែល iPhone 17 និង iPhone 17 Air នឹងប្រើឈីប A19 ដែលភ្ជាប់ជាមួយជម្រើសរ៉េមទំហំ 8GB ដល់ 12GB។
បង្កើនប្រសិទ្ធិភាពកាមេរ៉ាកាន់តែខ្លាំងជាងមុន
សម្រាប់ម៉ូដែល iPhone 17 Pro Max នឹងភ្ជាប់មកជាមួយសែនស័រកាមេរ៉ាក្រោយទំហំ 48MP ចំនួន 3 គ្រាប់មានសែនស័រ Telephoto, Ultrawide និង Main។ រីម៉ូដែល iPhone 17 Air នឹងប្រើសែនស័រកាមេរ៉ាក្រោយមួយគ្រាប់ទំហំ 48MP។ iPhone 17 Series គ្រប់ម៉ូដែលនឹងបំពាក់នូវសែនស័រកាមេរ៉ាសែលហ្វីទំហំ 24MP ជំនូសឲ្យទំហំ 12MP ដែលប្រើនៅលើ iPhone បច្ចុប្បន្ន។ សម្រាប់សមត្ថភាពកាមេរ៉ារបស់ម៉ូដែល Pro Series គឺរំពឹងថាអាចនឹងធ្វើបានដល់កម្រិត 8K។
ប្រើបន្ទះឈីបសេវា 5G របស់ Apple ផ្ទាល់
ក្នុងឆ្នាំនេះ Apple ត្រូវបានគេដឹងថា នឹងមានការប្រកាសចេញនូវបច្ចេកវិទ្យាបន្ទះឈីប 5G ផ្ទាល់ខ្លួន។ ហើយបន្ទះឈីប 5G របស់ Apple នឹងប្រើដំបូងនៅលើ iPhone 17 Air តែប៉ុណ្ណោះ ចំពោះ iPhone 17 បីម៉ូដែលទៀត គឺនឹងប្រើឈីប 5G របស់ Qualcomm។ iPhone 17 Series គឺនឹងគាំទ្រការប្រើប្រាស់ឈីប Wi-Fi 7 និងបច្ចេកវិទ្យា Bluetooth 5.3។ហើយសម្រាប់ទីផ្សារផ្សេងអាចនឹងដករន្ធដាក់ស៊ីមកាតចោល ដោយជំនូសមកវិញនូវបច្ចេកវិទ្យា eSIM។
បច្ចេកវិទ្យាសាកភ្លើងល្បឿនលឿនកំលាំង 35W Wired Charging
Apple មិនត្រូវបានគេរំពឹងថា នឹងមានការបង្កើនសមត្ថភាពថាមពលថ្ម និងបច្ចេកវិទ្យាសាកភ្លើងល្បឿនលឿននៅលើ iPhone ជំនាន់ថ្មីឆ្នាំ 2025 របស់ខ្លួននោះទេ ដោយរក្សានៅកំលាំងសាកខ្ពស់បំផុតត្រឹម 35W Wired Charging។ iPhone 17 Series នឹងប្រើប្រាស់នូវសារធាតុ hybrid aluminium-glass back លើផ្ទៃខ្នងក្រោយ ដើម្បីបង្កើនប្រសិទ្ធិភាពសាកភ្លើងឥតខ្សែជាមួយឆ្នាំងសាក MagSafe។
តម្លៃ និងកាលបរិច្ឆេទចេញលក់
iPhone 17 អាចនឹងមានតម្លៃចាប់ពីខ្ទង់ $799, iPhone 17 Air មានតម្លៃចាប់ពីខ្ទង់ $899, iPhone 17 Pro មានតម្លៃចាប់ពីខ្ទង់ $999 និង iPhone 17 Pro Max មានតម្លៃចាប់ពីខ្ទង់ $1,199។ ហើយការចេញលក់នឹងត្រូវធ្វើឡើងនៅក្នុងខែកញ្ញា ឆ្នាំ 2025៕
