មកដល់ពេលនេះ ក្រុមហ៊ុន Samsung ត្រូវបានគេមើលឃើញថា បានបញ្ចេញនូវស្មាតហ្វូនអេក្រង់បត់ដែលមានទម្រង់ book-style ហើយនិង clamshell នៅលើទីផ្សារសកលរួចហើយ នៅឡើយតែអេក្រង់បត់ 3 តង់ប៉ុណ្ណោះដែលមិនទាន់បានបញ្ចេញស្របពេលដែលក្រុមហ៊ុន Huawei ដែលជាគូរប្រជែងដ៏សំខាន់នោះ គឺបានប្រកាសចេញនូវ Huawei Mate XT ដែលជាស្មាតហ្វូនអេក្រង់បត់បាននៅលើទីផ្សារហើយ។ នៅពេលនេះ យោងតាមការទម្លាយថ្មីបាននិយាយថា ក្រុមហ៊ុន Samsung កំពុងតែធ្វើការនៅលើស្មាតហ្វូនបត់បានជាច្រើនទម្រង់បន្ថែមទៀតហើយ។
បើមើលនៅក្នុងប៉ាតង់ថ្មីមួយមានការទម្លាយនូវគំនិតថ្មីមួយរបស់ក្រុមហ៊ុននេះ គឺមានការបញ្ជាក់ពីការឌីស្សាញស្មាតហ្វូនបត់បាន 4 តង់ដែលប្រើប្រាស់នូវត្រចៀកបត់ចំនួន 3 និងអេក្រង់ចំនួន 4 ដែលនេះ ពិតជាអស្ចារ្យបំផុតសម្រាប់និន្នាការថ្មីនៃស្មាតហ្វូនដែលមានអេក្រង់បត់បាន។
នៅក្នុងប៉ាតង់នេះ ក៏មានការបង្ហាញនូវស្មាតហ្វូនថ្មីដែលមានអេក្រង់ចំនួន 4 ដែលមានភ្ជាប់ជាមួយនឹងត្រចៀកបត់ចំនួន 3 អោយយើងបានឃើញផងដែរ។ នេះគឺជាគំនិតដ៏អស្ចារ្យរបស់ក្រុមហ៊ុន Samsung ដែលបង្ហាញអំពីបច្ចេកវិទ្យាថ្មីស្របទៅតាមតម្រូវការទីផ្សារបច្ចុប្បន្ន។
បន្ថែមពីនេះ ក្រុមហ៊ុននេះ ក៏មានការលម្អិតទៅលើស្មាតហ្វូនបត់បាន 3 តង់ដែលមានការការប្រើប្រាស់នូវអេក្រង់ចំនួន 3 ត្រចៀកបត់ចំនួន 2 ជាមួយនឹងផតសាកថ្ម USB-C និងកាមេរ៉ាខាងក្រោយ 3 គ្រាប់ទៀតផង។ គួរបញ្ជាក់ផងដែរថា ដំណើរការចាប់ផ្តើមរបស់ស្មាតហ្វូនបត់បានរបស់ក្រុមហ៊ុន Samsung នេះ គឺមានពេលជាង 6 ឆ្នាំហើយ ខណៈពេលដែលប៉ាតង់នេះក៏បង្ហាញអំពីការនាំមុខធៀបជាមួយនឹងក្រុមហ៊ុន Apple ដែលមិនទាន់ចូលប្រកួតប្រជែងនៅក្នុងទីផ្សារស្មាតហ្វូនបត់បាននេះទេ។
ថ្មីៗនេះ ក៏មានការបង្ហាញនូវស្មាតហ្វូនបត់បាន 3 តង់ ចំនួន 2 នៅលើ GSMA Database ផងដែរ ដោយស្មាតហ្វូនទាំងនេះ មាន មានលេខកូដ SM-F9680 (version ប្រទេសចិន) និងលេខកូដ SM-F968N (version នៅក្នុងប្រទេសកូរ៉េ) ដែលនេះបង្ហាញថាស្មាតហ្វូនបត់បាន 3 តង់នេះនឹងលក់នៅក្នុងទីផ្សារប្រទេស 2 នេះមុនគេ៕
