ថ្មីៗនេះ អ្នកទម្លាយ Digital Chat Station បានបញ្ជាក់ថា ក្រុមហ៊ុន OPPO ត្រៀមខ្លួននៅក្នុងការផ្លាស់ប្តូរទៅលើការឌីស្សាញសម្រាប់ស្មាតហ្វូន Reno series ស៊េរីថ្មីរបស់ខ្លួនហើយ។ ក្រុមហ៊ុនបច្ចេកវិទ្យាយក្សចិននេះ គឺមានគោលដៅធ្វើយ៉ាងណាអោយម៉ូដែល Reno 14 ជំនាន់ថ្មីរបស់ខ្លួននៅក្នុងឆ្នាំនេះ មានទម្ងន់ស្រាល ហើយនិងមានអេក្រង់រាបស្មើរ។ បន្ថែមពីនេះ ស្មាតហ្វូន Reno 14 នេះ ក៏នឹងបំពាក់នូវកាមេរ៉ា Periscope Telephoto គែមធ្វើពីលោហធាតុ និងបទពិសោធន៍នៃការប្រើប្រាស់កាន់តែអស្ចារ្យមួយកម្រិតថែមទៀតផង។
លក្ខណៈសម្បត្តិរបស់ស្មាតហ្វូន OPPO Reno 14 Series
តាមការបញ្ជាក់របស់ Digital Chat Station នៅលើបណ្តាញសង្គម Weibo បាបអោយដឹងថា ស្មាតហ្វូនជំនាន់ថ្មី OPPO Reno 14 Series នឹងមានការប្រើប្រាស់អេក្រង់រាបស្មើដែលការឌីស្សាញនេះ បានធ្វើអោយស្មាតហ្វូននេះ កាន់តែមានភាពងាយស្រួលក្នុងការប្រើប្រាស់ និងធន់ថែមទៀត។ បន្ថែមពីនេះ នៅលើស្មាតហ្វូននេះ ក៏នឹងប្រើប្រាស់នូវគែមធ្វើពីលោហធាតុផងដែរដែលផ្តល់នូវភាពប្រណិតមួយកម្រិតទៀតផង។ ក្រៅពីនេះ ក្រុមហ៊ុន OPPO នឹងប្រើប្រាស់នូវកាមេរ៉ា Periscope Telephoto ផងដែរ។ ស្មាតហ្វូននេះ ក៏នឹងមានបំពាក់នូវ IP68/69 ដែលធន់ទៅនឹងការជ្រាបទឹកបានយ៉ាងល្អជាងមុនផងដែរ។
ស្មាតហ្វូន OPPO Reno 14 Series នេះ នឹងបង្ហាញខ្លួននៅឆមាសទី 1 ឆ្នាំ 2025 នេះ ដែលនឹងមានវត្តមានស្មាតហ្វូន Reno 14 និង Reno 14 Pro។ សម្រាប់តម្លៃរបស់ស្មាតហ្វូននេះ អាចនឹងប្រហែលទៅនឹងស្មាតហ្វូន Reno 13 series ជាមួយនឹងតម្លៃចាប់ផ្តើមពី 2,699 យ៉ន់ សម្រាប់ម៉ូដែល Reno 14 និងតម្លៃ 3,299 យ៉ន់ សម្រាប់ម៉ូដែល Pro។ ខណៈពេលដែលព័ត៌មានលម្អិតជាច្រើនទៀតរបស់ស្មាតហ្វូននេះ នៅមិនទាន់ទម្លាយនោះ ស្មាតហ្វូន Reno 14 Pro នេះអាចនឹងមានការពង្រឹងសមត្ថភាពកាន់តែប្រសើរជាងមុនបើធៀបទៅនឹង Reno 13 Pro។
បើមើលទៅលើស្មាតហ្វូន Reno 13 Pro មានបន្ទះឈីប MediaTek Dimensity 8350 មានអេក្រង់ទំហំ 6.83-អ៊ីង display គាំទ្រជាមួយនឹងល្បឿន 120Hz refresh rate និងមានកាមេរ៉ាខាងក្រោយ 50-Megapixel ហើយនិងថាមពលថ្មទំហំ 5,800mAh ជាមួយនឹងការទ្រទ្រង់ទៅលើបច្ចេកវិទ្យា 80W wired និង 50W wireless charging ផងដែរ៕
