ក្រុមហ៊ុនកែច្នៃស្មាតហ្វូន និងផលិតផលប្រណិត និងមានតម្លៃថ្លៃបំផុត Caviar ដែលមានមូលដ្ឋាននៅទីក្រុងឌួបៃ បានធ្វើការបង្ហាញចេញនៅរចនាបថថ្មីនៃ iPhone 16 Pro Series ដែលស្រោបដោយមាសសុទ្ធ ស្ថិតនៅក្នុងផ្នែក “Art & Gold” របស់ក្រុមហ៊ុន។ ទូរស័ព្ទ iPhone ម៉ូដែល Limited Edition ថ្មីនេះ ត្រូវបានក្រុមការងាររចនារបស់ Caviar ធ្វើការឌីស្សាញឡើងជាមួយរចនាបថថ្មីស្អាតប្លែកជាមួយជម្រើសពណ៌ថ្មីដែលមានដូចជា ពណ៌ស ក្រហម និងទឹកមាសលឿង។
សម្រាប់ iPhone 16 Pro ក្រុមការងារ Caviar ធ្វើការជ្រើសរើសយកមកធ្វើការរចនាឡើងថ្មីពេលនេះ គឺជាម៉ូដែលពណ៌ថ្មី Desert Titanium។ ម៉ូដែលនេះត្រូវបានក្រុមហ៊ុនធ្វើការស្រោបដោយមាសសុទ្ធចំនួន 18 ការ៉ាត់ជាមួយនឹងការរចនាខ្នងខាងក្រោយថ្មីប្លែកដែលរួមបញ្ចូលនៅរចនាបថ medieval Gothic, Art Deco, និង modern parametric designs។ សម្រាប់ម៉ូដែល iPhone 16 Pro Symphony Edition មានការរចនាបែប parametric pattern ដែលរំលេចនូវលើ Archimedean spiral ដែលរួមបញ្ចូលនូវភាពស៊ីមេត្រីគ្នាជាមួយនឹងសមាមាត្រមាសសុទ្ធ។ ស្លាកសញ្ញាផ្លែប៉ោមត្រូវបានកែច្នៃចេញពីមាសសុទ្ធ 18 ការ៉ាត់រំលេចនៅលើពណ៌ Desert Titanium។
សម្រាប់ម៉ូដែល Symphony ក្រុមហ៊ុន Caviar ផ្តល់ជូនពីរជម្រើសម៉ូដែលជាមួយការស្រោបមាសសុទ្ធ 18 ការ៉ាត់ និង 24 ការ៉ាត់។ ចំពោះតម្លៃវិញរបស់ iPhone 16 Pro និង 16 Pro Max ដែលធ្វើការកែច្នៃថ្មីបែប Limited Edition នេះ គឺចាប់ពីខ្ទង់ $10,630 និង $62,740 ផ្អែកទៅលើកម្រិតទឹកមាស និងរចនាបថ។
សរុបសេចក្តីមកវិញ ទូរស័ព្ទ iPhone 16 Pro Series ដែលជាម៉ូដែល Gold Limited Edition ដែលច្នៃផលិតឡើងថ្មីដោយ Caviar នេះ គឺមិនសម្រាប់អ្នកប្រើប្រាស់ទូទៅនោះទេ គឺវាផលិតឡើងសម្រាប់តែអ្នកដែលចូលប្រើប្រាស់វត្ថុដែលមានតម្លៃថ្លៃ និងចំនួនមានកំនត់នៅលើលោកតែប៉ុណ្ណោះ នោះក៏ដោយសារតែតម្លៃដ៏ថ្លៃរបស់ពួកវាតែម្តង៕