ក្រុមហ៊ុនផលិតកញ្ចប់អាគុយរថយន្តអគ្គិសនីឈានមុខគេរបស់ប្រទេសចិន CATL បានធ្វើការណែនាំបង្ហាញចេញនូវបច្ចេកវិទ្យាអាគុយអគ្គិសនីជំនាន់ថ្មីរបស់ខ្លួនហៅថា CATL Tectrans-T ដែលត្រូវបានអភិវឌ្ឍន៍ផលិតឡើងសម្រាប់ការប្រើប្រាស់បំពាក់នូវលើរថយន្តអគ្គិសនីប្រភេទរថយន្តដឹកទំនិញធន់ធ្ងន់ ឬ Heavy-Duty truck។ បច្ចេកវិទ្យាអាគុយអគ្គិសនីថ្មីនេះ ត្រូវបានក្រុមហ៊ុនធ្វើការបង្ហាញចេញនៅក្នុងព្រឹត្តិការណ៍ 2024 IAA Mobility នៅប្រទេសអាល្លឺម៉ងកាលពីថ្ងៃចន្ទម្សិលមិញនេះ។
តាមការបញ្ជាក់ពី CATL ឲ្យដឹងថា បច្ចេកវិទ្យាកញ្ចប់អាគុយរថយន្តអគ្គិសនីថ្មីនេះ គឺមានទំហំ 600kWh ហើយអាចមានអាយុកាលក្នុងប្រើប្រាស់ដល់ទៅ 2.8 លានគីឡូម៉ែត្រ និងគាំទ្រការសាកថាមពលចូលវិញដល់ 70% ប្រើពេលខ្ទង់ 15 នាទីប៉ុណ្ណោះ។ បច្ចេកវិទ្យាកញ្ចប់អាគុយអគ្គិសនី Tectrans-T ថ្មីនេះមានពីរស៊េរី គឺ Long Life Edition និង Superfast Charging Edition។
ដោយស៊េរី Tectrans-T Long Life Edition គឺមានអាយុកាលក្នុងការប្រើប្រាស់បានយូរបំផុត គឺដល់ 2.8 លានគីឡូម៉ែត្រ ឬប្រហែល 15 ឆ្នាំ។ កញ្ចប់អាគុយអគ្គិសនីមួយនេះសាកភ្លើងពេញម្តងអាចបើកបរបានចម្ងាយផ្លូវ 500 គីឡូម៉ែត្រ ហើយនិងគាំទ្រនូវប្រព័ន្ធ battery swapping solution របស់ CATL។
លោក Aleksej Krükov ប្រធានវិស្វករនៃក្រុមហ៊ុន CATL Overseas Business បាននិយាយក្នុងអំឡុងពេលធ្វើបទបង្ហាញនៅក្នុងព្រឹត្តិការណ៍ IAA Mobility នៅទីក្រុង Hanover ថា "ដោយបានឈរលើការសាកល្បងនៃពេលវេលា ការផលិតផលនេះកំណត់នូវស្តង់ដារថ្មីមួយសម្រាប់ការធន់ទ្រាំនឹងថ្មរបស់រថយន្តដឹកទំនិញធុនធ្ងន់" ។
ចំនែកស៊េរី Tectrans-T Superfast Charging Edition វិញ គឺគាំទ្របច្ចេកវិទ្យាសាកភ្លើងចូលល្បឿនលឿន 4C Charging ដែលអាចសាកភ្លើងចូលវិញដល់ 70% ប្រើពេលខ្ទង់ 15 នាទី ប៉ុណ្ណោះ។ ស៊េរីនេះមានពីរជម្រើសទំហំ គឺ 200kWh និង 600kWh ដែលសាកពេញម្តងអាចរត់បានចម្ងាយផ្លូវ 500km។ ហើយសម្រាប់អាយុកាលក្នុងការប្រើប្រាស់វិញ គឺបានដល់ 1.2 លានគីឡូម៉ែត្រ ឬប្រហែល 8 ឆ្នាំ។ CATL បានចាប់ដៃសហការជាមួយក្រុមហ៊ុនផលិតរថយន្តអគ្គិសនីប្រភេទដឹកទំនិញធន់ធ្ងន់នៅតំបន់អឺរ៉ុបដែលរួមមានដូចជា Daimler Truck AG, Volkswagen Commercial Vehicles, និង Volvo A/B ជាដើម។
សម្រាប់កញ្ចប់អាគុយរថយន្តអគ្គិសនីថ្មីនេះ ក្រុមហ៊ុន CATL បានធ្វើការបែងចែកចេញជាបីជម្រើសសម្រាប់ប្រភេទរថយន្តផ្សេងៗគ្នា ដោយក្នុងនោះមានដូចជាប្រភេទ Tectrans-T សម្រាប់ប្រើលើរថយន្តដឹកទំនិញធន់ធ្ងន់ (Heavy-duty truck), Tectrans-L សម្រាប់ប្រើនៅលើរថយន្តប្រភេទ Light Commercial EVs និង Tectrans-B សម្រាប់ប្រើនៅលើរថយន្តប្រភេទរថយន្តក្រុង (Electric buses)។
CATL គ្រោងនឹងដាក់ពង្រាយកញ្ចប់អាគុយអគ្គិសនី Tianxing-B ថ្មីលើរបស់ខ្លួននៅលើរថយន្តក្រុងចំនួន 80 ម៉ូដែលផ្សេងៗគ្នា ហើយបានបង្កើតភាពជាដៃគូជាមួយអតិថិជនចំនួន 13 រួចហើយដែលក្នុងនោះរួមមាន Dongfeng, Golden Dragon និង Yutong Bus នៅក្នុងប្រទេសចិន។ សម្រាប់ប្រភេទថ្មអគ្គិសនី Tectrans ទាំងបីគឺផ្អែកលើបច្ចេកវិទ្យា CTP (cell-to-pack) 3.0៕
