សម្រាប់ការបង្ហាញវត្តមានរបស់ iPhone 16 Series នៅឆ្នាំនេះ ក្រុមហ៊ុន Apple បានសម្រេចធ្វើការតម្លើងថ្លៃទៅលើការផ្លាស់ប្តូរថ្មនៅលើស្មាតហ្វូនម៉ូដែល Pro របស់ខ្លួនទាំង iPhone 16 Pro និង iPhone 16 Pro Max។ តាមរយៈនៃការចេញផ្សាយនូវសេវាកម្មផ្លាស់ប្តូរសមាសភាគនៅលើស្មាតហ្វូនជំនាន់ថ្មីរបស់ខ្លួនថ្មីៗនេះ ក្រុមហ៊ុនបច្ចេកវិទ្យាយក្សអាមេរិកាំងមួយនេះ បានតម្លើងថ្លៃទៅលើសេវាកម្មប្តូរ iPhone 16 Pro និង iPhone 16 Pro Maxខ្ពស់រហូតដល់ទៅ 20% ប្រៀបធៀបជាមួយនិងថាមពលថ្មរបស់ iPhone 16 និង iPhone 16 Plus។
សូមជំរាបថា កាលពីឆ្នាំមុននេះ ក្រុមហ៊ុន Apple មិនបានធ្វើការតម្លើងថ្លៃទៅលើសេវាកម្មប្តូរថ្មរបស់ស្មាតហ្វូន iPhone 15 Series នោះទេ ដោយគ្រប់ម៉ូដែល គឺតម្លៃដូចគ្នា។ សម្រាប់ឆ្នាំនេះ គឺមានការផ្លាស់ប្តូរហើយដោយតម្លៃការផ្លាស់ប្តូររវាងស្មាតហ្វូន iPhone 16 Pro Series និងម៉ូដែលស្តង់ដាររបស់ iPhone 16 គឺមានតម្លៃខុសគ្នា។
ក្រឡេកមកមើលតម្លៃការផ្លាស់ប្តូរថ្មនៅលើ iPhone 16 Pro និង iPhone Pro Max ឆ្នាំនេះ គឺនឹងមានតម្លៃខ្ពស់ដល់ទៅ $119 ខណៈដែលតម្លៃប្តូរថ្មនៅលើម៉ូដែលស្តង់ដារ iPhone 16 និង iPhone 16 Plus គឺមានតម្លៃត្រឹមតែ $99 ប៉ុណ្ណោះ។ ប្រៀបធៀបជាមួយនិងម៉ូដែលមុនៗ ដែលមានដូចជា iPhone 15 Series និង iPhone 14 Series គឺមានតែតម្លៃថ្មរបស់ iPhone 13 Series ប៉ុណ្ណោះដែលទាបជាងគេគឺ $89។