ក្រុមហ៊ុនផលិតស្មាតហ្វូន Infinix បាននឹងកំពុងធ្វើការលើការផលិតស្មាតហ្វូនអេក្រង់បត់ស្ទីលបែប Flip ដែលត្រូវបានគេស្គាល់ថាជា Infinix Zero Flip។ ស្មាតហ្វូនបត់អេក្រង់បែប Flip របស់ក្រុមហ៊ុននេះបានឆ្លងកាត់វិញ្ញាណបនប័ត្របញ្ជាក់ការផលិតពីស្ថាប័ន FCC រួចហើយកាលពីអំឡុងខែមិថុនា។ ស្ថាប័ននេះបានបង្ហាញថា Infinix Zero Flip គឺគាំទ្របច្ចេកវិទ្យាសាកភ្លើងល្បឿនលឿន 70W Wired Fast Charging។
ដោយឡែកនៅពេលនេះក៏មានការបង្ហោះពីគុណសម្បត្តិសំខាន់ៗមួយចំនួនរបស់ Infinix Zero Flip នៅលើ Facebook page របស់ហាងលក់រាយមួយនៅក្នុងប្រទេសវៀតណាមបន្ថែមទៀត។ តាមរយះការបង្ហោះនៅលើ Facebook Page បានបង្ហាញថា Infinix Zero Flip គឺមានអេក្រង់ខាងក្រៅទំហំធំដល់ 3.64-inch និងអេក្រង់ខាងក្នុងទំហំ 6.7-inch ជាប្រភេទអេក្រង់ Full-HD+ AMOLED Display ហើយអេក្រង់ទាំងពីររបស់ Zero Flip គឺគាំទ្រល្បឿន refresh rate 120Hz និងស្រោបការពារដោយកញ្ចប់ Corning Gorilla Glass ផងដែរ។
ប្រភពដដែលខាងលើបានបញ្ជាក់បន្ថែមទៀតថា Infinix Zero Flip មានការដំឡើងមកជាមួយលែនកាមេរ៉ាក្រោយចំនួនពីរគ្រាប់ដែលមានទំហំ 50MP Main និង 10.8MP ជាមួយសែនស័រកាមេរ៉ាខាងមុខទំហំ 12MP។ ស្មាតហ្វូនបត់អេក្រង់បែប Flip មួយនេះ នឹងដំណើរការនៅលើបន្ទះឈីប MediaTek Dimensity 8020 SoC ហើយនិងមានភ្ជាប់មកជាមួយរ៉េមប្រភេទ LPDDR4X និងម៉េមូរីប្រភេទ UFS3.1។
Infinix Zero Flip ក៏នឹងមានភ្ជាប់មកជាមួយថ្មទំហំ 4,590mAh, ប្រព័ន្ធបំពងសំឡេងពីរគ្រាប់ (Stereo Speaker) និងដំណើរការដោយ Android 14 ស្រោបផ្ទៃមុខកម្មវិធីប្រើប្រាស់ដោយ XOS ហើយអាចនឹងមានភ្ជាប់មកជាមួយមុខងារប្រើប្រាស់ឆ្លាតវៃ AI ថែមទៀតផង៕
