នៅពេលនេះ ក្រុមហ៊ុន Huawei បានចាប់ផ្តើមទទួលកក់ទិញមុន (Pre-Order) ទៅលើស្មាតហ្វូនថ្នាក់ប្រណិត Mate 70 Series នៅតាមហាង Offline Stores ជាច្រើនរបស់ខ្លួននៅក្នុងប្រទេសចិនហើយ។ បើតាមការបញ្ជាក់ពីហាង Huawei Stores ជាច្រើនកន្លែងនៅក្នុងទីក្រុងប៉េកាំង បានអោយដឹងថា ពួកគេមិនទាន់ទទួលបាននូវការជូនដំណឹងណាមួយជាផ្លូវការពីក្រុមហ៊ុន Huawei នៅឡើយទេនៅលើរឿងនេះ។
សូមជំរាបថា ស្មាតហ្វូន Mate Series គឺជាស្មាតហ្វូនដ៏ពេញនិយមបំផុតនៅក្នុងចំណោមម៉ូដែលប្រណិតរបស់ Huawei ដែលបានប្រកាសចេញនៅលើទីផ្សារសម្រាប់អតិថិជនជាច្រើននៅជុំវិញពិភពលោក។ កាលពីឆ្នាំមុននេះ ក្រុមហ៊ុននេះ បានត្រឡប់មកវិញជាមួយនឹងយុទ្ធសាស្រ្តនៃការផ្តោតទៅលើស្មាតហ្វូនប្រណិតចំនួន 2 របស់ខ្លួន និងការប្រកាសបង្ហាញនូវស្មាតហ្វូន Mate 60 Series ដែលមានមុខងារជាច្រើនដ៏ទាក់ទាញថែមទៀតផង។
ក្រុមហ៊ុនផលិតស្មាតហ្វូនរបស់ចិននេះ នៅមិនទាន់បានប្រកាសស្មាតហ្វូននេះជាផ្លូវការណ៌នៅឡើយទេ។ ក្រុមហ៊ុន Huawei បានចាប់ផ្តើមលក់នៅក្នុងកម្មវិធី ‘Pioneer Program’ ដែលអនុញ្ញាតអោយអតិថិជនជាច្រើនអាចទិញស្មាតហ្វូន Mate 60 Series នេះ មុនការលក់ជាផ្លូវការណ៌។ កម្មវិធីនេះ គឺបើកសម្រាប់អតិថិជន Offline ដែលធ្វើការកក់ទិញតាមរយៈហាង Huawei Store នៅក្នុងប្រទេសចិនប៉ុណ្ណោះ។ បន្ទាប់មកទើបក្រុមហ៊ុននេះ អាចនឹងបន្តទៅកាន់ការកក់ទិញ online វិញ។
នេះគឺជាលើកដំបូងបំផុតដែលក្រុមហ៊ុនផលិតស្មាតហ្វូនដ៏ល្បីល្បាញនេះ ប្រើប្រាស់នូវយុទ្ធសាស្រ្តក្នុងការបង្ហាញនូវស្មាតហ្វូនទាំងមិនទាន់រៀបចំនូវព្រឹត្តិការណ៍សម្ភោធន៍ជាផ្លូវការនៅឡើយនោះ។ កម្មវិធីនេះ ប្រហែលជាដូចទៅនឹងករណីរបស់ស្មាតហ្វូន Huawei Mate 70 ផងដែរ។ នៅថ្ងៃនេះ ហាង Huawei Store មួយបង្ហោះវីដេអូនៅលើ Tiktok បាននិយាយថា ស្មាតហ្វូនជំនាន់ថ្មីត្រកូល Mate Series នឹងបង្ហាញខ្លួនឆាប់ៗនេះ ហើយស្មាតហ្វូននេះ អាចធ្វើការ pre-order បានផងដែរ៕
