នៅពេលនេះ មានពាក្យចចាមអារ៉ាមជាច្រើននៅតែបន្តនៅក្នុងការចែកចាយព័ត៌មានថ្មីៗ អំពីបន្ទះឈីបដែលក្រុមហ៊ុននិមួយៗគ្រោងនឹងបង្ហាញវត្តមាននៅលើស្មាតហ្វូនថ្នាក់ប្រណិតជាច្រើនរបស់ខ្លួននៅក្នុងឆ្នាំនេះ។ ថ្មីៗនេះបន្ទាប់ពីមានការបែកធ្លាយលទ្ធផលនៃការធ្វើតេស្តទៅលើបន្ទះឈីប Qualcomm Snapdragon 8 Gen 4 រួចមក ពេលនេះពិន្ទុនៃការធ្វើតេស្តទៅលើបន្ទះឈីប Dimensity 9400 ក៏ត្រូវបានគេបង្ហាញនៅលើ Geekbench ដូចគ្នា។ នៅក្នុងការតេស្តនេះ ក៏មានការធ្វើតេស្តពិន្ទុ AI Benchmark នៅលើ platform នេះផងដែរ។
សម្រាប់លទ្ធផលនៃការធ្វើតេស្តទៅលើបន្ទះឈីប Dimensity 9400 គឺបង្ហាញថាឈីបនេះ មានពិន្ទុចំនួន 1,501 នៅក្នុង Single Precision និង 1,906 ទៅលើការតេស្ត Half Precision ហើយនិងពិន្ទុ 1,793 ទៅលើការតេស្ត Quantized tasks ។ ជាមួយនិងការវាស់ស្ទង់ទៅលើកម្រិត Geekbench’s AI benchmark តាមរយៈ Tool ថ្មីនេះគឺមិនទាន់មានទិន្នន័យគ្រប់គ្រាន់សម្រាប់ការប្រៀបធៀបទៅលើលទ្ធផលនេះ ជាមួយនឹងគូប្រជែងជាច្រើនទៀតដូចជា Snapdragon 8 Gen 4 បាននោះទេ។
ប៉ុន្តែសម្រាប់អ្វីដែលគួរអោយកត់សម្គាល់នោះ គឺនៅលើ Benchmark Platform នេះ បានបញ្ជាក់ពី octa-core CPU របស់បន្ទះឈីប Dimensity 9400។ ឈីបនេះមាន 3-Cluster គាំទ្រជាមួយនឹង Single High-Performance Cortex-X5 Core ដំណើរការនៅក្នុងល្បឿន 3.63 GHz និង 3 គ្រាប់ទៀត Cortex-X4 cores ល្បឿន 2.80GHz ខណៈដែល 4 គ្រាប់ទៀត Cortex-A725 cores រត់បានល្បឿន 2.10 GHz សម្រាប់គ្រប់គ្រងការងារប្រចាំថ្ងៃ។
ប្រៀបធៀបល្បឿនបន្ទះឈីប Dimensity 9400 នេះ គឺមានល្បឿនត្រឹមតែ 3.63GHz ប៉ុណ្ណោះ ខណៈពេលដែលបន្ទះឈីប Snapdragon 8 Gen 4 គឺមានល្បឿន 4.32GHz ហើយបន្ទះឈីប Apple A18 series គឺមានល្បឿន 4.04 GHz។ ប្រសិនបើមើលទៅលើការបែកធ្លាយមុននេះ បន្ទះឈីបននេះ គឺមានការបង្កើនល្បឿនល្អជាងមុន 30% ការបង្កើនប្រសិទ្ធិភាពប្រសើរជាងមុនដល់ទៅ 35% និងការបង្កើនទៅលើល្បឿន AI ដល់ទៅ 40%។ បន្ទះឈីប Dimensity 9400 នេះ នឹងបង្ហាញខ្លួននៅដើមខែតុលាខាងមុខនេះ៕
