ក្រុមហ៊ុន Xiaomi ទើបតែប្រកាសចេញជាផ្លូវការណ៌នូវកាលបរិច្ឆេទនៃការបង្ហាញវត្តមាននៅលើទីផ្សារសកលសម្រាប់ការប្រកាសចេញនូវស្មាតហ្វូន Xiaomi 14T Series។ ស្មាតហ្វូន Xiaomi 14T និង 14T Pro គ្រោងនឹងបង្ហាញខ្លួននៅថ្ងៃទី 26 ខែកញ្ញាខាងមុខនេះ ហើយក្រុមហ៊ុននេះ នៅបន្តនៅក្នុងការផ្តោតទៅលើស្មាតហ្វូនថ្នាក់កណ្តាលជាមួយនឹងបទពិសោធន៍កាមេរ៉ាប្រណិតដ៏ខ្លាំងក្លា។ ការប្រកាសខាងលើនេះ គឺជាយុទ្ធសាស្រ្តរបស់ក្រុមហ៊ុន Xiaomi សហការគ្នាជាមួយ Leica បន្ទាប់ពីទទួលបានជោគជ័យក្នុងកិច្ចសហការជាមួយ Xiaomi 13T Series។
ស្មាតហ្វូនជំនាន់ថ្មី Xiaomi 14T និង 14T Pro នឹងប្រើប្រាស់នូវសិនស័រកាមេរ៉ា Leica ហើយនិងមានការឌីស្សាញចេញជាមួយនឹងពណ៌ស្រស់ស្អាតបំផុត។ នៅក្នុងសេចក្តីប្រកាសរបស់ក្រុមហ៊ុន Xiaomi បញ្ជាក់អំពីការប្រើប្រាស់នូវ Leica Color Profiles ថ្មីសម្រាប់ស្មាតហ្វូននេះផងដែរ។
ថ្មីៗនេះ ស្មាតហ្វូនទាំងពីរនេះ ក៏មានការបែកធ្លាយរូបភាពនៅលើអនឡាញផងដែរ។ រូបភាពថ្មីៗនេះ បានបង្ហាញថា ស្មាតហ្វូន Xiaomi 14T នឹងមាន 4 ពណ៌ ខណៈពេលដែលស្មាតហ្វូន 14T Pro នឹងមាន 3 ពណ៌សម្រាប់ជ្រើសរើស។ ដូចអ្វីដែលបានរំពឹងទុក ស្មាតហ្វូនទាំងពីរនេះ នឹងមានកាមេរ៉ាខាងក្រោយ 3 គ្រាប់ នឹងមានបំពាក់នូវភ្លើង LED Flash ផងដែរ។ ស្មាតហ្វូនថ្មីនេះ គឺមិនមានប្រើប្រាស់នូវ periscope zoom lens នោះទេ។ រូបភាព render បែកធ្លាយនេះទម្លាយអំពីអេក្រង់ខាងក្រោយរបស់ស្មាតហ្វូន 14T នេះផងដែរ។
ស្មាតហ្វូន Xiaomi 14T ជំនាន់ថ្មីនេះ នឹងមានអេក្រង់ AMOLED ទំហំ 6.67-អ៊ីង កម្រិត “1.5K” ទ្រទ្រង់ជាមួយនឹងកម្រិតអេក្រង់ 144Hz refresh rate ហើយនិងមានពន្លឺនៅលើអេក្រង់ 4,000nits។ សម្រាប់កម្លាំងម៉ាស៊ីនៅលើ Xiaomi 14T Series នេះ គឺមានពីរខុសគ្នា ដោយម៉ូដែល ស្មាតហ្វូន Xiaomi 14T នឹងដំណើរការនូវបន្ទះឈីប MediaTek Dimensity 8300-Ultra ខណៈដែលម៉ូដែល Xiaomi 14T Pro នឹងប្រើប្រាស់នូវបន្ទះឈីប Dimensity 9300+។ ស្មាតហ្វូនទាំងពីរនេះនឹងមានរ៉េមទំហំ 12GB ហើយម៉ូដែល Xiaomi 14T នឹងម៉េមូរីទំហំ 256GB ខណៈម៉ូដែល Xiaomi 14T Pro នឹងមានម៉េមូរីទំហំ 512GB ។
ស្មាតហ្វូនជំនាន់ថ្មី Xiaomi 14T និង 14T Pro មានកាមេរ៉ាខាងគោលទំហំ 50MP និងអមជាមួយនឹង 50MP telephoto lens ហើយនិងមួយគ្រាប់ទៀតមានទំហំ 12MP ultrawide។ ស្មាតហ្វូននេះមានកាមេរ៉ាខាងមុខទំហំ 32MP selfie។ ស្មាតហ្វូនទាំងពីរនេះ នឹងមានប្រព័ន្ធ IP68 សម្រាប់ការពារធូលី និងការជ្រាបទឹកថែមទៀត។ ខណៈពេលដែលតម្លៃនៃការប្រកាសជាផ្លូវការរបស់ស្មាតហ្វូននេះ មិនទាន់បញ្ជាក់នោះ ពាក្យចចាមអារ៉ាមជាច្រើន បានទម្លាយថា ស្មាតហ្វូន Xiaomi 14T នឹងមានតម្លៃ 649 យូរ៉ូ ហើយម៉ូដែល Xiaomi 14T Pro នឹងមានតម្លៃ 899 យូរ៉ូ៕